“Yo tout vin ranpli ak lespri sen”

1. Pale de anbyans ki genyen nan jou fèt Pannkòt la.

LARI Jerizalèm chofe, gen anpil mouvman k ap fèt ladan la. Lafimen ap monte sot nan lotèl tanp lan toutpandan Levit yo ap chante pawòl ki nan Sòm 113 rive nan Sòm 118 yo pou yo fè louwanj pou Jewova. Sanble lè y ap chante louwanj sa yo, gen yon gwoup k ap chante e gen yon lòt gwoup k ap reponn. Lari Jerizalèm chaje moun ki sot nan lòt zòn ki vin vizite vil la. Yo soti nan yon seri zòn ki byen lwen tankou Elam, Mezopotami, Kapadòs, Pon, Ejip ak Wòmb. Ki sa k mennen yo Jerizalèm? Fèt Pannkòt la. Yo rele fèt sa a tou ‘Jou premye danre yo’. (Nonb 28:26.) Yo fè fèt sa a chak ane pou montre rekòt lòj la fini e rekòt ble a ap kòmanse. Se yon moman ki bay anpil kè kontan!

2. Ki bagay estrawòdinè ki rive nan Pannkòt ane 33 epòk nou an?

² Kounye a, li anviwon nevè dimaten, gen yon bagay ki rive nan bèl jounen sa a nan sezon prentan ane 33 epòk nou an k ap rete yon mèvèy pou moun nan syèk k ap vin apre yo. Bridsoukou, “gen yon bri ki sot nan syèl la ki tankou bri yon gwo van ki pase rapid” oswa ki “tankou yon gwo van k ap soufle”. (Tra. 2:2; Bib Kreyòl La.) Gwo bri sa a gaye nan yon kay kote anviwon 120 disip Jezi reyini. Apre sa, gen yon bagay estrawòdinè ki rive. Gen yon bann lang, ki tankou dife, ki parèt, e youn al poze sou tèt chak disipc. Disip yo vin “ranpli ak lespri sen” e yo kòmanse pale nan lòt lang. E lè disip yo kite kay la, yo kapab pale ak moun yo rankontre nan lari ki vin vizite Jerizalèm yo. Sa fè moun yo sezi! Anfèt, chak moun sa yo tande disip yo “k ap pale nan lang pa yo”. — Tra. 2:1-6.

3. a) Poukisa nou ka di sa ki te pase nan Pannkòt ane 33 epòk nou an se yon evènman ki trèzenpòtan nan istwa vrè adorasyon an? b) Ki rapò diskou Pyè a te genyen ak itilizasyon “kle Wayòm” yo?

³ Istwa sa a ki trè enteresan dekri yon evènman ki trèzenpòtan nan istwa vrè adorasyon an, se nasyon ki rele Izrayèl Bondye a ki vin egziste, sètadi kongregasyon ki fòme ak kretyen Bondye chwazi pou al nan syèl la (Gal. 6:16). Men, se pa sa sèlman nou aprann ladan l. Lè Pyè te pale ak foul moun ki te reyini nan jou sa a, li te itilize premye nan twa “kle Wayòm” yo. Chak kle t ap pèmèt yon gwoup moun diferan jwenn yon seri privilèj espesyal (Mat. 16:18, 19). Premye kle l te itilize a te pèmèt Juif yo ak pwozelit yo, sètadi moun ki konvèti nan relijyon Juif yo, aksepte bon nouvèl la e li te pèmèt yo resevwa lespri sen pou montre Bondye chwazi yo pou y al nan syèld. Konsa, yo te vin fè pati Izrayèl Bondye a, e antanke moun ki fè pati nasyon sa a, yo t ap gen posiblite pou yo dirije antanke wa ak prèt nan Wayòm Kris la (Rev. 5:9, 10). Rive yon lè, gen lòt gwoup moun toujou ki t apral gen menm privilèj sa a: Samariten yo ak moun lòt nasyon yo. Ki sa kretyen yo jodi a ka aprann nan evènman estrawòdinè sa a ki te pase nan Pannkòt ane 33 epòk nou an?

“Yo tout te ansanm menm kote a” (Travay 2:1-4)

4. Sa k fè nou ka di kongregasyon kretyen nan epòk nou an se yon pwolonjman kongregasyon ki te pran nesans nan ane 33 epòk nou an?

