Referans pou Pwogram reyinyon Lavi nou ak travay nou fè a
3-9 JANVYE
TREZÒ KI NAN PAWÒL BONDYE A | JIJ 15-16
“Trayizon bay degoutans!”
Trayizon se yon siy ki enkyete anpil moun nan epòk nou an
4 Toudabò, ann pale de Dalila, yon fi jij Sanson te renmen e ki te fè konplo kont li. Sanson te detèmine pou l al goumen kont Filisten yo pou pèp Bondye a. Petèt Filisten yo te konnen Dalila pa t renmen Sanson toutbon, e se sa k fè senk gwo chèf filisten yo te ofri Dalila yon pakèt lajan pou l te ka ba yo sekrè ki fè Sanson te gen kokennchenn fòs li te genyen an yon fason pou yo te ka touye l. Piske Dalila te renmen lajan, li te aksepte pwopozisyon yo te fè l la. Pandan twa fwa li te chèche konnen ki kote Sanson te jwenn fòs li te genyen an, men, sa pa t mache. Donk, li te “rete la nan kò Samson, l’ap plenyen nan tèt li” pou l te ka kontinye ba l presyon. Alafen, “Samson pa t kapab ankò, rete pou l te mouri”. Se sa k fè li te di Dalila yo pa t janm koupe cheve l depi l fèt, si yo ta koupe yo, li t ap pèdi fòs li. Kou Dalila tande sa, li koupe cheve Sanson pandan Sanson ap dòmi sou janm li. Apre sa, li lage l nan men ènmi l yo pou yo fè sa yo vle avè l (Jij 16:4, 5, 15-21). Ala yon vye aksyon manmzèl te fè! Anbisyon te fè Dalila trayi yon moun ki te renmen l.
w05-F 15/1 27 § 5
Pwen enteresan nou jwenn nan liv Jij la
14:16, 17; 16:16. Lè yon moun ap kriye epi l ap tingting yon lòt moun pou l ka fè presyon sou li, sa ka gen move efè sou relasyon yo. — Pwovèb 19:13; 21:19.
Trayizon se yon siy ki enkyete anpil moun nan epòk nou an
15 Ki jan moun ki marye yo kapab rete fidèl ak moun yo marye avè l la? Pawòl Bondye a di: “Pran plezi ou ak madanm [oswa mari] ou renmen depi lè ou te jenn lan.” Li di tou: “Wè lavi a ak madanm [oswa mari] ou renmen an.” (Pwo. 5:18; Ekl. 9:9, NW). Tank toule de moun ki marye yo ap granmoun, yo dwe “toujou la” youn pou lòt ni pou bezwen fizik yo ni pou bezwen afektif yo. Sa vle di, yo dwe vrèman enterese youn ak lòt, pase tan youn ak lòt, epi vin pi pwòch youn lòt. Yo dwe toujou veye pou yo pwoteje maryaj yo ak relasyon yo ak Jewova. Pou yo rive fè sa, moun marye yo bezwen etidye Labib ansanm, preche ansanm regilyèman, e priye Jewova ansanm pou l ba yo benediksyon.
RETE FIDÈL AK JEWOVA
16 Gen moun nan kongregasyon an ki te fè peche grav e ansyen yo te reprimande yo, “yon fason ki fèm, dekwa pou yo ka [vin] solid nan lafwa”. (Tit 1:13.) Gen lòt yo te oblije eskominye pou peche yo te fè a. Men, moun ki te resevwa disiplin sa a e ki kite l “fòme yo” retounen gen bon relasyon ak Jewova ankò (Ebre 12:11). E si se yon zanmi nou oswa se yon manm fanmi nou ki eskominye? Nan sitiyasyon sa a, nou bezwen fidèl anvè Bondye olye nou fidèl anvè moun nan. Jewova ap gade nou pou l wè si n ap suiv kòmandman li bay ki mande pou nou pa pran kontak ak nenpòt moun ki eskominye. — Li 1 Korentyen 5:11-13.
Trezò espirityèl
w05-F 15/3 27 § 6
Samson pote laviktwa grasa fòs Jewova!
