Ki Efè Teknoloji Genyen Sou: Pitit Ou Yo?

Anmenmtan tou, gen moun ki remake jèn ki pase anpil tan sou Entènèt yo gen tandans:

• vin depann de aparèy yo.

• viktim oswa fè mechanste sou Entènèt.

• gade pònografi, kit yo vle kit yo pa t gen entansyon fè sa.

SA W TA DWE KONNEN

DEPANDANS

Kèk aktivite sou Entènèt, tankou jwèt yo pa egzanp, gen tandans fè moun yo vin depann anpil de yo. E se pa yon aksidan. Men sa liv Reclaiming Conversation nan fè konnen: “Aplikasyon ki sou telefòn nou yo fèt pou kenbe nou sou telefòn yo”. Plis nou rete ap gade aplikasyon komèsyal yo, se plis moun k ap fè reklam yo ap fè pwofi.

FÈ YON TI REFLECHI: Èske pitit ou yo sanble rete kole anpil ak aparèy yo? Ki jan w ka ede yo pi byen sèvi ak tan yo? — EFEZYEN 5:15, 16.

MECHANSTE SOU ENTÈNÈT

Gen kèk moun lè yo sou Entènèt ki vin pi agresif, yo gen yon langaj ki sal e yo pa gen konsiderasyon pou santiman lòt moun, sa ki ka mennen nan mechanste.

Gen kèk moun ki mal sèvi ak rezo sosyal yo akoz yon dezi ki pa kòrèk yo genyen pou lòt moun renmen yo oswa pou yo vin popilè. Oswa si yon moun vin dekouvri yo pa t envite l nan kèk aktivite, tankou nan yon fèt, sa ka fè l santi kòmsi lòt moun ap fè l mechanste.

FÈ YON TI REFLECHI: Èske pitit ou yo montre yo pa janti lè yo sou Entènèt? (Efezyen 4:31). Ki jan yo santi yo lè moun pa envite yo nan yon aktivite?

PÒNOGRAFI

Entènèt vin fè l fasil pou moun jwenn enfòmasyon ki ka fè yo mal. Paran yo ta dwe sonje byenke yo ka triye enfòmasyon k ap vin jwenn pitit yo, sa pa vle di y ap ka bloke tout.

Jeneralman, yo sèvi ak telefòn entèlijan yo pou yo fè sèksting, sa ki gen ladan l voye oswa resevwa foto moun ki nan pozisyon ki pa kòrèk. Sa ka gen konsekans legal. Nan kèk ka, toudepan de lwa peyi yo ak laj moun ki enplike yo, moun ki voye sèksting yo konn koupab pou pònografi ak timoun.

FÈ YON TI REFLECHI: Ki jan w ka ede pitit ou pou l reziste ak tantasyon pou l gade oswa voye foto ki pa kòrèk ki gen rapò ak sèks sou Entènèt? — EFEZYEN 5:3, 4.

MEN SA W KA FÈ

BAY PITIT OU YO FÒMASYON

Se vre timoun yo ka abil nan sèvi ak teknoloji, men yo toujou bezwen fòmasyon. Liv anglè ki rele Indistractable a fè konnen lè yon paran bay pitit li yon telefòn entèlijan oswa yon lòt aparèy san yo poko gen konpetans pou yo sèvi avè l, li “tankou yon moun ki pa reflechi ki kite pitit li plonje tèt anba nan yon pisin san yo poko menm konn naje.”

Make sijesyon w ta renmen eseye yo oswa ekri pwòp ide pa w.

• Pale ak pitit mwen konsènan fason li ka byen konpòte l sou Entènèt

• Ede pitit mwen jere santiman l genyen lè yo mete l sou kote

• Fè tout sa m kapab pou m pwoteje pitit mwen kont move bagay sou Entènèt

• Tanzantan, verifye telefòn pitit mwen

• Fikse yon kantite tan pou pitit mwen sèvi ak telefòn nan chak jou

• Entèdi aparèy yo nan chanm pitit mwen lannuit

• Entèdi aparèy yo lè n ap manje ansanm