ÈD POU FANMI | FASON POU N LEVE PITIT NOU
Rezo sosyal yo — 2yèm pati: Aprann pitit ou evite danje ki genyen sou rezo sosyal yo
Piske gen anpil danje nan sèvi ak rezo sosyal yo, gen anpil paran ki deside pa kite pitit yo sèvi avèk yo. Men, si w pèmèt pitit ou sèvi ak rezo sosyal yo, ki jan w ka ede l evite efè negatif yo toutpandan l ap aprann sèvi avèk yo yon fason ki responsab?
Nan atik sa a
Sa pitit ou panse ki enpòtan
Sa w dwe konnen: Piske l posib pou yon moun vin esklav rezo sosyal yo, pitit ou ka bezwen w ede l kontwole kantite tan li pase sou yo.
Prensip Bib la bay: “Rekonèt bagay ki pi enpòtan yo.” — Filipyen 1:10.
Fè yon ti reflechi: Èske pitit ou sèvi ak rezo sosyal yo nan moman li ta dwe ap dòmi, ap fè travay lekòl oswa ap pase tan ak fanmi an? Selon moun k ap fè rechèch yo, yon adolesan ta dwe pase anviwon nevèdtan ap dòmi chak swa. Men an jeneral, adolesan yo ki pase plizyè èdtan sou rezo sosyal yo dòmi mwens pase setèdtan chak swa.
Sa w ka fè: Pale avèk pitit ou sou enpòtans pou yo fikse priyorite epi ede yo wè sajès ki genyen lè yo fikse limit sou kantite tan yo pase sou rezo sosyal yo. Etabli bonjan prensip tankou pou yo pa itilize aparèy nan chanm yo nan moman pou yo dòmi. Objektif ou antanke paran se ede pitit ou gen metriz, ki se yon kalite k ap itil li lè l vin gran. — 1 Korentyen 9:25.
Santiman pitit ou
Sa w dwe konnen: Lè pitit ou wè foto lòt moun poste apre yo fin travay foto sa yo pou fè tèt yo parèt pi bèl oswa ki montre sèlman bèl bagay y ap fè nan lavi yo, sa ka fè pitit ou santi l tris.
Prensip Bib la bay: “Sispann anvye sò moun.” — 1 Pyè 2:1.
Fè yon ti reflechi: Èske rezo sosyal yo fè pitit ou konpare aparans fizik li ak lòt moun? Èske pitit ou panse lòt moun ap byen mennen, men lavi l pa enteresan?
Sa w ka fè: Pale avèk pitit ou sou danje ki genyen nan fè konparezon. Sonje sa ka afekte tifi yo plis pase tigason yo paske an jeneral tifi yo bay zanmitay ak aparans fizik plis enpòtans. Ou ka menm konseye pitit ou pou l pran yon ti poz nan itilize rezo sosyal yo. Men sa yon jèn ki rele Jacob di: “Pandan yon tan, m te efase aplikasyon rezo sosyal yo sou aparèy mwen. Sa te ede m fè ajisteman nan priyorite m yo ak fason m wè tèt mwen ak lòt moun.”
Fason pitit ou aji lè l sou Entènèt
Sa w dwe konnen: Yo konn konpare sèvi ak rezo sosyal yo avèk lè yon moun ap viv lavi l devan yon foul. Li toutafè nòmal pou moun yo mal konprann youn lòt e pou gen hinghang nan mitan yo.
Prensip Bib la bay: “Se pou nou retire tout kalite rankin malveyan lakay nou ansanm ak kòlè ak move san. Sispann rele sou moun, sispann joure moun [...] Se pou nou aji byen youn ak lòt.” — Efezyen 4:31, 32.
Fè yon ti reflechi: Èske akoz rezo sosyal yo pitit ou vin mele nan tripotay, fè kont oswa pale yon fason ki blese santiman lòt moun?
Sa w ka fè: Montre pitit ou fason pou l byen aji lè l sou Entènèt. Men sa liv Digital Kids la fè konnen: “Sa fè pati travay nou antanke paran pou n aprann pitit nou yo li pa nòmal pou yo aji yon fason ki mechan ni sou Entènèt ni fasafas.”
Sonje rezo sosyal yo pa yon nesesite e se pa tout paran ki kite pitit yo sèvi avèk yo. Si w pèmèt pitit ou sèvi ak rezo sosyal yo, asire w li gen ase matirite pou l fikse limit sou kantite tan li pase sou yo, pou l toujou kenbe bonjan zanmitay e pou l evite gade bagay ki pa kòrèk.