Samson te byen deside pou l pousuiv objektif li a, anpalan de konba li t ap mennen kont moun peyi Filisti yo. Li te rete lakay yon pwostitye nan Gaza nan objektif pou l konbat ènmi Bondye yo. Samson te bezwen yon kote pou l pase nuit lan nan vil ènmi an e se lakay yon pwostitye li te pase nuit lan. Samson pa t gen okenn panse imoral nan tèt li. Li te kite kay dam nan a minui, li rache pòtay vil la ak poto ki te kenbe pòtay la ansanm ak bwa travès yo te itilize pou yo fèmen pòtay la e li pote yo al sou tèt mòn ki anfas Ebwon an ki te nan yon distans anviwon 60 km. Sa te fèt grasa apwobasyon Bondye ak fòs Li te ba li a. — Jij 16:1-3.
10-16 JANVYE
TREZÒ KI NAN PAWÒL BONDYE A | JIJ 17-19
“Lè nou dezobeyi lwa Bondye yo sa ap mennen nan pwoblèm”
it-2-F 278
Mika
1. Yon mesye nan tribi Efrayim. Mika te vyole uityèm kòmandman an (Egz 20:15), lè l te vòlè 1 100 pyès ann ajan nan sa manman l te genyen. Lè l te di manman l se li ki te pran yo e li te remèt li yo, manman an te di: “M ap met ajan ki nan men m nan apa pou Jewova san mank pou pitit gason m nan ka fè yon zidòl ak yon estati an metal. Konsa, l ap retounen vin jwenn ou.” Li te pran 200 pyès ann ajan bay yon òfèv ki te fè “yon zidòl ak yon estati an metal” e yo mete yo lakay Mika. Mika, ki te gen “yon kay ki chaje ak fo dye”, te fè yon efòd ak kèk estati terafim e li te chwazi youn nan pitit gason l yo pou l sèvi l kòm prèt. Byenke l te fè aranjman sa yo nan entansyon pou onore Jewova, sa te vrèman pa kòrèk piske l te vyole kòmandman ki te entèdi idolatri a (Egz 20:4-6), e li te mete tabènak Jewova a ak prèt Li yo sou kote (Jj 17:1-6; Dt 12:1-14). Annapre, Mika te pran Jonatan yon desandan Gèchòm ki te pitit Moyiz, li fè l vin lakay li epi li anplwaye jèn levit sa a kòm prèt (Jj 18:4, 30). Toutpandan l te nan erè, Mika te santi l satisfè e l te di: “Kounye a, mwen konnen Jewova ap beni m.” (Jj 17:7-13). Men, Jonatan pa t desandan Arawon, sa ki te fè l pa t kalifye ditou pou sèvi kòm prèt, sa ki te lage Mika nan plis erè toujou. — Nb 3:10.
it-2-F 278 § 3
Mika
Yon ti tan annapre, Mika ak yon bann gason te pousuiv moun tribi Dann yo. Pandan l ap diskite avèk yo e yo mande l sa k genyen, Mika te di: “Nou pran dye m te fè yo, nou ale ak prèt la e nou pa kite anyen pou mwen. Epi kounye a, n ap mande m: Ki sa m genyen?” Lè sa a, pitit gason Dann yo te avèti Mika si l kontinye suiv yo e kontinye pale fò avèk yo konsa, yo ka atake l. Kòm Mika wè moun tribi Dann yo te gen plis fòs pase l, li te tounen lakay li (Jj 18:22-26). Apre sa, moun tribi Dann yo te atake Layis, yo te boule l, yo te bati vil la e yo te rete ladan l. Jonatan ak pitit gason l yo te vin sèvi kòm prèt pou moun tribi Dann yo ki te “met zidòl Mika te fè a nan vil la e li rete la pandan tout tan kay vrè Dye a [tabènak la] te nan Silo.” — Jj 18:27-31.
