¿Jay i kʼij u kʼibel abal ka tʼájanich alabél an Chabál?

An yajtsiktalábtsik xi xoˈ exom ti watʼel, in olnál abal weˈich ka takʼixin nin Takʼixtal an Okʼoxláb (Lucas 21:10, 11; 2 Timoteo 3:1-5)

In koˈolich tʼajat i kʼij, an Biblia in uluw an yajtsiktalábtsik xi xoˈ exom i chuˈtal. In uluw abal an chakamtsik yab neˈech kin tʼajaˈ ti kʼij nin tátaˈtsik, an atiklábtsik neˈech ka atʼaxméj ani neˈech kin léˈnaˈtsik más an tumín ani an kʼijidhtalábtsik.

Jeye in uluw abal neˈech ka dhiyan an chabál, neˈech ka waˈchin yan i pejextalábtsik, ani kʼaˈínab ani yan i yawláchtsik. Ani jaˈich xowaˈ kʼwajat ti watʼel jechéˈ i kʼij.

Na Jesús in uluw abal koˈol ka olná tin pubél an Chabál an alwaˈ tʼilab kʼal tin kwentaj nin Takʼixtal an Okʼoxláb (Mateo 24:14).

Nin Takʼixtal an Okʼoxláb neˈech kin wixkʼaˈ an atʼaxtaláb (2 Pedro 3:13)

Yabich neˈech ka lej owey, na Jehová neˈech kin wixkʼaˈ ejtal an atiklábtsik xi yab alwaˈ.

Na Satanás ani nin tolmiwáltsik neˈech ka mapyat.

An atiklábtsik xi kin tʼajaˈ ti kwentaj an Okʼoxláb, neˈech ka kʼwajay ba jun i xeˈchintaláb xonti neˈech ka waˈchin i kʼanidhomtaláb, i kʼijidhtaláb ani lujataláb. Ani yabich xitaˈ neˈech ka jikʼey kom ejtal neˈech ka junáxin alwaˈ.