⁴ Kongregasyon kretyen an te derape ak anviwon 120 disip, ki te “ansanm menm kote a”, nan yon chanm aletaj, e ki te resevwa lespri sen, sa ki te montre Bondye chwazi yo pou y al nan syèl (Tra. 2:1). Men, tan pou jounen an te fini, te deja gen plizyè milye moun ki te batize pou yo vin fè pati kongregasyon sa a. Se te kòmansman yon gwo akwasman. Òganizasyon Jewova a t apral kontinye grandi rive jis nan epòk nou an. Vrèmanvre, jodi a, gen yon bann gason ak fi ki gen lakrentif pou Bondye ki fòme kongregasyon kretyen nan epòk nou an, e Bondye itilize yo pou yo “preche bon nouvèl [...] konsènan Wayòm nan sou tout tè a, kòm yon temwayaj pou tout nasyon” anvan lafen sistèm sa a rive. — Mat. 24:14.

5. Ki benediksyon moun te jwenn nan premye syèk la nou menm tou nou jwenn nan kongregasyon kretyen an jodi a?

⁵ Anplis de sa, kongregasyon kretyen an se yon kote moun ki ladan l yo, ni moun Bondye chwazi pou al nan syèl la ni moun ki vin fè pati “lòt mouton” yo, jwenn fòs pou yo kenbe bon relasyon yo gen ak Bondye (Jan 10:16). Lè Pòl te ekri kretyen ki t ap viv Wòm yo, li te montre jan li apresye fason moun ki fè pati kongregasyon an te soutni youn lòt. Men sa l te di: “Se pa ti anvi m anvi wè nou pou m ka fè nou jwenn kèk benediksyon ki soti nan Bondye, dekwa pou nou ka vin fèm. Ann di pito, pou youn ka ankouraje lòt, pou chak moun jwenn ankourajman nan lafwa lòt, ni nan pa nou, ni nan pa m.” — Wom. 1:11, 12.

6, 7. Ki jan moun ki fè pati kongregasyon kretyen an jodi a ap fè travay Jezi te ba yo pou yo preche bon nouvèl la nan tout nasyon?

⁶ Jodi a, kongregasyon kretyen an gen menm objektif li te genyen nan premye syèk la. Jezi te bay disip li yo yon travay pou yo fè, se yon travay ki t ap ba yo anpil kè kontan malgre pwoblèm yo t ap gen pou yo rankontre. Li te di yo: “Fè disip pami moun tout nasyon. Batize yo nan non Papa a, nan non Pitit la ak nan non lespri sen an. Anseye yo pou yo obsève tout bagay mwen te ban nou lòd pou nou fè yo.” — Mat. 28:19, 20.

⁷ Jewova itilize kongregasyon kretyen Temwen Jewova yo pou yo fè travay sa a jodi a. Nòmalman, se yon defi sa ye pou yo rive preche moun ki pale divès lang bon nouvèl la. Men, Temwen Jewova yo pwodui piblikasyon ki baze sou Bib la nan plis pase 1 000 lang. Si w se yon moun ki asiste reyinyon regilyèman ak Temwen Jewova yo e si w ap patisipe nan travay predikasyon Wayòm nan ak nan travay fè disip la, ou gen anpil rezon pou w gen kè kontan. Ou fè pati yon gwoup moun ki parèt piti, lè n konsidere kantite moun k ap viv sou tè a jodi a, men, ki gen privilèj pou yo bay yon temwayaj konplè pou non Jewova.

8. Ki èd nou jwenn nan kongregasyon an?

⁸ Pou Jewova ka ede nou andire avèk jwa nan dènye jou difisil sa yo, li ban nou yon fanmi frè ak sè nan lemonnantye. Gade sa Pòl te ekri kretyen ebre yo: “Annou voye je youn sou lòt, pou youn pouse lòt gen lanmou, pou youn pouse lòt fè bèl aksyon, san nou pa abandone reyinyon nou, jan se abitid kèk moun, men annou youn ankouraje lòt, e se pou n fè sa plis toujou, vin jwenn nou wè se pwoche jou a ap pwoche.” (Ebre 10:24, 25). Kongregasyon kretyen an se yon kado Jewova ba ou ki pèmèt ou ankouraje lòt moun e ki pèmèt yo ankouraje w tou. Ou dwe rete pwòch frè ak sè w yo ki nan kongregasyon an. Pinga w janm abandone reyinyon yo!

“Yo chak te tande [...] lang pa yo” (Travay 2:5-13)

9, 10. Ki jan kèk moun bay tan yo ak fòs yo pou yo pote mesaj Wayòm nan bay moun ki pale lòt lang?