Trezò espirityèl
Yon tradiksyon Labib ki vivan
6 Nou kontinye jwenn plis prèv ki montre l enpòtan pou n kite non Bondye nan Bib la. Non Bondye parèt 7 216 fwa nan edisyon revize 2013 Tradiksyon monn nouvo a, sa ki fè l parèt 6 lòt kote anplis pase edisyon 1984 la. Senk nan kote sa yo se 1 Samyèl 2:25; 6:3; 10:26; 23:14, 16. Rezon prensipal ki fè yo remete l nan vèsè sa yo se paske gen non an nan vèsè sa yo nan woulo yo te jwenn nan Lanmè Mòt yo, yon seri woulo ki egziste depi plis pase 1 000 an anvan tèks Masorèt ebre a. Mete sou sa, rezilta kèk etid nou fè nan ansyen maniskri yo pèmèt nou remete non an nan Jij 19:18.
17-23 JANVYE
TREZÒ KI NAN PAWÒL BONDYE A | JIJ 20-21
“Kontinye mande Jewova sa pou n fè”
Èske w ap imite Fineyas lè w jwenn difikilte?
Apre mesye lavil Gibeya yo, ki nan tribi Benjamen an, te fin fè kadejak sou fanm kay yon moun Levi, sa ki te lakòz fanm nan mouri, lòt tribi yo te soti pou fè lagè ak moun Benjamen yo (Jij 20:1-11). Byenke moun nan lòt tribi sa yo te priye Jewova pou yo mande l ki sa pou yo fè anvan y al batay, yo te bat yo de fwa e yo te pèdi anpil sòlda (Jij 20:14-25). Èske yo te panse Jewova pa t tande priyè yo? Èske Jewova te vle pou yo koresponn ak mesye lavil Gibeya yo vre?
Èske w ap imite Fineyas lè w jwenn difikilte?
Ki leson nou kapab aprann nan istwa sa a? Gen kèk pwoblèm nan kongregasyon an ki gendwa pa jwenn solisyon tousuit malgre bonjan efò ansyen yo fè e malgre yo priye Jewova pou yo mande l èd. Si sa ta rive, l ap bon pou ansyen yo sonje pawòl Jezi te di yo: “Kontinye mande [oubyen priye], y ap ban nou. Kontinye chèche, n ap jwenn. Kontinye frape, y ap ouvri pou nou.” (Lik 11:9). Menmsi li ta sanble Jewova poko reponn yon priyè ansyen yo fè, yo mèt gen konfyans Jewova ap reponn priyè a nan moman li wè ki pi bon an.
Trezò espirityèl
Èske w te konnen?
Ki jan yo te konn sèvi ak flonn pou yo fè lagè nan tan lontan?
Se yon flonn David te itilize pou l te touye jeyan yo te rele Golyat la. Sanble David te aprann sèvi ak zam sa a lè l te yon jèn bèje. — 1 Samyèl 17:40-50.
Nan tan biblik yo, yo pale de flonn nan bagay atis yo te konn fè ni ann Ejip ni ann Asiri. Flonn nan te tankou yon bous ki ouvè de bò, yo te fè l an kui oswa ak twal. Li gen yon kòd oubyen yon lasèt ki mare nan chak pwent li. Moun k ap lanse flonn nan konn mete yon wòch plat oswa yon wòch won nan mitan bous la. Wòch la ka mezire ant 5 a 7,5 santimèt dyamèt e li ka peze 250 gram. Apre sa, moun k ap lanse flonn nan vire l sou tèt li, apre li lage youn nan pwent yo. Konsa wòch la pati ak tout fòs l al tonbe egzakteman kote moun nan vle a.
Yo jwenn yon bon kantite flonn yo te konn itilize nan lagè nan tan lontan anba tè nan zòn Mwayen Oryan. Sòlda ki te maton nan lanse flonn yo te ka voye yon wòch ki ale ak yon vitès ant 160 a 240 kilomèt nan inèdtan. Biblis yo pa fin antann yo si wi ou non yo ka mete flonn nan menm kategori ak banza, men, se sèten, yon flonn ka touye moun menm jan ak yon banza. — Jij 20:16.
