Jewova te pran pasyans ak Jonas

Moun yo te mechan anpil nan vil Niniv, nan peyi Asiri. Jewova te di pwofèt Jonas pou l al Niniv pou l avèti moun yo yo dwe chanje fason y ap viv. Men, Jonas te kouri fè yon lòt wout. Li te monte yon bato ki t apral Tasis e bato a te kòmanse vwayaj la.

Pandan bato a sou lanmè, te vin gen yon gwo tanpèt, e maren yo te pè anpil. Yo te priye dye yo t ap sèvi yo, yo t ap mande: ‘Poukisa sa rive nou?’ Alafen, Jonas di yo: ‘Se fòt mwen. M ap kouri pou m pa fè sa Jewova mande m fè. Jete m nan lanmè a e tanpèt la ap sispann.’ Maren yo pa t vle lage Jonas nan lanmè a, men li te fòse yo. Lè yo lage l nan lanmè, tanpèt la sispann.

Jonas te panse li t apral mouri. Tank li t ap plonje desann pi fon nan lanmè a, li t ap priye Jewova. Epi, Jewova voye yon gwo gwo pwason. Gwo pwason an vale Jonas, men Jonas pa t mouri. Pandan Jonas anndan pwason an, li priye Bondye, li di l: ‘Mwen pwomèt pou m toujou obeyi w.’ Jewova te pwoteje Jonas anndan pwason an pandan twa jou, e l fè pwason an vomi Jonas sou tè sèk.

Piske Jewova sove lavi Jonas, èske sa vle di Jonas pa bezwen al Niniv ankò? Non. Yon lòt fwa ankò, Jewova mande Jonas pou l al Niniv. Fwa sa a, Jonas obeyi. Li t ale nan vil Niniv, e li di moun mechan yo: ‘Nan 40 jou, Bondye ap detwi Niniv.’ Epi, gen yon bagay dwòl ki te rive: moun Niniv yo te koute mesaj li a e yo te chanje fason yo t ap viv. Wa Niniv la te di pèp li a: ‘Se pou n rele Bondye, e se pou n repanti. Petèt li pap detwi nou.’ Lè Jewova wè moun yo repanti, li pa detwi Niniv.

Jonas te fache lè l wè Bondye pa detwi vil la. Imajine sa! Jewova te pran pasyans ak Jonas e l te fè l mizèrikòd, men, Jonas pa t gen mizèrikòd pou moun Niniv yo. Olye de sa, l al chita pa deyò vil la anba yon pye kalbas kouran e l lonje bouch li. Apre sa, plant lan mouri, e Jonas te vin fache. Epi, Jewova di l: ‘Gade ki jan kè w plis fè w mal pou plant lan pase pou moun Niniv yo. Mwen te gen mizèrikòd pou yo, se sa k fè yo pa mouri.’ Ki sa l te vle di Jonas? Moun Niniv yo te gen plis enpòtans pase nenpòt plant.