Liv Revelasyon an: Nan ki sans li konsène w jodi a?

1-2. Bay youn nan rezon ki fè liv Revelasyon an ta dwe enterese n.

ÈSKE sa deja rive yon moun ba w gade yon albòm foto? Pandan w ap gad foto yo, ou rann ou kont ou pa rekonèt pifò moun. Sepandan, gen yon foto ki atire atansyon w. Sa k fè sa? Paske w nan foto a. Pandan w ap egzamine foto a, w ap eseye sonje ki lè e ki kote yo te pran l. W ap eseye wè tou si w konn lòt moun ki nan foto a. Foto sa a vin enterese w anpil.

² Liv Revelasyon an sanble ak foto sa a. Poukisa? Pou omwen de rezon. Premyèman, se pou nou yo te ekri liv sa a nan Bib la. Men sa nou li nan premye vèsè nan liv sa a: “Men yon revelasyon Bondye bay Jezi Kris pou l montre esklav li yo bagay ki gen pou rive talè konsa.” ​(Rev. 1:1). Donk, sa nou jwenn nan liv sa a, se pa pou tout moun nèt, men se pou nou menm ki vwe Bondye lavi nou. Antanke pèp Bondye, nou pa ta dwe sezi wè n ap patisipe nan reyalizasyon pwofesi nou jwenn nan bèl liv sa a. Donk, lè n ap li liv Revelasyon an, se kòmsi n wè tèt nou nan foto a.

3-4. Selon liv Revelasyon an, ki lè pwofesi ki ladan l yo t ap gen pou yo reyalize, e ki sa sa ta dwe pouse nou chak fè?

³ Dezyèm rezon ki fè n ta dwe enterese nan pwofesi ki nan liv Revelasyon an gen rapò ak moman y ap reyalize. Apot Jan, ki te gentan fin granmoun nan epòk li t ap ekri liv Revelasyon an, te fè konnen ki lè pwofesi sa yo t ap gen pou yo reyalize. Men sa l te di: “Pandan m te anba pouvwa lespri sen, mwen te vin twouve m nan jou Seyè a.” ​(Rev. 1:10). Lè Jan te ekri pawòl sa yo ozanviwon ane 96 epòk nou an, “jou Seyè a” potko prèt pou l rive (Mat. 25:14, 19; Lik 19:12). Men, dapre pwofesi ki nan Bib la, jou sa a te kòmanse an 1914 lè yo te tabli Jezi Wa nan syèl la. Depi lè sa a, pwofesi nou jwenn nan liv Revelasyon an, ki gen rapò ak pèp Bondye a, kòmanse reyalize. Pa gen dout nan sa, n ap viv nan “jou Seyè a”!

⁴ Piske n ap viv nan yon epòk ki vrèman estrawòdinè, antanke sèvitè Bondye, nou bezwen byen suiv bonjan konsèy ki nan Revelasyon 1:3 a ki di: “Byennere moun ki li pawòl ki nan pwofesi sa a awotvwa, e byennere moun ki koute pawòl sa yo e ki suiv sa ki ekri ladan yo, paske tan ki fikse a toupre rive.” Vrèmanvre, nou bezwen “li pawòl ki nan pwofesi sa a awotvwa”, nou bezwen “koute” pawòl sa yo e nou bezwen “suiv” yo. Ann wè kèk nan pawòl sa yo nou bezwen suiv.

CHÈCHE WÈ SI BONDYE AKSEPTE ADORASYON W AP BA LI A

5. Ki jan liv Revelasyon an montre jan l enpòtan pou n chèche wè si Jewova aksepte adorasyon n ap ba li a?

⁵ Depi nan premye chapit liv Revelasyon an, nou aprann Jezi byen konnen tout sa k ap pase nan kongregasyon yo (Rev. 1:12-16, 20; 2:1). Jezi te montre sa nan mesaj li te voye bay sèt kongregasyon ki te nan Azi Minè yo. Nan mesaj sa yo, li te bay kretyen premye syèk yo yon seri enstriksyon byen klè pou ede yo wè si Jewova aksepte adorasyon yo t ap ba li a. Anplis de sa, sa l te di nan mesaj sa yo konsène nou tout ki fè pati pèp Bondye a jodi a. Ki leson nou ka aprann? Kris Jezi, Chèf nou an, byen konnen si n gen bon relasyon ak Jewova. Jezi ap gide n e l ap pwoteje n, li wè tout sa k ap pase. Li konnen sa n bezwen fè pou n ka kontinye gen favè Jewova. Ki lòd li bay nou bezwen suiv jodi a?

