KONTINYE VEYE!

Ki wòl relijyon jwe nan gè k ap fèt nan peyi Ikrèn nan? Ki sa Bib la di?

Ann gade deklarasyon ki vin apre yo, konsènan pozisyon chèf relijye yo pran anrapò ak gè k ap fèt nan peyi Ikrèn nan:

“Chèf Legliz òtodòks peyi Larisi a, Patriyach Kirill, pa di anyen pou montre l pa dakò lefètke Larisi anvayi Ikrèn [...]. Legliz li a kontinye ap gaye manti sou peyi Ikrèn e prezidan Poutin sèvi ak manti sa yo pou l montre l gen rezon fè gè a.” — EUobserver, 7 mas 2022.
“Patriyach Kirill fè konnen Larisi gen dwa pou l anvayi Ikrèn paske gè sa a ap pèmèt yo lite ak peche.” — AP News, 8 mas 2022.
“Lendi pase, chèf Legliz òtodòks peyi Ikrèn nan, Metwopolit Epifàn I nan Kyèv, te beni pèp la e l te di yo pou yo ‘goumen ak sòlda Larisi yo ki vin anvayi yo’ [...]. Mete sou sa, li fè konnen yon moun pap peche si l touye yon sòlda peyi Larisi.” — Jerusalem Post, 16 mas 2022.
“Nou menm [Konsèy Legliz ak relijyon nan peyi Ikrèn (UCCRO)] n ap soutni lame peyi Ikrèn nan ak tout moun k ap patisipe nan defann peyi a. Nou ba yo benediksyon nou poutèt y ap defann peyi Ikrèn kont moun k ap anvayi l yo e nou priye pou yo.” — Deklarasyon UCCROa 24 mas 2022.

Ki sa w panse? Èske relijyon ki fè konnen y ap suiv Jezi yo ta dwe ankouraje fidèl yo al nan lagè? Ki sa Bib la di sou sa?

Sa listwa aprann nou sou wòl relijyon konn jwe nan gè

Listwa montre souvan relijyon yo konn fè konnen se pa yon move bagay pou moun al nan lagè, oubyen se yon bon bagay pou y al nan lagè, oubyen menm yo dwe al nan lagè. Yo di tout bagay sa yo, toutpandan y ap swadizan travay pou lapè. Depi plizyè dizèn ane, Temwen Jewova yo ap ede moun wè fason relijyon yo aji a depaman ak sa Bib la di. Ann gade kèk egzanp nan piblikasyon nou yo.

“Les croisades: une ‘illusion tragique’” montre ki jan Legliz katolik women an te lakòz anpil moun mouri. E moun ki te fè zak sa yo te panse se nan non Bondye ak Kris yo te fè sa.
“L’Église catholique en Afrique” bay yon egzanp ki montre relijyon pa t rive anpeche tribi yo fè lagè youn ak lòt, ni yo pa t anpeche yo touye anpil moun nan yon tribi.
Atik “La religion est-elle responsable?”, “Le rôle de la religion dans les guerres,” ak “La religion prend parti” montre jan ni Legliz katolik, ni Legliz òtodòks, ni Legliz potestan, te soutni toude kan nan plizyè gè ki te fèt.

Èske relijyon ki di se kretyen yo ye ta dwe soutni lagè?

Men sa Jezi te anseye: “Nou dwe renmen pwochen nou menm jan nou renmen tèt nou.” (Matye 22:39). “Kontinye renmen ènmi nou.” — Matye 5:44-47.

Reflechi sou sa: Èske yon relijyon ka di l ap obeyi lòd Jezi te bay pou moun renmen pwochen l, si l ap ankouraje fidèl li yo al touye moun nan lagè? Pou w jwenn repons kesyon sa a, li atik “Les vrais chrétiens et la guerre” ak “Est-il possible d’aimer ses ennemis?”

Men sa Jezi te di: “Wayòm mwen an pa fè pati monn sa a. Si Wayòm mwen an te fè pati monn sa a, sèvitè m yo t ap goumen pou yo pa livre m.” (Jan 18:36). “Tout moun ki pran epe ap peri anba epe.” — Matye 26:47-52.

Reflechi sou sa: Si kretyen yo pa t dwe batay pou yo pwoteje menm Jezi, èske yo ta dwe al goumen pou lòt rezon? Li atik “Peut-on concilier guerre et christianisme?” pou w wè fason kretyen nan premye syèk yo te suiv egzanp Jezi e yo te obeyi sa l te anseye yo.

Ki sa k pral rive relijyon ki ankouraje moun al nan lagè yo?

Bib la fè konnen Bondye pa dakò ak relijyon ki di y ap suiv Jezi, men ki pa suiv sa l anseye yo. — Matye 7:21-23; Tit 1:16.

Liv Revelasyon an montre nan je Bondye relijyon sa yo responsab lanmò “tout moun yo touye sou tè a”. (Revelasyon 18:21, 24.) Pou w aprann rezon ki fè Bondye konsidere yo responsab, gade atik “Ki sa Gran Babilòn nan ye?”
Jezi te fè konnen y ap elimine tout relijyon Bondye pa aksepte yo, menm jan “y ap koupe” tout pyebwa ki pa bon e ki pa bay bon fwi “e y ap jete yo nan dife”. (Matye 7:15-20.) Li atik “Lafen fo relijyon an toupre!” pou w aprann kòman sa pral fèt.

Temwen Jewova yo diferan

Ni nan peyi Larisi, ni nan peyi Ikrèn, ni toupatou sou tè a, Temwen Jewova yo obeyi lòd Jezi te bay pou yo pa mele nan politik e pou yo pa patisipe nan lagè. Se poutèt sa, nou pa patisipe nan gè sa a, nou pa soutni l e nou pa fè sa pou okenn lòt gè. Antanke Temwen Jewova, yo pèsekite kèk nan nou, piske nou pran detèminasyon pou nou suiv sa Bib la di (Jan 15:19, 20; 2 Timote 3:12). Pa egzanp, gouvènman peyi Larisi mete anpil Temwen nan prizon e yo malmennen kèk nan yo. Mete sou sa, gouvènman an pran lokal nou itilize pou n adore Bondye yo. Pou w jwenn plis enfòmasyon, al sou sit Entènèt www.jw-russia.org.

Gade videyo ki gen tit: Les Témoins de Jéhovah d’Irkoutsk restent fidèles malgré des perquisitions brutales, ki dire kat minit, pou w wè fason yo pèsekite Temwen Jewova yo nan peyi Larisi poutèt lafwa yo.
Depi lontan, anpil moun konnen Temwen Jewova yo kòm moun ki pa mele nan politik e ki pa patisipe nan lagè. Gade videyo Yo kenbe fèm anba opozisyon, pou w wè ki jan yo te rive kenbe pozisyon yo malgre yo te jwenn anpil pèsekisyon nan peyi Almay, lè gouvènman Nazi a t ap dirije, ak nan ansyen Inyon sovyetik la.

Nou envite w ale sou sit Entènèt nou an pou w aprann plis sou kwayans nou yo, sa gen ladan l pwomès nou jwenn nan Bib la ki fè konnen pap gen lagè alavni (Ezayi 2:4; Jeremi 29:11). Si w vle jwenn plis enfòmasyon, tanpri kontakte nou.

Kote foto yo soti, soti agoch rive adwat: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images

a UCCRO, oswa Konsèy Legliz ak relijyon nan peyi Ikrèn gen 15 legliz ladan l ki reprezante Legliz òtodòks, grèk, katolik women, potestan ak relijyon evanjelik ansanm ak juif ak mizilman.