24-30 JANVYE
TREZÒ KI NAN PAWÒL BONDYE A | RIT 1-2
“Kontinye chèche gen lanmou fidèl”
Ann imite bon zanmi Jewova yo
5 Fanmi Rit t ap viv nan peyi Mowab. Li te ka retounen al jwenn yo, e sandout, yo t ap pran swen l. Li te konn pèp Mowab la byen, li te konn lang lan e l te konn koutim moun yo. Nawomi pa t ka pwomèt Rit okenn nan bagay sa yo lè l rive Betleyèm. Epi, Nawomi te pè pou l pa jwenn yon mari pou Rit oubyen yon kote pou Rit rete. Se sa k fè Nawomi te di Rit pou l retounen Mowab, nan peyi l. Jan n te wè sa, Òpa te “retounen al jwenn pèp li a ak dye l yo”. (Rit 1:9-15.) Men, Rit pa t deside retounen al jwenn pèp li a ak fo dye yo te konn sèvi yo.
Ann imite bon zanmi Jewova yo
6 Sanble se mari Rit oswa Nawomi ki te pale l de Jewova. Rit te vin aprann Jewova pa tankou dye nan peyi Mowab yo. Li te renmen Jewova e l te konnen Jewova merite pou l renmen l e pou l adore l. Se sa k fè Rit te pran bon desizyon an. Men sa l te di Nawomi: “Pèp ou a ap pèp mwen, e Bondye w la ap Bondye m.” (Rit 1:16). Sa touche kè nou lè n ap reflechi sou lanmou Rit te gen pou Nawomi. Men, sa k pi enpresyone nou se lanmou Rit te gen pou Jewova a. Lanmou sa a te gen gwo efè sou Bowaz tou, e pi devan, sa te pouse l fè lwanj pou Rit dèske Rit te ‘chèche pwoteksyon anba zèl Jewova’. (Li Rit 2:12.) Mo Bowaz te itilize yo kapab fè n sonje fason ti zwazo yo konn chèche pwoteksyon anba zèl paran yo (Sòm 36:7; 91:1-4). Menm jan an tou, Jewova te byen pwoteje Rit e l te rekonpanse l pou lafwa l. Rit pa t janm gen okenn rezon pou l regrèt desizyon l te pran an.
Trezò espirityèl
Pwen enteresan nou jwenn nan liv Rit la
1:13, 21 — Èske Jewova te fè lavi a vin anmè pou Nawomi, èske li te lage l nan kalamite? Non. Nawomi pa t di anyen mal sou Bondye. Sepandan, lè li wè tout sa ki te rive l, li te panse Jewova te kont li. Li te vin anmè e li te desi. Anplis de sa, nan epòk sa a, yo te konsidere fwi zantray kòm benediksyon Bondye bay e yo te konsidere pa ka fè pitit kòm yon malediksyon. Nawomi ka te santi li gen rezon panse Jewova imilye l, paske li pa gen okenn pitit pitit e li pèdi de pitit gason l yo.
31 JANVYE–6 FEVRIYE
TREZÒ KI NAN PAWÒL BONDYE A | RIT 3-4
“Se pou n gen yon bon repitasyon epi kenbe l”
“Yon trè bon fi”
18 Sandout, lefètke Bowaz te pale avèk kalm, sa te bay Rit kouraj. Men sa l te di: “Mwen swete pou Jewova beni w, pitit fi m. Sa w fè kounye a montre w gen plis lanmou ki fidèl pase sa w te fè anvan an, piske w pa al dèyè jèn moun parèy ou, kit yo pòv kit yo rich.” (Rit 3:10). Ekspresyon “sa w te fè anvan an” fè referans ak lanmou fidèl Rit te demontre lè l te vin ansanm ak Nawomi ann Izrayèl pou l te ka pran swen bèlmè l la. E ekspresyon “sa w fè kounye a” fè referans ak aksyon Rit t ap fè a. Bowaz konnen li te ka pi fasil pou yon jèn fi tankou Rit chèche yon jèn gason pou mari l, kit li rich kit li pòv. Sepandan, Rit pa t sèlman vle aji byen anvè Nawomi, men li te vle aji byen tou anvè mari Nawomi an ki te mouri. Li te vle pou yo toujou site non defen an ann Izrayèl. Li pa difisil pou n wè poukisa sa te touche Bowaz anpil lè l wè sakrifis jèn fi sa a te fè a.
