Enfliyans lòt moun sou privilèj ou genyen pou w preche a
1 Enfliyans lòt moun se yon gwo fòs, swa an byen swa an mal. Lòt sèvitè Jewova parèy nou yo gen yon enfliyans pozitif sou nou ki pouse nou fè bèl zèv (Ebre 10:24). Sepandan, manm fanmi nou ki pa Temwen, kondisip lekòl, kòlèg travay, vwazen, oswa lòt moun nou konnen kapab fè presyon sou nou pou nou suiv yon chemen ki pa ann akò ak prensip kretyen yo. Yo kapab ‘ denigre bèl konduit nou genyen an relasyon ak Kris la. ’ (1 Pyè 3:16.) Ki jan pou nou kenbe detèminasyon nou pou nou kontinye preche malgre move enfliyans nou kapab sibi ?
2 Enfliyans manm fanmi : Pafwa, yon papa ki pa yon Temwen Jewova, kapab pa vle pou madanm li ak pitit li al preche. Te gen yon sitiyasyon konsa nan yon fanmi nan peyi Meksik. Madanm yon mesye ak sèt pitit yo te genyen te vin ap mache nan laverite. Okòmansman mesye a te opoze paske li pa t vle pou fanmi li ap preche kay an kay epi ap ofri liv. Li te santi sa te fè yo manke diyite. Sepandan, madanm nan ak timoun li yo te kenbe fèm nan desizyon yo pou yo sèvi Jewova e pou yo patisipe regilyèman nan ministè a. Avèk letan, mesye a te kòmanse apresye dispozisyon Bondye pran pou travay predikasyon an. Li menm tou li te vwe tèt li bay Jewova. Sa te pran li 15 an pou l asepte laverite, men èske li t ap janm fè sa si fanmi li pa t pèsevere nan privilèj yo genyen pou yo preche a ? — Lik 1:74 ; 1 Kor. 7:16.
3 Enfliyans kòlèg travay : Gen moun ki kapab pa byen akeyi efò w ap fè pou w preche kòlèg travay ou yo. Yon sè rakonte, te gen yon lè, yon diskisyon te pete sou lafendimonn nan biwo a. Yo te pase l nan rizib paske li te sijere yo pou yo al li Matye chapit 24. Sepandan detwa jou apre, youn nan kòlèg li yo te vin di l li te fè lekti chapit la e sa te touche l anpil. Sè a te plase l yon piblikasyon e li te pran dispozisyon pou li fè yon etid biblik avèk li ansanm avèk mari li. Premye seyans etid la te dire jiska dezè dimaten. Tousuit apre twazyèm seyans etid la, yo te kòmanse asiste reyinyon, apresa yo te sispann fimen, epi yo te kòmanse patisipe nan predikasyon. Èske sa ta rive fèt si sè nou an pa t fè efò pou l pataje esperans li a ak lòt moun ?
4 Enfliyans kondisip lekòl : Sa pa etranj pou jèn Temwen yo sibi presyon anba kanmarad lekòl yo epi pou yo pè pou lòt jèn yo pa rabese yo paske y ap patisipe nan travay predikasyon an. Yon jèn kretyèn Ozetazini te di : “ Mwen te krenn preche lòt jèn yo paske mwen te pè pou yo pa pase m nan rizib. ” Konsa li te evite preche kanmarad li yo ni nan lekòl la ni nan tèritwa a. Ki jan w kapab fè pou w ranmase fòs pou w reziste avèk kran kont enfliyans kanmarad ou yo ? Mete konfyans ou nan Jewova, chèche fè kè l kontan (Pwo. 29:25). Se pou w fyè de kapasite w genyen pou w sèvi ak Pawòl Bondye a nan ministè w (2 Tim. 2:15). Jèn nou sot pale a te kòmanse priye Jewova. Li te mande li pou l ede li devlope anvi pou l al pale ak kondisip lekòl li yo. Li te kòmanse bay temwayaj enfòmèl nan lekòl la. Li te jwenn bon rezilta, e apresa li te pran pale ak tout moun li konnen. Men konklizyon li te tire : “ Ti jèn sa yo gen bezwen, e yo vle gen yon espwa pou demen, Jewova sèvi avèk nou pou ede yo. ”
5 Enfliyans vwazen : Nou kapab gen vwazen oswa lòt moun nou konnen ki montre yo pa vle wè nou poutèt sa nou ye ak sa nou kwè. Si w pè sa yo panse, mande tèt ou : “ Èske yo konn laverite k ap mennen nan lavi etènèl la ? Ki sa m ka fè pou m touche kè yo ? ” Yon siveyan sikonskripsyon te konstate bon rezilta moun jwenn lè yo bay vwazen yo temwayaj ti moso pa ti moso. Sipliye Jewova pou w mande li fòs ak sajès ou bezwen an pou w kontinye chèche moun ki gen kè sensè yo. — Fil. 4:13.
6 Si nou sede anba move enfliyans, sa kapab fè opozan yo plezi, men èske lè nou fè sa nou nan enterè yo toutbonvre ? Èske sa nan enterè pa nou tou ? Moun ki te nan pwòp kominote pa Jezi yo pa t dakò ak li. Li te menm andire pawòl blesan anba bouch frè l kot manman l yo. Men li te konnen sèl fason li t ap kapab ede yo se suiv pou l suiv chemen Bondye te trase pou li a fidèlman. Konsa, Jezi “ te andire pawòl depaman pechè yo, kont pwòp enterè yo ”. (Ebre 12:2, 3.) Nou dwe fè menm bagay. Se pou w detèmine pou w byen sèvi ak privilèj ou genyen pou w preche mesaj Wayòm nan. Nan fè konsa, “ w ap sove tèt ou ansanm ak moun k ap koute w yo. ” — 1 Tim. 4:16.