Sa timoun yo bezwen nan men paran yo
TOUT manman ak tout papa patisipe nan yon evènman lèzòm pa ka fin konprann. Pou sa fèt, ni manman an ni papa a, yo chak bay yon pati nan yo menm. Kòm rezilta, yon moun vivan devlope nan vant manman an. Donk, li pa etonan lè yon tibebe fèt, pou moun pale de evènman sa a kòm yon “mirak”.
Natirèlman, lè yon moun fè pitit, responsablite l fèk kòmanse. Nan premye moman lavi tibebe a, li prèske depann nèt de lòt moun, men, toutpandan l ap grandi, li bezwen plis pase swen fizik. Li bezwen yo ede l devlope mantalman, sikolojikman, moralman e espirityèlman.
Pou timoun yo rive byen devlope nan tout domèn sa yo, yo sitou bezwen pou paran yo renmen yo. Menmsi li enpòtan pou paran yo di yo renmen yo, li enpòtan tou pou yo poze aksyon ki kore sa y ap di yo. Annefè, timoun yo bezwen paran k ap bay bon egzanp. Yo bezwen gid moral, yo bezwen prensip pou dirije lavi yo. E yo bezwen bagay sa yo depi lè yo toupiti. Si nou pa pran bonè, timoun yo ka tonbe nan tèt chaje, e sa deja rive.
Pi bon prensip ki egziste se nan Bib la yo ye. Enstriksyon ki baze sou Bib la gen avantaj ladan l nou pap jwenn okenn lòt kote. Grasa enstriksyon sa yo, timoun yo pran konsyans sa y ap di yo a, se pa pawòl moun, men se pawòl Kreyatè yo a, Papa yo ki nan syèl la. Sa bay konsèy yo resevwa a yon fòs ki pa gen tankou l.
Bib la ankouraje paran yo pou yo fè anpil efò pou yo mete prensip ki dwat nan lespri pitit yo. Sepandan, ofiramezi timoun yo ap grandi, souvan paran yo twouve li difisil pou yo abòde yon seri pwen ki esansyèl ak pitit yo. Liv sa a, Koute gran Anseyan an, fèt toutespre pou anpeche yon sitiyasyon konsa devlope. Grasa liv sa a, ou menm ak pitit ou ap gen posiblite li yon seri sijè espirityèl ansanm. Men anplis de sa, liv sa a pral ankouraje jèn yo ak moun k ap li liv la avèk yo, pou yo fè ti pale youn ak lòt.
W ap remake liv la sèvi ak anpil kesyon ki apwopriye pou l ankouraje timoun nan patisipe. N ap wè yon tirè (—) apre kesyon sa yo. Se yon siy k ap fè nou sonje pou nou fè yon poz, e pou nou kite timoun nan di sa l panse. Timoun yo renmen santi y ap patisipe nan sa k ap fèt la. Si yo pa patisipe, yon ti moman yo pap enterese ankò.
Kesyon sa yo ap ede w konn sa ki nan panse timoun nan, e se sa ki pi enpòtan. Se vre, sa ka rive timoun nan bay kèk repons ki pa kòrèk. Men, sa ki ekri apre chak kesyon yo ap ede l aprann rezone.
Gen yon aspè espesyal nan liv la: li gen plis pase 230 foto. Pifò ladan yo gen kesyon pou timoun nan reponn, e kesyon sa yo baze sou sa l sot wè ak sa l sot li. Donk, egzamine foto yo ansanm. Sa kapab yon bon èd k ap pèmèt nou ensiste sou pwen ki pi enpòtan nou sot wè yo.
Depi timoun nan konn li, ankouraje l pou l li liv la avè w e pou l fè sa poukont li tou. Plis l ap li nan liv la, se plis bon konsèy ki ladan l yo ap rantre nan lespri l ak nan kè l. Men, pou w ranfòse afeksyon ak respè ant ou menm ak pitit ou, ou dwe li liv la ansanm avè l, e ou dwe fè sa regilyèman.
Nan yon fason w a di moun pa t ap kapab imajine sa gen kèk dizèn ane sèlman, jodi a, timoun yo ekspoze anba imoralite seksyèl, espiritis ak lòt vye zak sal. Se sa k fè yo bezwen pwoteksyon, e se nan sans sa a liv sa a se yon èd, e li fè sa yon fason ki kòrèk e ki senp. Sepandan, timoun yo sitou bezwen pou yo oryante yo bò kote Jewova Dye, Papa nou ki nan syèl la, Li menm ki Sous tout sajès. Se sa Jezi, gran Anseyan an te toujou fè. Nou espere ak tout kè nou liv sa a pral ede ou menm ak fanmi w pou nou mennen lavi nou yon fason pou nou fè Jewova plezi, e konsa, n ap jwenn benediksyon etènèl.