“Yon trè bon fi”
21 Ala byen Rit dwe te santi l byen lè l reflechi ak pawòl Bowaz te di l yo: li te yon moun tout moun te konnen kòm “yon trè bon fi”! Sandout, chofe l te chofe pou l konnen Jewova e pou l sèvi l la te jwe yon gwo wòl nan repitasyon l te genyen an. Anplis de sa, Rit te demontre anpil bonte ak jantiyès anvè Nawomi ak pèp Nawomi an. Li te dispoze adapte l ak fason moun yo te aji ki te diferan e ak koutim yo. Si n demontre menm lafwa Rit te genyen an, n ap fè efò pou n respekte fason moun aji ak koutim yo genyen e pou n trete yo ak anpil respè. Si n fè sa, nou menm tou nou ka vin gen yon bon repitasyon.
“Yon trè bon fi”
25 Bowaz te marye ak Rit. Apre sa, men sa n li nan Bib la: “Jewova pèmèt Rit vin ansent e li fè yon pitit gason.” Fi nan Betleyèm yo te beni Nawomi e yo te louwe Rit, yo te di Rit vo plis pase sèt pitit gason pou Nawomi. Pi devan, nou vin aprann pitit gason Rit la se youn nan zansèt gran wa David (Rit 4:11-22). David, li menm, se youn nan zansèt Jezi Kris. — Mat. 1:1.
Trezò espirityèl
Pwen enteresan nou jwenn nan liv Rit la
4:6 — Nan ki sans yon rachtè t ap “fini ak” eritaj li si l fè racha a? Toudabò, si moun ki tonbe nan povrete a te vann tè li genyen kòm eritaj, yon rachtè t ap oblije achte tè a nan yon pri yo kalkile selon kantite ane ki rete anvan pwochen Jibile a (Levitik 25:25-27). Si l ta fè sa, sa t ap diminye valè byen li genyen an. Anplis de sa, si Rit ta vin fè yon pitit gason, se pitit gason sa a ki t ap eritye tè yo rachte a, se pa okenn lòt pwòch paran.
7-13 FEVRIYE
TREZÒ KI NAN PAWÒL BONDYE A | 1 SAMYÈL 1-2
“Ouvri kè w bay Jewova nan lapriyè”
Li te vide kè l bay Bondye nan lapriyè
12 Kidonk, Ana kite yon bèl egzanp pou tout sèvitè Bondye yo nan kesyon lapriyè. Avèk bonte, Jewova envite sèvitè l yo pou yo pale avè l ak tout kè yo, san ezite, pou yo di l pwoblèm yo, menm jan yon timoun ki gen konfyans papa l renmen l t ap fè sa. (Li Sòm 62:8; 1 Tesalonisyen 5:17.) Men pawòl rekonfòtan Jewova te pouse apot Pyè ekri konsènan lapriyè: “Lage tout tètchaje nou genyen sou li, paske li gen sousi pou nou.” — 1 Pyè 5:7.
15 Etandone Ana te vide kè l bay Jewova pandan l t ap adore l nan tabènak la, ki efè sa te gen sou li? Men sa nou li nan istwa a: “L ale lakay li, li manje, epi figi l pa t tris ankò.” (1 Sam. 1:18). Men sa tradiksyon Bib la mete nan vèsè sa a: “Li pa t menm moun lan ankò.” Ana te santi l soulaje. Nan yon sans, li te lage pwoblèm li yo sou Papa l ki nan syèl la ki gen yon do ki pi laj e ki gen plis fòs lontan pase l. (Li Sòm 55:22.) Èske gen pwoblèm ki twòp pou Papa nou ki nan syèl la? Non. Pa t janm genyen, pa genyen jodi a e pap janm genyen!
