1 Aprann fè Bib la konfyans

“Tou sa ki ekri nan Liv la, se nan Lespri Bondye a yo sòti. Y’ap sèvi pou moutre moun verite a, pou konbat moun ki nan lerè, pou korije moun k’ap fè fòt.”—2 Timote 3:16.

KI PWOBLÈM KI PREZANTE? Anpil moun panse Bib la se senpleman yon liv ki gen sajès lèzòm ladan l. Genyen ki panse istwa li rakonte yo pa egzak. Gen lòt moun ki pretann konsèy Bib la bay yo pa itil moun oswa yo pase mòd.

KI SA POU W FÈ? Souvan, moun ki pa gen konfyans nan Bib la oswa ki panse li pa yon liv ki kapab itil moun anyen pa pran tan pou yo egzamine l pèsonèlman. Yo annik repete sa yo tande lòt moun ap di. Sepandan, men sa Labib di: “Yon moun sòt ap kwè tou sa yo di l. Men, moun ki gen konprann veye kote l’ap mete pye l.” —Pwovèb 14:15.

Olye pou w aksepte sa lòt moun ap di san w pa poze kesyon, èske li pa t ap pi bon pou w suiv egzanp kretyen nan premye syèk la ki t ap viv nan Bere yo, yon zòn ki nan nò Lagrès jodi a? Yo pa t annik aksepte sa lòt moun t ap di yo. Okontrè, Bib la fè konnen “chak jou yo [te] egzaminen sa ki te ekri nan Liv la pou wè si sa Pòl t’ap di yo a se vre”. (Travay 17:11.) Annou egzamine yon fason brèf de rezon ki fè nou kapab gen konfyans Bib la se Pawòl Bondye enspire a.

Istwa yo rakonte nan Bib la egzak. Ofiramezi ane ap pase, moun ki pa fè Bib la konfyans yo kontinye pa kwè non moun ki site ladan l yo ak non kote li mansyone yo egzak. Men, toujou gen prèv ki montre moun sa yo pa gen rezon pou yo pa kwè istwa Labib rakonte yo fyab.

Pa egzanp, pandan yon epòk, gen kèk biblis ki te gen dout sou egzistans yon wa asiryen yo rele Sagon. Yo pale de li nan Izayi 20:1. Men, nan ane 1840 yo, gen akeyològ ki te dekouvri palè wa sa a. Kounye a, Sagon se youn nan wa asiryen moun pi byen konnen.

Gen kèk moun ki te mete an dout egzistans Pons Pilat, gouvènè women ki te bay lòd pou yo touye Jezi a (Matye 27:1, 22-24). Men, an 1961, yo te dekouvri yon wòch toupre vil Sezare, ann Izrayèl, ki te gen non Pilat sou li ansanm ak pozisyon li te okipe.

Men sa yon jounal (U.S.News & World Report) deklare nan nimewo 25 oktòb 1999, li te pibliye a, konsènan egzaktitid istwa ki nan Bib la: “Akeyoloji jodi a montre byen klè istwa ki nan Ansyen Testaman yo ak istwa ki nan Nouvo Testaman yo egzak. Li bay prèv ki apiye istwa yo rakonte sou patriyach pèp Izrayèl yo, ki apiye sa yo di ki te pase lè Izrayelit yo t ap kite peyi Ejip, sa yo di ki te rive sou rèy David la ak istwa ki montre fason lavi moun yo te ye nan epòk Jezi a.” Se vre lafwa ou gen nan Bib la pa baze sou dekouvèt akeyològ yo fè, men se sèten ou t ap atann pou istwa ki nan yon liv Bondye enspire egzak.

Sajès Bib la gen ladan l itil e li pote byenfè pou moun nan tout domèn. Byen lontan, anvan yo te dekouvri mikwoòganis yo ak wòl yo jwe nan simaye maladi, Labib te gentan bay yon seri prensip ijyèn pou moun suiv, e jis jodi a prensip sa yo itil e yo enpòtan (Levitik 11:32-40; Detewonòm 23:12, 13). Lè manm fanmi yo aplike konsèy Labib ba yo sou fason pou youn trete lòt, yo jwenn plis kè kontan (Efezyen 5:28–6:4). Yon anplwaye k ap viv ann amoni ak prensip biblik yo ap vin yon pi bon anplwaye, e yon patwon k ap viv ann amoni ak prensip sa yo ap vin yon patwon ki pi rezonab (Efezyen 4:28; 6:5-9). Lè yon moun aplike prensip biblik yo, sa bon pou sante l nan domèn afektif tou (Pwovèb 14:30; Efezyen 4:31, 32; Kolosyen 3:8-10). Sandout, se konsèy konsa ki itil nou atann pou nou jwenn nan men Kreyatè nou an.

KI BYENFÈ W AP JWENN? Sajès ki gen nan Bib la kapab menm ede yon moun ki pa t gen eksperyans pou l vin saj (Sòm 19:7). Anplis, yonfwa nou fin mete konfyans nou nan Bib la, li kapab ede nou franchi yon lòt etap k ap ede nou vin gen yon lafwa ki pi solid.

Pou w jwenn plis enfòmasyon, gade nan liv Ki sa Labib anseye toutbonvre? aa, nan chapit 2 a, ki gen tit “Labib: yon liv Bondye ban nou”.

[Nòt anba paj]