6. a) Selon Revelasyon 2:3, 4, ki pwoblèm Jezi te di kretyen nan kongregasyon Efèz yo te genyen? b) Ki leson nou aprann nan sa?

⁶ Li Revelasyon 2:3, 4. Nou pa dwe pèdi lanmou nou te gen pou Jewova okòmansman an. Mesaj Jezi te bay kretyen nan kongregasyon Efèz yo montre yo te gen andirans e yo te kontinye sèvi Jewova malgre yo te jwenn anpil difikilte. Aktout sa, yo te pèdi lanmou yo te gen okòmansman an. Yo te bezwen fè efò pou yo te vin gen lanmou sa a ankò. Si yo pa t fè sa, Jewova pa t ap aksepte adorasyon yo t ap ba li a. Menm jan an tou jodi a, nou pa dwe annik andire sèlman. Nou bezwen andire pou bonjan rezon. Se pa sèlman sa nou fè ki enterese Bondye nou an, men, rezon ki pouse nou fè yon bagay enterese l tou. Rezon ki pouse nou aji gen anpil enpòtans pou li, paske li vle se bonjan lanmou ak rekonesans nou gen pou li ki fè nou adore l. — Pwo. 16:2; Mak 12:29, 30.

7. a) Selon Revelasyon 3:1-3, ki pwoblèm Jezi te wè kretyen nan kongregasyon Sad yo te genyen? b) Ki sa nou bezwen fè?

⁷ Li Revelasyon 3:1-3. Nou dwe ret je klè epi kontinye veye. Kretyen nan kongregasyon Sad yo te gen yon lòt pwoblèm. Byenke okòmansman yo te chofe nan sèvis yo t ap bay Bondye a, yo te vin ap fè neglijans. Se sa k fè Jezi te di yo pou yo “reveye”. Ki leson nou aprann nan sa? Se vre, Jewova pap bliye travay nou fè (Ebre 6:10). Sepandan, nou pa ka annik ret ap gade sou sa nou te deja fè nan sèvis Jewova a. Byenke nou gendwa pa ka fè tout sa n te konn fè anvan, men, nou bezwen kontinye ret okipe nan “travay Seyè a”, nou bezwen ret je klè epi kontinye veye jiska lafen. — 1 Kor. 15:58; Mat. 24:13; Mak 13:33.

8. Selon Revelasyon 3:15-17, ki leson nou aprann nan pawòl Jezi te di frè Lawodise yo?

⁸ Li Revelasyon 3:15-17. Nou dwe chofe nan adorasyon n ap bay Jewova a, e nou dwe met tout kè n ladan l. Mesaj Jezi te bay kretyen Lawodise yo te montre yo gen yon lòt pwoblèm. Yo te “tyèd” nan sèvis yo t ap bay Jewova a. Se poutèt sa Jezi te di yo yo nan yon eta ki “mizerab e ki fè moun gen pitye” pou yo. Yo te bezwen montre yo chofe nan adorasyon y ap bay Jewova a (Rev. 3:19). Ki leson nou aprann? Si nou wè nou pa vrèman chofe nan sèvis Bondye jan nou te chofe anvan an, nou bezwen montre nou gen plis rekonesans pou tout bon bagay Jewova ak òganizasyon l lan ban nou (Rev. 3:18). Nou pa t ap janm renmen vin distrè nan chèche mennen yon bèl vi, pou sa ta fè n neglije adorasyon n ap bay Jewova a.

9. Jan sa parèt nan mesaj Jezi te bay kretyen nan kongregasyon Pègam ak Tiyati yo, ki danje nou bezwen evite?

⁹ Nou pa dwe gen okenn kontak ak ansèyman aposta yo. Jezi te fè kèk kretyen nan kongregasyon Pègam ki t ap simen divizyon nan mitan frè yo kèk repwòch (Rev. 2:14-16). Li te felisite kretyen nan kongregasyon Tiyati ki te rete lwen “bagay pwofon Satan yo” e li te ankouraje kretyen sa yo pou yo “kenbe” laverite “fèm”. (Rev. 2:24-26.) Kretyen ki pa t fin djanm nan kongregasyon sa a ki te kite fo ansèyman pran tèt yo te bezwen repanti. E nou menm jodi a? Nou pa dwe gen okenn kontak ak kèlkeswa ansèyman ki pa ann amoni ak fason Jewova panse. Aposta yo ka “parèt gen atachman pou Bondye”, men, y ap aji “yon fason ki kontrè ak fòs atachman sa a”. (2 Tim. 3:5.) Li pi fasil pou n idantifye fo ansèyman yo e pou n rete lwen yo lè nou gen bon abitid pou n etidye Pawòl Bondye a. — 2 Tim. 3:14-17; Jid 3, 4.

