¿Jant’om alwaˈ óltsixtalábtsik waˈach abal wawáˈ?

1. ¿Jant’om alwaˈtalábtsik tu óltsal an Ok’oxláb?

An Ok’oxláb in k’anidhál t’ajat an atiklábtsik ani in léˈ abal ka k’wajaytsik k’ijidh. Jaxtám tin t’ajaˈ an Chabál ani ejtal xowaˈ waˈach. Ani wéˈich i k’ij u k’ibel abal kin wixk’aˈ an at’axtaláb, abal an atiklábtsik tin pubél an Chabál ka k’wajaytsik más alwaˈ. Ka ajay 1 Timoteo 2:3, 4.

An awiltalábtsik yab in ejtowámal kin wixk’aˈ an pejextaláb, an yawlách nibal an chemlá. Por an Ok’oxláb tu óltsal i alwaˈ t’ilab, tu óltsal abal wéˈich i k’ij u k’ibel, abal kin wixk’aˈ an tak’ixtsik xi waˈach techéˈ ti Chabál ani abal kin k’wajbaˈ xi Jajáˈ in k’ál. Anchanˈ an atiklábtsik xi kin t’ajaˈ ti kwentaj an Ok’oxláb neˈech ka k’wajaytsik k’ijidh. Ka ajay 1 Corintios 15:24, ani Revelación (Apokalipsis) 21:3, 4.

2. ¿Jant’ó ti jaˈich lej exbadh jechéˈ i alwaˈ t’ilab?

Abal yabich ka waˈchin i yajtsiktaláb, an Ok’oxláb neˈech kin wixk’aˈ an atiklábtsik xi at’ax (Sofonías 2:3). ¿Ani jowk’i ti neˈech kin t’ajaˈ? An T’okat Dhutslab wejeˈich t’ajat tin ulúmal xowaˈ k’wajat ti wat’el jechéˈ i k’ij, jachanˈ in tejwaˈmedhál abal wéˈich u k’ibel abal kin t’ajaˈ xowaˈ in ulúmal. Ka ajay 2 Timoteo 3:1-5.

3. ¿Janéy koˈol ki t’ajaˈ?

Koˈol ki exóbnaˈ an T’okat Dhutslab abal ki exlaˈ k’al tin kwentaj an Ok’oxláb. Kom jechéˈ jaˈich jelti jun i dhutsadh úw xi jun i tátaˈláb in abtsal nin chakámil, kom tajaˈ tu óltsal janti ku k’wajay k’ijidh xoˈ jechéˈ i k’ij, ani xowaˈ koˈol ki t’ajaˈ abal ki ejto ki koˈoy an xeˈchintaláb abal ech’ek’ij. Jaˈich tsubax abal yab ejtal an atiklábtsik neˈech ka kulbé, max tatáˈ ka exóbnaˈ an Biblia, por bélk’i yab ka jilaˈ an ta exóbal, kom an labt’ajaxtalábtsik xi an Ok’oxláb neˈech ti pidhaˈ jaˈich lej alwaˈ. Ka ajay 2 Timoteo 3:12 ani Revelación (Apokalipsis) 14:6, 7.