⁹ Eseye imajine bèl anbyans byen chofe ki te vin genyen nan mitan Juif yo ak moun ki konvèti nan relijyon Juif yo ki te reyini ansanm nan Pannkòt ane 33 epòk nou an. Sanble pifò nan moun ki te la yo te pale grèk oswa ebre. Men kounye a, “yo chak te tande disip yo k ap pale nan lang pa yo”. (Tra. 2:6.) Pa gen dout nan sa, sa te touche kè moun sa yo lè yo te tande bon nouvèl la nan lang manman yo. Se vre, Jewova pa fè yon mirak jodi a pou l fè kretyen yo pale lòt lang yo pa konnen, men, anpil ladan yo bay tan yo ak fòs yo pou yo pote mesaj Wayòm nan bay moun ki nan tout nasyon. Ki jan yo fè sa? Genyen ki aprann yon lòt lang yon fason pou yo bay koutmen nan kongregasyon ki toupre yo ki pale lang sa a oswa menm yo deplase al nan yon peyi etranje. Byen souvan, yo remake moun yo rankontre yo konn sezi lè yo wè efò yo fè pou ede yo.

¹⁰ Annou pran egzanp Christine ki te aprann lang goujarati ansanm ak sèt lòt Temwen Jewova. Yon lè, li te kwaze ak yon dam nan travay li ki pale goujarati, li te salye l nan lang sa a. Dam nan te sezi e li te vle konnen poukisa Christine t ap fè efò pou l aprann yon lang ki difisil tankou goujarati. Konsa, Christine te rive ba li yon bon temwayaj. Dam nan te di Christine: “Sandout, ou gen yon bagay enpòtan pou w di.”

11. Ki jan nou ka prepare nou pou nou preche moun ki pale yon lòt lang mesaj Wayòm nan?

¹¹ Nòmalman, se pa tout moun ki ka aprann yon lòt lang. Men, nou ka prepare nou pou nou preche moun ki pale yon lòt lang mesaj Wayòm nan. Ki jan nou ka fè sa? Yon fason nou ka fè sa se lè nou byen itilize aplikasyon JW Language® la pou n aprann yon fason senp ki jan pou n salye moun yo nan yon lang yo pale nan zòn nou an. Nou ka aprann tou kèk fraz nan lang sa a pou ede moun ki pale lang sa a vin enterese nan mesaj la. Ankouraje yo ale sou jw.org, e petèt ou ka montre yo divès kalite videyo ak piblikasyon yo kapab jwenn nan lang yo a. Lè w itilize zouti sa yo nan travay predikasyon an, ou ka gen kè kontan menm jan frè ak sè nou yo nan premye syèk la te gen kè kontan lè “chak” moun ki te soti nan anpil lòt peyi te sezi tande bon nouvèl la “nan lang pa yo”.

“Pyè [...] leve kanpe” pou l pale (Travay 2:14-37)

12. a) Ki jan pwofèt Jowèl te pale de mirak ki te fèt nan Pannkòt ane 33 epòk nou an? b) Ki sa k fè yo te atann pou pwofesi Jowèl la te gen yon akonplisman nan premye syèk la?

¹² “Pyè [...] leve kanpe” pou l te pale ak foul moun yo ki soti nan plizyè nasyon (Tra. 2:14). Li te esplike tout moun ki t ap koute l yo se yon mirak Bondye fè pou l pèmèt disip yo pale lòt lang pou l ka akonpli pwofesi li te bay pa mwayen pwofèt Jowèl la. Men sa pwofesi a te di: “M ap vide lespri m sou tout kalite moun.” (Jow. 2:28). Anvan Jezi te monte nan syèl la, men sa l te di disip li yo: “M ap mande Papa a, e l ap ban nou yon lòt èd.” Jezi te di èd sa a se ‘lespri a’. — Jan 14:16, 17.

13, 14. Ki efò Pyè te fè pou l rive touche kè moun k ap koute l yo, e ki jan nou ka imite l?

¹³ Lè Pyè t ap fini diskou l la, li te pale yon fason fèm ak foul moun yo, li te di yo: “Se pou tout nasyon Izrayèl la konn sa byen: Jezi nou te kloure sou poto pou l mouri a, Bondye te fè l vin Seyè, e li te fè l vin Kris.” (Tra. 2:36). Se vre, pifò moun ki t ap koute diskou Pyè a pa t la lè yo te kloure Jezi sou poto soufrans lan. Men, yo te koupab paske tout nasyon an te responsab zak sa a. Toutfwa, li bon pou nou note apot Pyè te pale ak Juif parèy li yo ak anpil respè e li te chèche touche kè yo. Objektif Pyè se te pouse moun yo repanti, se pa t chèche kondane yo. Èske moun yo te fache poutèt sa Pyè te di yo a? Non, ditou! Olye de sa, yo te “santi kè yo [ap] fann”. Yo te mande: “Ki sa nou dwe fè?” Sanble, lefètke Pyè te abòde sijè a yon fason ki te demontre li gen respè pou moun yo, sa te ede l touche kè anpil moun, e konsa yo te wè yo dwe repanti. — Tra. 2:37.