10. Ki lòt leson nou ka aprann nan pawòl Jezi te di kongregasyon Pègam ak Tiyati?

¹⁰ Nou dwe kouri pou imoralite sou kèlkeswa fòm nan. Te gen yon lòt pwoblèm nan kongregasyon Pègam ak Tiyati. Jezi te blame kèk moun nan kongregasyon sa yo paske yo t ap fè imoralite seksyèl (Rev. 2:14, 20). Ki leson nou aprann? Nou pa ka atann pou Jewova tolere n ap fè imoralite sou kèlkeswa fòm nan, menmsi nou gen anpil ane depi n ap sèvi l e nou gen kèk privilèj kounye a (1 Sam. 15:22; 1 Pyè 2:16). Li atann pou n kontinye obeyi prensip moral wo nivo l yo, menmsi prensip monn nan ap vin pi mal chak jou. — Efe. 6:11-13.

11. Ki sa n aprann jiska prezan? (Gade kare ki gen tit “Leson pou nou jodi a”.)

¹¹ Ki sa n aprann jiska prezan? Li enpòtan pou n chèche wè si Jewova aksepte adorasyon n ap ba li a. Si gen yon bagay n ap fè ki ta ka fè l pa aksepte adorasyon n ap ba li a, nou bezwen aji san pèdi tan pou n sispann fè l (Rev. 2:5, 16; 3:3, 16). Sepandan, Jezi te pale konsènan yon lòt bagay nan mesaj li te bay kongregasyon yo. Ki sa l ye?

NOU BEZWEN DISPOZE ANDIRE PÈSEKISYON

12. Poukisa pawòl Jezi te di frè ak sè nan kongregasyon Esmin ak Filadèlfi yo ta dwe enterese nou jodi a? (Revelasyon 2:10).

¹² Kounye a, ann egzamine mesaj Jezi te bay kongregasyon Esmin ak Filadèlfi. Li te di kretyen sa yo pou yo pa pè sibi pèsekisyon, paske Jewova t ap rekonpanse yo si yo ret fidèl. (Li Revelasyon 2:10; 3:10.) Ki leson nou aprann jodi a? Nou dwe atann n ap jwenn pèsekisyon e nou dwe dispoze andire (Mat. 24:9, 13; 2 Kor. 12:10). Sa k fè rapèl sa a enpòtan?

13-14. Ki efè evènman yo rapòte nan Revelasyon chapit 12 yo gen sou pèp Bondye a?

¹³ Liv Revelasyon an fè n konnen pèp Bondye a t ap jwenn pèsekisyon nan epòk nou an, sa vle di nan “jou Seyè a”. Revelasyon chapit 12 fè konnen gen yon gè ki te eklate nan syèl la tousuit apre Jezi te vin Wa. Mikayèl, anpalan de Jezi Kris lè l retounen nan syèl la, ak zanj li yo batay ak Satan ak demon l yo (Rev. 12:7, 8). Konsa, ènmi Bondye yo te pèdi batay la e yo te pimpe yo sou tè a, sa ki lakòz anpil soufrans pou tè a e pou moun ki abite sou li yo (Rev. 12:9, 12). Men, ki efè sa k te pase a gen sou pèp Bondye a?

¹⁴ Liv Revelasyon an fè n konnen jan Satan reyaji. Piske l pa ka al nan syèl la ankò, l ap pase kòlè l sou rès moun Bondye chwazi pou al nan syèl yo, yo menm ki se reprezantan Wayòm Bondye a sou tè a e “ki gen kòm travay pou yo bay temwayaj sou Jezi”. (Rev. 12:17; 2 Kor. 5:20; Efe. 6:19, 20.) Ki jan pwofesi sa a reyalize?

15. Kiyès “de temwen” yo pale de yo nan Revelasyon chapit 11 lan reprezante, e ki sa k te rive yo?

¹⁵ Satan te pouse ènmi Bondye yo atake frè Bondye chwazi pou al nan syèl yo ki te pran latèt nan travay predikasyon Wayòm nan. “De temwen” yo, liv Revelasyon an fè konnen yo touye yo, reprezante frè ki te alatèt yob (Rev. 11:3, 7-11). An 1918, yo te lage fo akizasyon sou uit nan frè ki te alatèt yo e yo te kondane yo chak pou yo pase anpil tan nan prizon. Pifò moun te panse travay frè sa yo t ap fè a te tou kanpe.

