Jewova te bay Eli fòs

Lè Jezabèl te tande sa k te rive pwofèt Baal yo, li te fache anpil. Li voye yon mesaj pou Eli. Li di l: ‘Demen, w ap mouri menm jan ak pwofèt Baal yo.’ Pwofèt Eli te vin pè anpil, li te kouri al nan dezè a. Pwofèt Eli te priye, li te di: ‘Jewova, mwen pa kapab ankò. Ou mèt kite m mouri.’ Eli te tèlman fatige, dòmi te pran l anba yon pyebwa.

Gen yon zanj ki te vin reveye l e ki te byen pale avè l. Li di l: ‘Leve pou w manje.’ Eli te wè yon gwo pen won sou wòch yo chofe, epi li te wè yon bidon dlo. Li manje, li bwè, epi li retounen al dòmi. Zanj lan te reveye l ankò epi l di l: ‘Se pou w manje, w ap bezwen fòs pou vwayaj la.’ Se konsa, Eli te manje ankò. Epi, li te fè 40 jou ak 40 nuit ap vwayaje jis li rive sou Mòn Orèb. Lè Eli rive sou mòn nan, li antre nan yon gwo twou wòch pou l al dòmi. Men, Jewova te vin pale avè l. Li di l: ‘Ki sa w ap fè isit la Eli?’ Eli reponn: ‘Izrayelit yo pa respekte pwomès yo te fè w la. Yo kraze lotèl ou yo e yo touye pwofèt ou yo. Kounye a, men yo dèyè touye m tou.’

Jewova di l: ‘Al kanpe sou mòn nan.’ Lè sa a, gen yon gwo van ki te soufle bò gwo twou wòch la. Apre gwo van an, te vin gen yon tranblemanntè ak yon dife. Alafen, Eli tande yon vwa ki kalm, k ap pale tou ba. Li kouvri figi l ak rad li e l al kanpe pa deyò gwo twou wòch la. Epi, Jewova mande l pou ki rezon li te kouri ale. Pwofèt Eli di: ‘Se sèl mwen ki rete.’ Men, Jewova di l: ‘Ou pa poukont ou. Gen 7 000 moun ann Izrayèl k ap adore m toujou. Ale, chwazi Elize pou l ranplase w kòm pwofèt.’ Menm moman an, Eli al fè sa Jewova te di l la. Èske w panse Jewova ap ede w tou lè w fè sa l di w fè? Wi, l ap fè sa. Annou wè sa k te rive yon lè pandan sechrès la.