Trezò espirityèl
Pwen enteresan ki nan premye liv Samyèl la
2:10 — Poukisa Ana te priye pou Jewova “bay wa li a fòs” alòske lè sa a pa t gen pyès moun ki wa ann Izrayèl? Sèke, Lwa Moyiz la te predi t ap gen yon moun k ap wa sou Izrayelit yo (Detewonòm 17:14-18). Nan pwofesi Jakòb te bay anvan li mouri a, li te di: “Baton wa a [senbòl otorite wa a] pap kite Jida.” (Jenèz 49:10). Mete sou sa, konsènan Sara, zansèt Izrayelit yo, Jewova te di: “Wa plizyè pèp ap soti nan li.” (Jenèz 17:16). Konsa, Ana t ap priye konsènan yon wa ki gen pou vini.
14-20 FEVRIYE
TREZÒ KI NAN PAWÒL BONDYE A | 1 SAMYÈL 3-5
“Jewova gen konsiderasyon pou moun”
Li toupisan, men l gen konsiderasyon pou moun
3 Samyèl te toupiti lè l te kòmanse “fè sèvis Jewova” nan tabènak la (1 Sam. 3:1). Yon jou swa, apre Samyèl fin kouche, gen yon bagay dwòl ki te rive. (Li 1 Samyèl 3:2-10.) Li te tande yon vwa ki rele l nan non l. Piske l te panse se te vwa gran prèt Eli ki te fin granmoun, avèk obeyisans, li te kouri al jwenn li epi l di: “Men mwen wi. Mwen tande w rele m.” Eli te di l li pa rele l. Lè menm bagay la vin rive de lòt fwa ankò, Eli vin rann li kont se Bondye k ap rele Samyèl. Se sa k fè l te fè tigason an konn ki jan pou l reponn, e Samyèl te obeyi l. Poukisa premye fwa a Jewova pa t sèvi ak zanj li an pou l fè Samyèl konnen se li menm ki te rele l? Bib la pa di poukisa, men, fason bagay yo te vin pase montre konsiderasyon Jewova te gen pou ti Samyèl se te yon aspè enpòtan. Kòman sa?
Li toupisan, men l gen konsiderasyon pou moun
4 Li 1 Samyèl 3:11-18. Lwa Jewova a te mande pou timoun yo demontre respè pou granmoun, sitou si se yon chèf (Egz. 22:28; Lev. 19:32). Èske w ka imajine Samyèl k al kot Eli nan demen maten epi l met kran sou li pou l ba l mesaj jijman ki pike Bondye bay la? Non, li pa t fè sa! Olye de sa, istwa a fè konnen Samyèl “te pè rakonte Eli vizyon l te fè a”. Sepandan, yon fason klè, Bondye te fè Eli konprann se Li ki t ap rele Samyèl. Konsa, Eli te vin konprann sitiyasyon an e l te mande Samyèl pou l pale. Eli te di l: “Pa kache m [...] menm yon pawòl nan tout sa l te di w yo!” Samyèl te obeyi e l te “rakonte l tout bagay.”
Trezò espirityèl
Pwen enteresan ki nan premye liv Samyèl la
3:3 — Èske vrèman Samyèl te dòmi nan Trè Sen an? Non, li pa t dòmi ladan l. Samyèl te yon Levit ki soti nan fanmi Keyatit yo, se pa t yon fanmi ki bay prèt (1 Kwonik 6:33-38). Pakonsekan, li pa t otorize pou l “vin gade bagay ki sen yo”. (Nonb 4:17-20.) Sèl kote nan sangtyè a Samyèl te gen dwa ale se nan lakou tabènak la. Se la li dwe te konn dòmi. Sanble, se yon kote nan lakou a Eli te konn dòmi tou. Li klè, ekspresyon “kote lach Bondye a te ye a” fè referans ak zòn kote tabènak la te ye a.
