Chapit 95
Leson sou divòs ak sou lanmou pou timoun
NOU nan ane 33 epòk nou an, Jezi ak disip li yo sou wout pou y al asiste fèt Pak la nan Jerizalèm. Yo travèse pa lòt bò rivyè Jouden an e yo fè nan wout ki pase nan distri Pere a. Sa gen kèk semèn, pandan Jezi te Pere, yo te mande l pou l vin Jide paske zanmi l lan Laza te malad. Lè Jezi te Pere, li te pale ak Farizyen yo sou kesyon divòs la, e kounye a yo retounen sou kesyon an ankò.
Se pa tout Farizyen yo ki wè kesyon divòs la menm jan. Moyiz te di yon gason ka divòse ak madanm li si l jwenn “yon bagay ki endesan lakay li”. Gen moun ki kwè sa gen rapò sèlman ak lè yon madanm twonpe mari l. Men, gen lòt ki panse “yon bagay ki endesan” se kapab ti fot piti. “Se sa k fè, pou Farizyen yo teste Jezi, yo mande l: “Èske yon gason gen dwa divòse ak madanm li pou nenpòt ki rezon?” Kèlkeswa jan Jezi reponn, yo konnen l ap gen pwoblèm ak Farizyen ki pa wè bagay yo menm jan avè l yo.
Jezi reponn kesyon an avèk entèlijans, li pa kite opinyon moun enfliyanse l, men li fè referans ak jan maryaj la te ye okòmansman. Li mande yo: “Èske nou pa t li Sila a ki te kreye yo depi nan kòmansman an te fè yo gason ak fi, e li te di: ‘Se pou rezon sa a, yon gason ap kite papa l ak manman l, li pral atache ak madanm li, e yo de a ap vin yon sèl chè’? Konsa, yo pa de ankò, men yo se yon sèl chè. Kidonk, sa Bondye mete anba menm jouk, pinga lòm separe l.”
Jezi montre objektif Bondye te gen okòmansman se pou moun ki marye yo rete atache youn ak lòt, e yo pa dwe divòse. Se sa k fè Farizyen yo reponn: “Bon, poukisa Moyiz te mande pou gason an bay fi a yon papye divòs pou l divòse avè l?”
Li di yo: “Etandone nou gen tèt di, Moyiz te ban nou pèmisyon divòse ak madanm nou, men se pa konsa sa te ye okòmansman.” Annefè, lè Bondye te bay modèl pou maryaj la nan jaden Edenn nan, li pa t pran dispozisyon pou gen divòs.
Apre sa, Jezi di Farizyen yo: “M ap di nou sa: Nenpòt moun ki divòse ak madanm li, eksepte pou fònikasyon [an grèk, pòneya], e ki al marye ak yon lòt fi, moun sa a fè adiltè.” Konsa, li montre pòneya a, ki se imoralite seksyèl grav, se sèl rezon Bondye dakò pou moun divòse.
Disip yo rann yo kont maryaj ta dwe yon inyon ki kenbe nètale, se poutèt sa yo di: “Si se konsa sa ye pou yon gason ak madanm li, pito yon moun pa marye.” Pa gen dout nan sa, yon moun ki vle marye ta dwe reflechi seryezman sou sa maryaj la ye, sètadi yon inyon ki pèmanan!
Ansuit, Jezi pale sou seliba. Li esplike gen kèk gason ki gen pwoblèm depi nan vant manman yo, sa fè yo pa ka marye paske sèks yo pa devlope. Gen lòt moun, se moun ki chatre yo anba gwo soufrans, konsa yo vin pa kapab gen relasyon seksyèl. Finalman, gen moun ki elimine dezi yo genyen pou yo marye e pou yo gen relasyon seksyèl dekwa pou yo bay tout yo menm nan aktivite ki gen rapò ak Wayòm syèl la. Alafen, Jezi di: “Yon moun ki ka suiv pawòl sa a, [sètadi pou l ret selibatè,] li mèt suiv li.”
Kounye a, moun yo kòmanse mennen timoun piti yo genyen bay Jezi. Sepandan, disip yo kouri dèyè yo e yo eseye fè yo ale, sandout yo pa t vle Jezi gen strès san nesesite. Men Jezi di: “Kite timoun yo vin jwenn mwen, pa eseye bloke yo, paske se pou moun ki tankou yo wayòm Bondye a ye. Anverite m ap di nou sa: Si yon moun pa aksepte wayòm Bondye a tankou yon timoun piti, li pa gendwa antre ladan l.”
Se pa ti bèl leson Jezi bay la a! Pou nou aksepte Wayòm Bondye a, nou dwe imite imilite timoun yo genyen ak dispozisyon yo genyen pou yo aprann. Men, egzanp Jezi bay la montre tou ki jan li enpòtan sitou pou paran pase tan ak pitit yo. Kounye a, Jezi montre li gen lanmou pou timoun piti yo, li pran yo nan bra l e li beni yo. Matye 19:1-15; Detewonòm 24:1; Lik 16:18; Mak 10:1-16; Lik 18:15-17.
▪ Ki opinyon diferan Farizyen yo genyen sou divòs, e ki jan yo teste Jezi?
▪ Ki jan Jezi reponn Farizyen yo k ap chèche teste l, e ki sèl rezon li bay pou moun divòse?
▪ Poukisa disip Jezi yo di pito yon moun pa marye, e ki konsèy Jezi bay?
▪ Ki sa Jezi anseye nou nan fason li boule ak timoun piti?