¿Jitaˈ jaˈich an Ok’oxláb?

1. ¿Jant’ó tin tomnál ki k’ak’naˈ an Ok’oxláb?

An Ok’oxláb in t’ajámal ejtal xowaˈ xi waˈach. Jajáˈ yab in koˈyám in tujtal nibal in koˈol in ok’ontal (Salmo 90:2). Ani tu óltsal an alwaˈ t’ilab xi k’wajat ban Biblia (1 Timoteo 1:11). Kom Jajáˈ tu pidhámal an ejattaláb, jaxtám tin tomnál ki k’ak’naˈ tokot Jajáˈ ani ki t’ajaˈ xowaˈ in léˈ. Ka ajay Revelación (Apokalipsis) 4:11.

2. ¿Janti jaˈich an Ok’oxláb?

An Ok’oxláb yab in junwal janti wawáˈ, Jajáˈ jaˈich jun i espíritu, jaxtám ni jun i atikláb in chuˈúmal (Juan 1:18; 4:24). Por bélk’i i ejtowal ki exlaˈ janti jaˈich Jajáˈ. Tam i chuˈtal ejtal xowaˈ in t’ajámal, janti an walilábtsik ani an wich, tu óltsal abal tu k’anidhál t’ajat. Ani i exbayal abal Jajáˈ jaˈich lej chalpadh, tam i telál xowaˈ waˈach walk’iˈ ani ejtal xowaˈ xi waˈach ti chabál, ani jeye in tejwaˈmedhál abal in koˈol t’ajat i chápláb. Ka ajay Romanos 1:20.

I ejtowal jeye ki exlaˈ an Ok’oxláb tam ki ajay an T’okat Dhutslab, tajaˈ tu óltsal janéy in kulbetnál ani janéy yab in kulbetnál, ani xowaˈ in ach’ál tam an atiklábtsik in t’ajál jun xataˈ. Ka ajay Santiago 4:6 ani 1 Juan 4:8.

3. ¿In koˈol jun in bij an Ok’oxláb?

Na Jesús in uluw: «Tátaˈ xi k’wajat tuwaˈ walk’iˈ ka t’okédhá na bij» (Mateo 6:9, TNM). An Ok’oxláb u bijyáb yan xanti, por tokot in koˈol jun in lej bij. Ti láb káw ani ti tének u ulwáb Jehová, ani juntsikíl u ulwáb jeye Yavé, por ti k’eˈet i káwintalábtsik júnich tu ulwáb (Mateo 5:16). Ka ajay Salmo 83:18 (82:19 ba juntsik i Biblia).

Ba yan i Biblia wixk’adh an bijláb Jehová, ani jalk’udh k’al xi yab i lej bijlábtsik janti Ok’oxláb o Señor. Por tam ti dhutsan an T’okat Dhutslab, nin bij an Ok’oxláb k’wajat wiˈik dhutsadh 7,000 in yáníl. Ani tam ti na Jesús in óltsi an atiklábtsik tin kwentaj an Ok’oxláb, ech’ek’ij in éynantsi tin bij (Romanos 15:11). Ka ajay Juan 17:26, TNM.

Ka chuˈuw an video ¿In koˈol jun nin bij an Ok’oxláb?

4. ¿Tu t’ajál ti kwentaj an Ok’oxláb?

Max na Jehová lej tsubax tu k’anidhál, ¿jant’ó tin jilál ki wat’naˈ i yajtsiktaláb? Juntsik i atiklábtsik in ulal abal an Ok’oxláb tu taktamiyal abal ki tejwaˈmédhaˈ max lej tsubax i k’anidhál. Por jechéˈ, yab tsubax. Ka ajay Santiago 1:13.

Na Jehová tu jilámal ki takuy ti kwetémtal janéy i léˈ ki t’ajaˈ. Xowaˈ más alwaˈ ki t’ajaˈ jaˈich, ki t’ajaˈ xowaˈ an Ok’oxláb in léˈ (Josué 24:15). Por yan i atiklábtsik in takwyámal kin t’ajaˈ xowaˈ yab alwaˈ, jaxtám ti waˈach t’ajat i at’axtaláb. Na Jehová in yajnál kin chuˈuw ejtal xowaˈ k’wajat ti wat’el. Ka ajay 1 Pedro 5:7.

Kom na Jehová lej tsubax tu k’anidhál, jaxtám neˈech kin wixk’aˈich an at’axtaláb. Jajáˈ in choˈób alwaˈ jant’ó tin jilál ki wat’naˈ i yajtsiktaláb. Lejat koˈol ki aytsi jun i wéˈ. Ban ajumtaláb 8 neˈech ki exóbnaˈ tin kwentaj jechéˈ. Ka ajay 2 Pedro 2:9 ani 3:7, 13.

5. ¿Janti i ejtowal ku utey k’al an Ok’oxláb?

Na Jehová tu k’anidhál t’ajat ani tu kaniyal ki ólantsi (Salmo 65:2; 145:18). Wawáˈ u walablom ani jaxtám juntsikíl i ach’ál t’ojláb ki t’ajaˈ xowaˈ in kulbetnál, por bélk’i in t’ajál ti kwentaj an chápláb xi i t’ajál, ani in léˈ tu pakwlantsi abal ki t’ajaˈ ti jaˈúb. Ka ajay Santiago 4:8 ani 1 Juan 1:9.

An Ok’oxláb tu pidhámal an ejattaláb, jaxtám tin tomnál ki k’anidhaˈ más kej jun i atikláb. Tam i exóbnal k’al tin kwentaj Jajáˈ ani tam i t’ajál ti kwentaj xowaˈ tu kontsal, i tejwaˈmedhál abal i k’anidhál. Max ki t’ajaˈ jechéˈ, neˈech tám ku k’wajay más utat k’al na Jehová. Ka ajay 1 Timoteo 2:4 ani 1 Juan 5:3.