21-27 FEVRIYE
TREZÒ KI NAN PAWÒL BONDYE A | 1 SAMYÈL 6-8
“Kiyès ki wa nou?”
it-2-F 827 § 1
Wayòm Bondye a
Yo te mande yon moun kòm wa. Anviwon 400 ane depi Izrayelit yo te kite peyi Ejip, e anviwon 800 ane depi Jewova te fè yon alyans ak Abraram, Izrayelit yo te mande pou gen yon moun ki dirije yo kòm wa, menm jan ak lòt nasyon yo ki te gen yon sistèm monachi. Lè yo te fè demann sa a se Jewova yo te rejte antanke wa yo (1Sa 8:4-8). Se vre, pèp la te swete se Bondye ki te dwe tabli yon wayòm ann amoni ak pwomès li te fè Abraram ak Jakòb anvan sa a. Sa yo te atann nan te baze sou pwofesi Jakòb te bay anvan l mouri a konsènan Jida (Jen 49:8-10), sou pawòl Jewova te di Izrayelit yo lè yo te fin kite peyi Ejip (Egz 19:3-6), sou kondisyon ki te gen nan alyans Lalwa a (Dt 17:14, 15), e menm sou yon pati nan mesaj Bondye te fè pwofèt Balaam bay la (Nb 24:2-7, 17). Ana, manman Samyèl, yon dam ki te fidèl te montre espwa sa a nan priyè l te fè a (1Sa 2:7-10). Sepandan, Jewova pa t revele “sekrè sakre” konsènan Wayòm li an e li pa t di ki lè l t ap etabli Wayòm li an, ni li pa t di ki jan l t ap ye e kiyès ki t ap fè pati gouvènman sa a, ni nonplis li pa t di si se t ap sou tè a oswa nan syèl la. Nan sans sa a, pèp la te pran dwa ki pa pou yo lè yo te mande yon moun kòm wa.
Li te andire malgre li te jwenn desepsyon
18 Remake sa Jewova te di Samyèl lè Samyèl te pote koze a devan Jewova nan lapriyè. Men sa Jewova te di l: “Fè tout sa pèp la di w. Paske se pa ou menm yo pa vle, men se mwen menm yo pa vle kòm wa yo.” Pawòl sa yo dwe te rekonfòte Samyèl pou l konnen se pa li menm pèp la te rejte. Men, se yon gwo dega pèp la te manke Bondye Toupisan an! Jewova te mande pwofèt li a pou l avèti Izrayelit yo pou yo konnen sa sa t apral koute yo lè yo mete yon moun kòm wa pou dirije yo. Menm lè Samyèl te fin fè yo konnen sa sa t apral koute yo, yo t ap plede di: “Non, se yon wa nou vle pou dirije nou.” Etandone Samyèl te toujou obeyi Bondye li a, l al vide luil sou tèt moun Jewova te chwazi pou wa a. — 1 Sam. 8:7-19.
Sa vin klè se dominasyon Jewova a ki bon!
9 Listwa montre Jewova te gen rezon lè l te ba yo avètisman sa a. Lè se wa imen ki t ap dirije Izrayelit yo, yo te jwenn anpil gwo pwoblèm, sitou lè wa sa yo pa t fidèl. Lè nou konsidere egzanp Izrayelit yo, nou pa etone wè gouvènman moun ki pa konnen Jewova yo ap dirije yo pa reyisi bay bon rezilta ki pèmanan. Se vre, gen kèk politisyen ki mande Bondye pou l beni efò y ap fè pou yo bay lapè ak sekirite, men, ki jan Bondye ap fè beni moun ki pa kite l dirije yo? — Sòm 2:10-12.
Trezò espirityèl
w02-F 1/4 12 § 13
Poukisa nou batize?
13 Nou dwe konvèti anvan nou batize antanke Temwen Jewova. Konvèsyon se lè yon moun chwazi pèsonèlman pou l suiv Jezi Kris ak tout kè l. Moun sa yo sispann fè sa yo te konn fè ki mal e yo detèmine pou yo fè sa ki dwat nan je Bondye. Nan bib la, vèb Ebre ak vèb Grèk yo tradui pou mo konvèsyon an gen sans tounen, kase tèt tounen. Aksyon sa a vle di kite yon move chemen pou n vin jwenn Bondye (1 Wa 8:33, 34). Konvèsyon mande pou “fè aksyon ki mache ak repantans.” (Travay 26:20). Sa mande pou nou kite fo adorasyon, aji ann amoni ak kòmandman Bondye yo e bay Jewova yon atachman san pataj (Detewonòm 30:2, 8-10; 1 Samyèl 7:3). Konvèsyon fè nou chanje fason nou panse, objektif nou yo ak sa ki nan lespri nou (Ezekyèl 18:31). Nou “kase tèt tounen” lè nou ranplase pèsonalite ki pa fè Bondye plezi a ak nouvo pèsonalite a. — Travay 3:19; Efezyen 4:20-24; Kolosyen 3:5-14.