¹⁴ Nou ka imite fason Pyè te chèche touche kè moun ki t ap koute l yo. Lè n ap preche, nou pa bezwen chèche korije chak pawòl moun nou rankontre a di ki depaman ak sa Bib la di. Okontrè, n ap pi byen fè si nou pale sou pwen nou toule de a dakò sou yo. Lè nou jwenn yon pwen nou menm ak moun nan dakò sou li, nou kapab sèvi ak Pawòl Bondye a pou nou rezone ak moun nan sou pwen sa a avèk respè. Byen souvan, lè nou prezante verite ki nan Bib la fason sa a e nou montre nou gen respè pou moun yo, moun ki gen bon kè yo ka pi byen reyaji devan mesaj Wayòm nan.

“Se pou nou chak batize” (Travay 2:38-47)

15. a) Ki sa Pyè te di, e ki fason moun yo te reyaji? b) Kòman sa te fè posib pou plizyè milye moun ki te tande bon nouvèl la nan jou Pannkòt la te kalifye pou yo batize nan menm jou a?

¹⁵ Nan bèl jounen Pannkòt ane 33 epòk nou an, Pyè te di Juif ak moun ki konvèti nan relijyon Juif yo ki te byen reyaji yo: “Se pou nou repanti, e se pou nou chak batize.” (Tra. 2:38). Kòm rezilta, te gen anviwon 3 000 moun ki te batize, petèt nan plizyè pisin ki te nan vil Jerizalèm oswa ki te toupre Jerizalème. Èske se yon aksyon yo te fè sou kout tèt? Èske istwa sa a ka sèvi kòm baz pou montre moun k ap etidye Labib yo ak timoun ki gen paran yo ki kretyen ka kouri batize san yo pa pare pou sa? Non. Nou dwe sonje Juif ak pwozelit sa yo ki te batize nan jou Pannkòt ane 33 epòk nou an se te moun ki te renmen etidye Pawòl Bondye a, e yo te fè pati yon nasyon Jewova te mete apa pou li. Anplis de sa, yo te deja demontre yo zele pou Jewova, e gen kèk ladan yo ki te konn vwayaje sot byen lwen pou yo vin nan fèt sa a ki konn fèt chak ane. Apre yo te fin aksepte verite enpòtan konsènan wòl Jezi Kris jwe nan akonplisman objektif Bondye, yo te prè pou yo kontinye sèvi Jewova, men kounye a, antanke disip Kris ki batize.

16. Ki jan kretyen ki t ap viv nan premye syèk la te montre yo dispoze fè sakrifis?

¹⁶ Li klè, Jewova te beni gwoup moun sa yo. Men sa Bib la di: “Tout moun ki te vin kwayan yo te ansanm e yo te pataje tout bagay ansanm. Yo te vann tè yo ak lòt bagay yo te genyen, e yo te separe kòb la bay tout moun ki te nan bezwen.f” (Tra. 2:44, 45). Pa gen dout nan sa, tout vrè kretyen ap byen kontan imite kretyen sa yo ki te demontre lanmou e ki te dispoze fè sakrifis.

17. Ki sa ki nesesè pou yon moun fè pou l ka batize?

¹⁷ Pou yon moun vwe lavi l bay Bondye e pou l batize, gen plizyè bagay Labib montre li dwe fè. Li dwe gen konesans sou Pawòl Bondye a (Jan 17:3). Li dwe demontre li gen lafwa e li dwe repanti parapò ak fason li te konn aji anvan, sa vle di li dwe vrèman regrèt li te konn aji yon fason ki kontrè ak prensip Bondye yo (Tra. 3:19). Ansuit, li dwe konvèti, oswa kase tèt tounen, epi kòmanse fè sa ki dwat, sètadi bagay ki ann amoni ak volonte Bondye (Wom. 12:2; Efe. 4:23, 24). Apre l fin fè pa sa yo, l ap vwe lavi l bay Bondye nan yon priyè epi l ap ka batize. — Mat. 16:24; 1 Pyè 3:21.

18. Ki privilèj yon moun ki vin disip Kris e ki batize genyen?

¹⁸ Èske w se yon disip Kris ki vwe lavi w bay Bondye e ki batize? Si se sa, ou dwe gen rekonesans pou gwo privilèj sa a ou genyen an. Menm jan ak premye disip yo ki te ranpli ak lespri sen, Jewova ka itilize w anpil pou w bay yon temwayaj konplè sou Wayòm li an e pou w fè volonte l.