16. Ki sa k te rive sanzatann an 1919, men, ki sa Satan kontinye fè depi lè sa a?

¹⁶ Pwofesi ki nan Revelasyon chapit 11 lan fè konnen tou “de temwen” yo pa t ap pran anpil tan pou yo retounen viv ankò. Pwofesi sa a te reyalize yon fason pèsonn pa t atann, nan mwens pase ennan apre yo te fin met frè sa yo nan prizon. Nan kòmansman ane 1919, yo te libere frè sa yo Bondye te chwazi pou al nan syèl, e annapre, yo te retire akizasyon yo te lage sou do yo a. Lapoula, yo te rekòmanse pran latèt nan travay Wayòm nan. Men, Satan pa t janm sispann atake pèp Bondye a. Depi lè sa a, Satan lage “yon rivyè dlo” pèsekisyon dèyè tout sèvitè Bondye yo (Rev. 12:15). Vrèmanvre, “sa mande pou” nou chak “gen andirans ak lafwa”. — Rev. 13:10.

SE POU N MET TOUT KÈ NOU NAN TRAVAY JEWOVA BAN NOU FÈ A

17. Ki èd pèp Bondye a konn jwenn sanzatann, menm lè Satan ap chèche atake yo?

¹⁷ Annapre, Revelasyon chapit 12 fè konnen pèp Bondye a t ap resevwa èd yon fason yo pa t ap atann. Se kòmsi “tè a” t ap vale “rivyè dlo” pèsekisyon an (Rev. 12:16). Se egzakteman sa k te rive. Pafwa, kèk pati nan monn Satan an, pa egzanp sistèm jistis la, konn ede pèp Bondye a. Pandan plizyè fwa, sèvitè Jewova yo pot laviktwa nan tribinal, sa ki pèmèt yo gen kèk libète. Ki jan yo sèvi ak libète sa a? Yo byen pwofite moman sa a pou yo fè travay Jewova ba yo fè a (1 Kor. 16:9). Ki sa travay sa a gen ladan l?

18. Ki travay ki pi enpòtan nou gen pou n fè pandan dènye jou sa yo?

¹⁸ Jezi te gentan fè konnen disip li yo t ap gen pou yo preche “bon nouvèl [...] konsènan Wayòm” Bondye a sou tout tè a, anvan lafen an vini (Mat. 24:14). Lè y ap preche, yo resevwa èd zanj yo ki gen “yon bon nouvèl k ap dire pou toutan pou [...] anonse moun ki abite sou tout tè a, moun tout nasyon, tout tribi, tout lang ak tout pèp”. — Rev. 14:6.

19. Ki lòt mesaj moun ki renmen Jewova yo dwe anonse?

¹⁹ Se pa sèlman mesaj konsènan bon nouvèl Wayòm nan pèp Bondye a gen pou l anonse. Yo bezwen soutni travay zanj yo pale de yo nan Revelasyon chapit 8 rive nan chapit 10 ap fè a tou. Zanj sa yo ap anonse yon seri malè ki gen pou rive moun ki pa vle soutni Wayòm Bondye a. Se sa k fè Temwen Jewova yo ap anonse yon mesaj jijman, ki sanble ak “lagrèl ak dife”, ki fè konnen jijman Bondye pral fè kont divès pati monn mechan Satan an (Rev. 8:7, 13). Moun yo bezwen konnen lafen an toupre rive, yon fason pou yo ka fè gwo chanjman nan lavi yo e pou yo ka chape nan jou kòlè Jewova a (Sof. 2:2, 3). Se pa tout moun ki renmen mesaj sa a. Nou bezwen met kouraj sou nou pou n fè yo konnen l. Pandan gwo tribilasyon an, dènye mesaj jijman an pral pi rèd toujou. — Rev. 16:21.

OBEYI PAWÒL KI NAN PWOFESI A

20. Sou ki sa nou pral pale nan de atik ki vin annapre yo?

²⁰ Nou vrèman bezwen obeyi “pawòl ki nan pwofesi sa a” paske reyalizasyon pwofesi nou li nan liv Revelasyon an konsène nou tou (Rev. 1:3). Men, ki jan nou kapab kontinye andire pèsekisyon e kontinye met kouraj sou nou pou nou anonse mesaj sa yo? Gen de bagay ki kapab ban nou fòs: premyèman, sa liv Revelasyon an fè konnen ki pral rive ènmi Bondye yo, e dezyèmman, benediksyon k ap tann nou pi devan si n ret fidèl. Se sou sa nou pral pale nan de atik ki vin annapre yo.