8 Egzanp

SA SA VLE DI

Paran ki bay egzanp yo pa annik di pitit yo fè yon bagay men yo fè sa yo anseye yo tou. Pa egzanp, ou pa ka vle pou pitit ou pa bay manti alòske l tande w k ap di “di m pa la” lè y ap mande pou ou.

“Yon bagay anpil moun di se ‘fè sa m di, men pa fè sa m fè’, men sa pa mache nan ka timoun. Yo tankou eponj, yo kopye sou tout sa n di ak tout sa n fè, e y ap di w lè w pa fè sa w te eseye anseye yo a.” — David.

PRENSIP BIBLIK: “Ou menm k ap preche: ‘Pa vòlè’, w ap vòlè?” — Women 2:21.

REZON KI FÈ SA ENPÒTAN

Paran yo gen plis enfliyans sou timoun yo e menm sou adolesan yo plis pase nenpòt lòt moun, pa egzanp ti zanmi yo genyen yo. Sa vle di ou menm paran ou nan pi bon pozisyon pou w bay pitit ou bon direksyon an akondisyon ou fè sa w ap anseye yo.

“Ou ka ap di pitit ou yon bagay nenpòt san fwa, epi w ap mande tèt ou si l koute sa w di a. Men, lejou w pa fè sa w ap di l fè yo, l ap fè w wè sa. Timoun yo wè tout sa n fè, menm lè w panse yo pa wè n.” — Nicole.

PRENSIP BIBLIK: “Sajès ki sot anwo a se yon sajès [...] ki pa ipokrit.” — Jak 3:17.

SA W KA FÈ

Egzamine pwòp prensip ou yo. Ki sa ou menm ou abitye gade pou w detann ou? Ki jan w boule ak moun ou marye avè l la e ak pitit ou? Ki kalite zanmi w genyen? Èske w gen konsiderasyon pou lòt moun? Donk, èske w se kalite moun ou vle pitit ou ye a?

“Mari m avè m pa eseye fè pitit nou fè yon bagay nou menm nou pa fè.” — Christine.

Mande eskiz pou erè w fè. Pitit ou yo deja konnen ou pa pafè. Donk, lè w eskize w lè sa nesesè, se aprann w ap aprann yo yon bèl leson konsènan imilite ak jan sa enpòtan pou yo onèt.

“Pitit nou yo bezwen tande n k ap admèt nou antò epi k ap mande eskiz lè n fè erè. Si nou pa fè sa, yo pap janm aprann admèt lè yo antò.” — Robin.