Lagè ak gwo chanjman ki gen nan klima a lakòz gen rate manje — Ki sa Bib la di sou sa?

Lagè ann Ikrèn nan, mete ak chanjman ki gen nan klima a, fè gen rate manje toupatou sou tè a. Pwoblèm sa a pi grav nan peyi an devlopman yo kote anpil moun pa ka jwenn ase manje pou yo manje.

“Konfli ki genyen, chanjman nan klima a, pri sous enèji ak lòt bagay fè l difisil pou yo pwodui manje e pou moun jwenn manje.” — António Guterres, Sekretè jeneral Nasyonzini, 17 jiyè 2023.
“Espè yo fè konnen lefètke Larisi pa gen kontra ankò pou l pran manje angren ann Ikrèn pou ekspòte nan lòt peyi, sa fè vin gen plis rate manje e sa lakòz manje vin pi chè nan peyi pòv yo, sitou ann Afrik dinò ak nan Mwayenn Oryan.” — Atalayar.com, 23 jiyè 2023.

Ann wè sa Bib la di sou rate manje ak sa k gen pou rive alavni.

Bib la te anonse t ap gen rate manje

Men sa Jezi te di nan yon pwofesi: “Nasyon pral leve kont nasyon, e wayòm pral leve kont wayòm. Pral gen rate manje.” — Matye 24:7.
Liv Revelasyon an pale de kat moun ki sou cheval yo. Youn nan moun ki sou cheval yo reprezante lagè. Gen yon lòt moun ki sou cheval k ap suiv li ki reprezante grangou, sa vle di yon epòk kote pa t ap gen ase manje e manje t ap chè anpil. “Mwen wè yon chwal nwa. Moun ki te moute l’ la te kenbe yon balans nan men li. Mwen tande yon vwa [...] ki t’ap di: Yon mezi diri pou yon jounen travay. Twa mezi pitimi pou yon jounen travay.” — Revelasyon 6:5, 6, Bib la.

Pwofesi sa yo ki gen rapò ak rate manje ap reyalize jodi a, nan epòk Bib la rele “dènye jou yo”. (2 Timote 3:1.) Pou w aprann plis konsènan “dènye jou yo” ak sa moun ki sou cheval yo reprezante, gade videyo Monn nan chanje depi 1914 epi li atik “Kat moun ki sou cheval yo: Kiyès e ki sa yo reprezante?”

Fason Bib la kapab ede w

Nou jwenn bonjan konsèy nan Bib la ki ka ede n fè fas ak sitiyasyon difisil yo, sa ki gen ladan l pri manje k ap monte ak rate manje. Pou w jwenn kèk konsèy ki ka ede w, gade atik “Fason w ka aprann viv ak mwens lajan”.
Mete sou sa, Bib la fè nou gen espwa bagay yo ap vin pi bon. Li pwomèt rive yon lè “tè a gen pou l chaje ak manje angren” e tout moun ap gen anpil manje pou yo manje (Sòm 72:16). Pou w aprann plis sou espwa Bib la bay pou lavni ak rezon ki fè w ka fè l konfyans, gade atik “Bonjan espwa pou lavni.”