Èske nou ka viv ak kè kontan depi kounye a?
GEN yon jou k ap vini kote pap gen okenn moun k ap ni malad, ni vyeyi, ni mouri ankò! Ou kapab la lè sa a tou! Sepandan, jodi a, lavi a chaje ak pwoblèm ak tètchaje. Donk, ki sa k ka ede w viv pi byen jodi a? Labib gen yon seri konsèy ki ka ede w viv ak kè kontan epi santi w satisfè depi kounye a. Ann egzamine kèk pwoblèm nou konn gen nan lavi a e ann gade ki jan Labib kapab ede nou.
KONTANTE NOU AK SA NOU GENYEN
Konsèy Bib la bay: “Se pou fason n ap viv pa gen lanmou pou lajan ladan l. Kontante nou ak sa nou genyen.” — Ebre 13:5.
Jodi a, moun yo montre nou dwe gen yon pil ak yon pakèt bagay pou n viv. Epoutan, Labib di n nou ka “kontante nou ak sa nou genyen”. Ki jan n ka fè sa?
Evite “gen lanmou pou lajan”. Etandone moun yo “gen lanmou pou lajan”, yo sakrifye sante yo, fanmi yo, zanmi yo, yo pase prensip moral yo anba pye, e yo pa bay diyite yo okenn valè (1 Timote 6:10). Sa pa vo lapèn! Dayè, moun ki renmen lajan “pap janm kontante” yo. — Eklezyas 5:10.
Bay moun valè, pa bay byen materyèl valè. Se vre, byen materyèl kapab itil yon moun. Men, yo pa ka ni renmen nou ni gen rekonesans pou nou; se moun sèlman ki ka fè bagay sa yo. Lè n gen “yon bon zanmi”, sa fè n gen plis kè kontan nan lavi a. — Pwovèb 17:17.
NOU KA VIV AK KÈ KONTAN DEPI KOUNYE A, SI NOU SUIV KONSÈY KI NAN BIB LA.
LÈ W AP FÈ FAS AK MALADI
Konsèy Bib la bay: “Kè kontan se bon remèd.” — Pwovèb 17:22.
Menm jan ak “bon remèd”, kè kontan ka ede nou fè fas ak maladi. Men, ki jan nou ka gen kè kontan lè n ap fè fas ak maladi?
Montre w gen rekonesans. Si nou ret ap reflechi sou pwoblèm nou genyen yo, “pa gen yon jou” k ap parèt bon pou nou (Pwovèb 15:15). Bib la mande n pito pou n “montre nou gen rekonesans”. (Kolosyen 3:15.) Aprann apresye bèl bagay ki gen nan lavi a, menmsi se bagay ki toupiti. Menm kèk bagay tankou yon bèl kouche solèy, yon bon ti van k ap soufle, yon souri yon moun pa w ba ou kapab fè w santi lavi w gen plis sans.
Ede lòt moun. Menm lè yon moun malad, l ap “pi kontan lè l bay pase lè l resevwa”. (Travay 20:35.) Lè lòt moun remèsye nou pou sa nou te fè, nou pi kontan e nou pa reflechi twòp sou pwoblèm nou yo. Nou kapab viv pi byen lè nou ede lòt moun viv pi byen.
FÈ MARYAJ NOU VIN PI SOLID
Konsèy Bib la bay: “Rekonèt bagay ki pi enpòtan yo.” — Filipyen 1:10.
Mari ak madanm ki pase sèlman yon ti tan toupiti ansanm ka kraze maryaj yo. Se sa k fè gen kèk mari ak madanm ki montre yo gen sajès lè yo bay maryaj yo priyorite, paske se youn nan bagay ki pi enpòtan nan lavi a.
Fè yon seri aktivite ansanm. Olye nou kontinye chèche enterè pa nou sèlman, poukisa nou pa planifye pou n fè yon seri bagay ansanm? Bib la di: “De pi bon pase youn.” (Eklezyas 4:9). Nou ka fè manje ansanm, fè spò ansanm, pran yon ti tan pou n bwè yon bagay ansanm oswa fè yon bagay kòm pastan ansanm.
Montre moun ou marye avè l la ou renmen l. Labib ankouraje yon mari ak madanm li pou youn renmen lòt e pou youn respekte lòt (Efezyen 5:28, 33). Lè youn souri bay lòt ak tout kè l, lè youn anbrase lòt avèk amou oubyen youn bay lòt ti kado, sa ka fè maryaj la vin pi solid. Nòmalman, moun ki marye yo dwe gen relasyon seksyèl sèlman ak moun yo marye avè l la. — Ebre 13:4.