28 FEVRIYE–6 MAS
TREZÒ KI NAN PAWÒL BONDYE A | 1 SAMYÈL 9-11
“Okòmansman Sayil te gen imilite ak modesti”
Mache avèk Bondye w la ak imilite toutpandan w rekonèt limit ou
11 Ann reflechi ak sa k te rive wa Sayil. Okòmansman, se te yon jèn gason ki te rekonèt limit li. Nonsèlman li te rekonèt limit li men tou, li te menm pè aksepte plis responsablite (1 Sam. 9:21; 10:20-22). Epoutan, rive yon lè, li te vin awogan e li te pran dwa ki pa pou li. Li te kòmanse montre l gen defo sa a tousuit apre l vin wa. Yon lè, li te pèdi pasyans pandan l t ap tann pwofèt Samyèl. Olye Sayil te rekonèt limit li e l te tann pou Jewova aji an favè pèp la, li te ofri sakrifis yo boule nèt la alòske l pa t gen dwa fè sa. Se sa k fè, Sayil te pèdi favè Jewova e l te vin pèdi pouvwa l antanke wa (1 Sam. 13:8-14). N ap montre nou se moun ki gen sajès si nou pran leson nan egzanp sa a ki sèvi nou avètisman e si nou evite pran dwa ki pa pou nou.
Fason pou n kontinye demontre lespri sakrifis
8 Egzanp wa Sayil, yon wa ann Izrayèl, se yon egzanp ki sèvi nou avètisman e ki montre jan tandans egoyis ka minen lespri sakrifis nou demontre a. Lè Sayil te fèk vin wa, li te konsidere tèt li yon fason ki modès epi l te gen imilite (1 Sam. 9:21). Li te refize pini yon seri Izrayelit ki t ap pale l mal antanke wa menm lè l te ka santi l gen rezon pou l defann li, etandone se Bondye ki te mete l nan pozisyon sa a (1 Sam. 10:27). Wa Sayil te aksepte direksyon lespri sen Bondye te ba li lè l te pran latèt nan konba Izrayelit yo te ranpòte kont Amonit yo. Avèk imilite, Sayil te fè konnen se Jewova ki te ranpòte viktwa sa a. — 1 Sam. 11:6, 11-13.
w95-F 15/12 10 § 1
Moun Amon yo, yon pèp ki te rann mal pou byen
Yon lòt fwa ankò, moun Amon yo pa t byen reyaji fas ak bonte Jewova. Jewova pa t fèmen je sou move aksyon sa a. “Lespri Bondye te desann sou Sayil lè l tande pawòl [Nahach] yo, e li te vin fache anpil.” Anba direksyon lespri Bondye, Sayil te òganize yon lame ki te gen 330 000 gason ki konn goumen pou gaye moun Amon yo nèt yon fason pou “pa t gen de moun ki te ret ansanm.” — 1 Samyèl 11:6, 11.
Trezò espirityèl
Pwen enteresan ki nan premye liv Samyèl la
9:9 — Ki sa ki remakab nan pawòl sa a ki di: “Pwofèt kounye a, yo te konn rele l vwayan nan tan lontan?” Pawòl sa a ka vle di, etandone pwofèt yo te vin jwe yon wòl pi enpòtan nan epòk Samyèl ak nan epòk kote te gen wa ann Izrayèl, mo “pwofèt” la te vin ranplase mo “vwayan” an. Se Samyèl ki konsidere kòm premye nan ran pwofèt yo. — Travay 3:24.