Poukisa nou soufri, nou vyeyi e nou mouri?

Premye paran nou yo lakòz n ap soufri

“Akoz yon sèl moun peche antre nan monn nan, e akoz peche lanmò antre, e konsa lanmò blayi sou tout moun.” — WOMEN 5:12.

Bondye te kreye premye paran nou yo, Adan ak Èv, ak lespri yo ak kò yo pafè. Li te mete yo nan yon paradi sou tè a ki te rele jaden Edenn. Li te di yo ka manje nan tout pyebwa ki nan jaden an, eksepte youn. Sepandan, Adan ak Èv te chwazi manje fwi nan pyebwa sa a, e sa te yon peche (Jenèz 2:15-17; 3:1-19). Apre dezobeyisans yo, Bondye te mete yo deyò nan jaden an, e lavi a te vin di pou yo. Apre sa, lè yo te vin gen timoun, lavi a te vin di pou timoun yo tou. Yo tout te vin granmoun e yo te mouri (Jenèz 3:23; 5:5). Nou malad, nou vyeyi e nou mouri paske nou soti nan premye fanmi sa a.

Espri mechan yo ajoute sou soufrans nou yo

“Lemonnantye anba pouvwa Mechan an.” — 1 JAN 5:19.

“Mechan” sa a rele Satan. Se yon zanj ki te rebele kont Bondye (Jan 8:44; Revelasyon 12:9). Annapre, gen lòt zanj ki te fè menm jan an, e yo suiv Satan. Yo rele yo demon. Espri envizib sa yo itilize pouvwa yo pou yo twonpe moun, e pou fè yo vire do bay Kreyatè a. Yo pouse anpil moun fè move bagay (Sòm 106:35-38; 1 Timote 4:1). Satan ak demon yo pran plezi nan fè moun soufri.

Pafwa se nou ki lakòz soufrans nou yo

“Kèlkeswa sa yon moun simen, se sa l ap rekòlte tou.” — GALAT 6:7.

Nan anpil domèn, nou soufri akoz peche nou eritye a, e akoz Satan ap enfliyanse monn ki toutotou nou an. Men pafwa, gen moun ki ajoute sou soufrans pa yo. Ki jan? Lè yo fè move bagay oswa yo pran move desizyon, souvan yo rekòlte move konsekans. Yon lòt bò, lè moun fè bon bagay, yo rekòlte bon bagay. Pa egzanp, yon mari ki se yon papa tou e ki onèt, ki travay di e ki renmen fanmi l ap rekòlte anpil bon bagay e l ap fè fanmi l gen kè kontan. Men si l nan jwe aza, bwè twòp e li parese, l ap lakòz ni li menm ni fanmi l vin pòv. Donk li saj pou nou koute Kreyatè nou an. Li vle nou rekòlte anpil bon bagay, sa gen ladan l “viv nan lapè.” — Sòm 119:165.

Nou soufri paske n ap viv nan “dènye jou yo”

“Nan dènye jou yo [...] moun yo ap renmen pwòp tèt yo, y ap renmen lajan [...] y ap dezobeyi paran yo [...] y ap san metriz, y ap sovaj, yo pap renmen sa ki byen.” — 2 TIMOTE 3:1-5.

Jodi a, anpil moun aji egzakteman jan vèsè sa yo te predi sa. Konpòtman moun sa yo se yon prèv klè ki montre n ap viv nan “dènye jou” monn sa a. Labib te predi tou nan epòk nou an t apral gen lagè, rate manje, gwo tranblemanntè ak maladi (Matye 24:3, 7, 8; Lik 21:10, 11). Bagay sa yo lakòz anpil soufrans ak lanmò.