Sa k ap pase konsa nan òganizasyon k ap fè zèv yo ?
AAPRE atak ki te fèt 11 septanm 2001 nan vil Nouyòk ak Wachintonn, D.C a, sa te estrawòdinè pou wè jan èd t ap sot tribòbabò pou moun ki te viktim nan trajedi a. Pa t gen kote ankò pou òganizasyon k ap fè zèv yo te mete don yo te resevwa pou ede fanmi viktim yo, don ki egal 2,7 milya dola ameriken. Gwo dezas sa a te fè tristès anvayi moun toupatou e yo te vle bay èd yo.
Sepandan, sa pa t pran tan pou kèk moun vin fache lè yo aprann gen gwo òganizasyon k ap fè zèv ki fè chemen kwochi ak lajan yo. Sa te fè yon pakèt eskandal lè te gen yon rapò ki fè konnen gen yon gwo òganizasyon ki te planifye pou l kenbe prèske mwatye nan 546 milyon dola ameriken li te resevwa, pou l itilize l nan lòt domèn. Malgre apre sa òganizasyon an te tounen sou desizyon l e l te prezante eskiz, men sa yon repòtè te di : “ Moun k ap fè kritik yo konsidere jan evènman sa yo vin vire a se tankou m ta di w se lè chwal fin pase y ap rele fèmen baryè. Donk, li twò ta pou òganizasyon sa a rejwenn konfyans ” moun te gen nan li anvan atak la. E ou menm ? Èske konfyans ou te genyen nan òganizasyon k ap fè zèv yo te vin boulvèse sa pa gen twò lontan ?
Èske sa itil oswa se gaspiyaj ?
Jeneralman, yo konsidere sa gen anpil merit pou yon moun bay òganizasyon k ap fè zèv yo kèk don. Men, se pa tout moun ki wè l konsa. Gen plis pase 200 ane, yon eseyis anglè ki rele Samuel Johnson te ekri : “ Ou gen plis asirans ou fè yon bon bagay lè, kòm rekonpans, ou peye moun pou travay li fè olye ou annik ba l yon lajan kòm kado. ” Jodi a, gen kèk moun ki gen menm retisans lan, e rapò ki fè konnen gen òganizasyon k ap mal itilize oswa k ap mal jere don yo resevwa diminye konfyans piblik la gen nan yo. Annou konsidere de egzanp ki fèk pase.
Nan zòn Sann Fransisko, yo te revoke direktè yon òganizasyon relijye k ap fè zèv poutèt li ta voye fakti nan òganizasyon l lan pou yo remèt li kòb pou depans chiriji estetik li te fè ak depans 500 dola ameriken pa semèn sou yon peryòd de ane pou manje l te manje nan restoran. Nan zòn Grann Bretay òganizatè yon gwo maraton yo t ap fè nan televizyon pou fè zèv, te santi yo anbarase lè gen moun ki te dekouvri nan 6,5 milyon liv (anviwon 10 milyon dola ameriken) yo te voye ba yo pou ede yo konstwi òfelina nan peyi Woumani, se 12 kay tou pa anfòm yo te konstwi, e san konte te gen plizyè santèn milye dola ki fè fon. Rapò negatif tankou sa yo vin fè kèk moun k ap fè don gen rezon pran plis prekosyon sou konbyen pou yo bay e kiyès pou yo bay.
Bay oswa pa bay ?
Sepandan, se ta regretan pou n kite aksyon kèk moun oswa kèk òganizasyon fè n pèdi bonjan enterè ak konpasyon nou genyen pou lòt yo. Men sa Labib di : “ Adorasyon ki pwòp e ki san tach selon Bondye Papa nou an, men li : pran swen òfelen yo ak vèv yo nan tribilasyon yo. ” (Jak 1:27). Wi, fè kichòy pou ede pòv ak moun ki defavorize se yon pati fondamantal nan krisyanis la.
Toutfwa, ou kapab ap mande tèt ou : ‘ Èske m dwe kontinye bay òganizasyon k ap fè zèv yo oubyen èske tou senpleman mwen dwe eseye ede moun pèsonèlman ? ’ Ki kalite don Bondye ap tann nou fè ? Atik ki vin apre a pral pale sou kesyon sa yo.