Lè w ap etidye, ou bezwen dispoze aprann

Pandan n ap prepare n pou n etidye, nou ka mande tèt nou: ‘Ki sa m ta renmen aprann?’ Sepandan, nou bezwen sonje, menm lè nou vle aprann yon seri bagay, sa pa vle di pa gen lòt bagay ankò Jewova ta renmen n aprann. Ki jan n ka dispoze aprann lè n ap etidye?

Priye Jewova pou l ba w sajès. Mande Jewova ede w wè ki sa l ta renmen w aprann kounye a (Jak 1:5). Pa jis kontante w ak sa w te deja konnen. — Pwo. 3:​5, 6.

Kite pouvwa Pawòl Bondye a genyen aji nan lavi w. “Pawòl Bondye a vivan.” (Ebre 4:12). Chak fwa nou li Labib, nou kapab aprann yon bagay e li ka ede n divès fason nan lavi nou. Men, sa ap rive fèt si nou rekonèt nou bezwen aprann sa Bondye ap anseye nou.

Montre w gen rekonesans pou tout sa Jewova ban nou pou anseye nou. Sa Jewova ban nou pou anseye nou yo tankou “yon resepsyon ki gen bon manje”. (Eza. 25:6.) Fè efò pou w li menm sijè w panse ki pap enterese w. Konsa, w ap kite Bondye ede w vin yon pi bon moun, epitou, w ap vrèman pran plezi etidye!