• Pwofesi Danyèl la predi Mesi a ta gen pou vini
    Ki sa Labib anseye toutbonvre?

    • APENDIS

      Pwofesi Danyèl la predi Mesi a ta gen pou vini

      PWOFÈT Danyèl te pase sou tè a sa gen plis pase 500 an anvan nesans Jezi. Sepandan, Jewova te revele yon seri enfòmasyon bay Danyèl ki t ap pèmèt nou idantifye moman kote Jezi t ap wen, kote l t ap vin Mesi oswa Kris. Men sa yo te di Danyèl: “E ou dwe konnen e ou dwe gen klèvwayans, depi pawòl la soti pou yo restore Jerizalèm e pou yo rebati l rive jiska Mesi, Lidè a, ap gen sèt semèn, epitou ap gen swasannde semèn.” — Danyèl 9:25.

      Pou nou jwenn moman Mesi a t ava vini, toudabò, nou bezwen konnen kòmansman peryòd ki t ap mennen nan Mesi a. Selon pwofesi a, sa ta dwe fèt “depi pawòl la soti pou yo restore Jerizalèm e pou yo rebati l”. Ki lè “pawòl la te soti”? Selon Neyemya, yon ekriven biblik, pawòl pou yo rebati miray Jerizalèm nan te soti “nan ventyèm ane wa Atakzèksès”. (Neyemya 2:1, 5-8.) Istoryen yo konfime ane 474 anvan epòk nou an se te premye ane konplè rèy Atakzèksès. Donk, 20yèm ane rèy li a se te an 455 anvan epòk nou an. Kounye a, nou konnen kòmansman peryòd pwofesi mesyanik Danyèl la: ane 455 anvan epòk nou an.

      Danyèl fè konnen konbyen tan ki t ap pase jiskaske “Mesi, Lidè a” parèt. Pwofesi a di ap gen “sèt semèn, epitou ap gen swasannde semèn”, swa yon total 69 semèn. Konbyen tan peryòd sa a reprezante? Plizyè tradiksyon Labib fè konnen se pa semèn sèt jou, men se semèn ane. Sa vle di, chak semèn reprezante setan. Fason sa a pou yo pale de semèn ane, oswa gwoup setan, pa t etranj pou Juif nan tan lontan yo. Pa egzanp, yo te konn obsève yon ane Saba chak setan (Egzòd 23:10, 11). Donk, 69 semèn pwofetik yo vin bay 69 gwoup, e chak gwoup gen 7 an, swa yon total 483 an.

      Kounye a, tout sa nou gen pou n fè, se konte. Si nou konte 483 an soti nan ane 455 anvan epòk nou an, sa mennen nou nan ane 29 epòk nou an. Se egzakteman nan ane sa a Jezi te batize e li te vin Mesia (Lik 3:1, 2, 21, 22)! Èske sa se pa yon pwofesi biblik ki akonpli yon fason estrawòdinè?

      Tablo: Pwofesi sèt semèn nou jwenn nan Dànyèl 9 la te deja fè konnen Mesi a ta gen pou vini.

      a Soti nan ane 455 anvan epòk nou an, pou rive nan ane 1 anvan epòk nou an, sa fè 454 an. Soti nan ane 1 anvan epòk nou an, pou rive nan ane 1 epòk nou an, sa fè ennan (pa t gen ane zewo). Epi, soti nan ane 1 epòk nou an pou rive nan ane 29 epòk nou an, sa fè 28 an. Lè w adisyone twa chif sa yo, sa bay yon total 483 an. Jezi te “elimine” nan lanmò nan ane 33 epòk nou an, pandan 70yèm semèn ane a (Danyèl 9:24, 26). Gade chapit 11 liv Prêtons attention à la prophétie de Daniel!, ak Étude perspicace des Écritures, volim 2, paj 995-7. Toule de liv sa yo, se Temwen Jewova ki pibliye yo.

  • Jezi Kris: Mesi yo te pwomèt la
    Ki sa Labib anseye toutbonvre?

    • APENDIS

      Jezi Kris: Mesi yo te pwomèt la

      POU Jewova Dye ede nou idantifye Mesi a, li te enspire anpil pwofèt pou yo founi detay nan Bib la konsènan nesans Moun yo te pwomèt ki t apral delivre nou an, konsènan ministè li ak lanmò li. Tout pwofesi biblik sa yo te akonpli sou Jezi Kris. W ap sezi wè jan yo presi e jan yo detaye. Kòm egzanp, annou egzamine kèk pwofesi ki te predi yon seri evènman ki gen rapò ak lè Mesi a te fèt ak lè l te piti.

      Pwofèt Izayi te anonse Mesi a t ava yon desandan Wa David (Izayi 9:7). Vrèmanvre, Jezi te fèt nan liy fanmi David. — Matye 1:1, 6-17.

      Gen yon lòt pwofèt Bondye ki te rele Mika ki te predi timoun sa a t ava finalman tounen yon chèf, e li t ava fèt nan “Betleyèm Efrata”. (Mika 5:2.) Nan epòk Jezi te fèt la, te gen de vil ann Izrayèl ki te rele Betleyèm. Gen youn ki te toupre Nazarèt nan zòn nò peyi a, e lòt la te toupre Jerizalèm nan zòn Jide. Betleyèm ki te toupre Jerizalèm nan te rele Efrata nan tan lontan. Se nan vil sa a Jezi te fèt, egzakteman jan pwofesi a te predi l la! — Matye 2:1.

      Gen yon lòt pwofesi nan Bib la ki te predi yo t ava rele Pitit Gason Bondye a “pou l sot ann Ejip”. Lè Jezi te timoun, yo te mennen l ann Ejip. Apre lanmò Ewòd, yo mennen l tounen. Konsa, pwofesi a akonpli. — Ocheya 11:1; Matye 2:15.

      Nan tablo ki nan paj 200 an, vèsè yo mete anba tit “Pwofesi” a gen detay ki konsène Mesi a. Tanpri, konpare yo ak vèsè yo mete anba tit “Akonplisman” an. Sa pral ede w kwè plis toujou Pawòl Bondye a se verite.

      Etan w ap egzamine vèsè sa yo, pa bliye yo te ekri vèsè pwofetik yo sa gen plizyè santèn ane anvan nesans Jezi. Men sa Jezi te di: “Tout bagay ki ekri konsènan mwen menm nan lwa Moyiz la, nan Pwofèt yo ak nan Sòm yo dwe akonpli.” ​(Lik 24:44). Ou ka verifye sa nan pwòp bib pa w: yo te vrèman akonpli, e nan mwenn ti detay!