Rezon ki fè Bib la chape anba tout danje

Bib la chape anba anpil danje. Se sa k fè ou ka gen yon Bib jodi a e w ka li l. E lè w chwazi yon bon tradiksyon Labib, ou ka sèten se yon kopi tèks orijinal la w ap li, yon kopi ou ka fè konfyansa. Men, kòman Bib la fè pa disparèt malgre deteryorasyon materyèl yo te itilize pou yo fè l yo, yon deteryorasyon ki natirèl, malgre gwo opozisyon moun ki te kont li yo e malgre efò moun fè pou yo chanje mesaj ki ladan l lan? Anplis, byen souvan, li chape yon fason estrawòdinè. Sa k fè liv sa a espesyal konsa?

Anpil moun k ap etidye Labib fè menm konklizyon ak apot Pòl, ki te ekri: “Tout sa ki nan Ekriti yo se Bondye ki enspire yo.” (2 Timote 3:16). Yo kwè Bib la rive chape paske se li sèl ki Pawòl Bondye a e paske Bondye pwoteje l rive jodi a. Finalman, Faizal, nou te pale de li nan kòmansman seri atik sa yo, te deside verifye sa pèsonèlman lè l te etidye Labib. Sa l te dekouvri a te fè l sezi. Nan yon tikras tan, li te aprann gen yon pakèt ansèyman ki gaye nan relijyon ki di yo kretyen yo ki pa nan Bib la. Mete sou sa, jan Pawòl Bondye a montre sa, objektif Bondye genyen pou tè a te touche l.

Men sa li di: “Kounye a, mwen kwè toutbon Bib mwen genyen an se yon kado Bondye ban mwen. Dayè, si Bondye ka fè linivè, èske li pa gen pouvwa pou l ban nou yon liv e pou l pwoteje liv sa a pou nou? Si yon moun ta di lekontrè, li t ap limite pouvwa Bondye genyen, sa vle di li t ap limite pouvwa Toupisan an genyen! Kiyès mwen ye pou m ta fè yon bagay konsa?” — Ezayi 40:8.