¿Tsubax jaˈich in chalápil an Ok’oxláb xi k’wajat ban T’okat Dhutslab?

1. ¿Jitaˈ in chalápil xi k’wajat ban T’okat Dhutslab?

An alwaˈ óltsixtaláb xi tu utsál, kej neˈech ku k’wajay abal ech’ek’ij techéˈ ti Chabál k’wajat ban Biblia (Salmo 37:29). An Biblia in koˈol 66 i ts’itsik libro xi dhutsan k’al 40 i iniktsik xi takwyat k’al an Ok’oxláb. In koˈolich tres mil quinientos i tamub na Moisés in tuju kin dhutsaˈ an Biblia, jajáˈ in dhutsaˈ an ok’ox bóˈ i libro. Ani in koˈolich mil novecientos i tamub na Juan in dhutsaˈ in ok’ontal an Biblia. An Ok’oxláb in ijtsi an iniktsik k’al in t’okat cháplábil abal kin dhutsaˈ an T’okat Dhutslab (2 Samuel 23:2). Jaxtám ejtal xowaˈ k’wajat dhutsadh ban T’okat Dhutslab, jaˈich in chalápil na Jehová ani yab in chalápil an iniktsik. Ka ajay 2 Timoteo 3:16 ani 2 Pedro 1:20, 21.

Ka chuˈuw an video ¿Jitaˈ in chalápil xi k’wajat ban Biblia?

2. ¿Jant’ó ti ejtowal ki belaˈ kej an T’okat Dhutslab in ulal an tsubaxtaláb?

Kom ejtal xowaˈ in ulal an Biblia ech’ek’ij u támnal (Josué 23:14). Jaxtám ti choˈób kej jaˈich in Káwintal an Ok’oxláb, kom jechéˈ yab xitaˈ más in ejtowal kin t’ajaˈ, abal tokot an Ok’oxláb jaˈich xitaˈ in ejtowal kin t’ajaˈ ejtal xowaˈ in ulúmal. Ka ajay Tito 1:2, 3.

Max an Biblia jaˈich in Káwintal an Ok’oxláb, jaxtám ti aytsal kej ech’ek’ij kin uluw an tsubaxtaláb. Jechéˈ i libro buk’udh ba yan i káwintalábtsik tin pubél an Chabál. An Biblia wejeˈich t’ajat ti dhutsnék, por xowaˈ in ulal in junwal k’al an ciencia. Ani xi 40 i dhutsumtsik yab exláxin, por bélk’i ech’ek’ij in koˈoy juniniˈ i chalap.a An Biblia in koˈol an chápláb abal kin jalk’untsi tin xeˈchintal an atiklábtsik. Ani in tejwaˈmedhál abal na Jehová tu k’anidhál t’ajat. Jaxtám ti yan i atiklábtsik in belál abal jaˈich nin Káwintal an Ok’oxláb. Ka ajay 1 Tesalonicenses 2:13.

Ka chuˈuw an video ¿Jant’ó ti ejtowal ki belaˈ abal Biblia in ulal an tsubaxtaláb?

3. ¿Janéy in ulal an T’okat Dhutslab?

An Biblia in ulal jun i alwaˈ óltsixtaláb. In ulal abal an Ok’oxláb neˈech kin labt’ajaˈ an atiklábtsik. Jeye in ulal kej an ok’ox k’wajíltsik in k’ibdhaˈ an labt’ajaxtalábtsik xi in koˈoy ban Alabél Chabál. Por na Jehová neˈech kin alwaˈmédhaˈ an xeˈchintaláb. Ka ajay Revelación (Apokalipsis) 21:4, 5.

An Biblia in koˈol i tak’ixtalábtsik ani abatnaxtalábtsik. Ani tu utsál janti in tolmiyámal an atiklábtsik, anchanaˈ i ejtowal ki choˈóbnaˈ janti jaˈich an Ok’oxláb. Ani jeye, an Biblia tu ok’tsal janti i ejtowal ki exlaˈ ani ki jaˈúbnaˈ. Ka ajay Romanos 15:4; Santiago 2:23, ani 4:8.

4. ¿Janéy in ejtowal tu tolmiy ki exbay an T’okat Dhutslab?

Abal na Jesús kin tajk’aˈ xowaˈ in ulal an T’okat Dhutslab, jajáˈ in ulalak juntsik i versículos ani in wiltsi an atiklábtsik abal kin ejto kin exbay. Jechéˈ i folleto t’ajadh jeye anchanˈ, abal ki ejto ki exbay an T’okat Dhutslab. Ka ajay Lucas 24:27, 45.

I belál abal tatáˈ a léˈ ka choˈóbnaˈ k’al tin kwentaj an Ok’oxláb. Por yab ejtal in léˈ kin choˈóbnaˈ, juntsik asta u chakúltsik. Por yab ka jilaˈ kej jachanˈ i atiklábtsik ti t’ajaˈ ka jilaˈ ta exóbal. An Biblia in ulal kej xitaˈ kin exóbnaˈ k’al tin kwentaj an Ok’oxláb neˈech ka k’wajay abal ech’ek’ij. Ka ajay Juan 17:3.