AJUMTALÁB 4
¿Jitaˈ jaˈich na Jesús?
1. ¿Janti tujey nin xeˈchintal na Jesús?
¿Janéy in t’ajaˈ na Jesús abal an atiklábtsik kin kulbetnaˈ ka k’wajay k’al jajáˈ? (MATEO 11:29; MARCOS 10:13-16)
Xowaˈ ok’ox in t’ajaˈ na Jehová jaˈich na Jesús, ok’ox ti ka tsích ti Chabál, jajáˈ k’wajay tuwaˈ walk’iˈ janti jun i ángel (Juan 8:23). Tayíl na Jesús in tolmiy nin Tátaˈ kin t’ajaˈ ejtal xowaˈ xi waˈach (Proverbios 8:22, 23, 30). Na Jehová in t’ajaˈ kwetém na Jesús, jaxtám ti an T’okat Dhutslab in bijyal na Jesús nin «junkax Chakámil» an Ok’oxláb (Juan 1:14). Ani jeye u bijyáb «an Káw», kom káwin k’al xowaˈ in léˈnaˈ kin ólnaˈ nin Tátaˈ. Ka ajay Colosenses 1:15, 16 TNM.
2. ¿Jant’ó ti tsích na Jesús techéˈ ti Chabál?
An Ok’oxláb in t’ajaˈ ka waˈchin na Jesús ti Chabál, Jajáˈ in k’wajbaˈ nin Chakámil ba nin tsukul jun i tsidhan judía xi in bij ta María. Jaxtám ti choˈób abal na Jesús yab in tátaˈ jun i inik xi techéˈ ti Chabál (Lucas 1:30-35). Na Jesús tsích k’al óx i chalap: 1) kin ólnaˈ an tsubaxtaláb k’al tin kwentaj an Ok’oxláb, 2) ti ku óltsi janti ki t’ajaˈ in kulbétal an Ok’oxláb tam ki tametnaˈ i t’eˈpintalábtsik, ani 3) kin pidhnaˈ nin ejattal abal kin jalbiy an «loˈeltaláb». Ka ajay Mateo 20:28.
3. ¿Jant’ó ti yejentsal ku loˈwat?
Abal ka loˈwat jun xitaˈ abal yab ka chemdhá u pidhnáb jun i jalbixtaláb, jechéˈ jaˈich jun i loˈoxtaláb (Éxodo 21:29, 30). Na Jehová yab in léˈ wiˈik abal an atiklábtsik ka yejchelméj ani ka chemech. I choˈób jechéˈ kom na Jehová in utsaˈ na Adán, max ka walbin neˈech ka chemech. Max yabak walbinék in ejtowámak ka k’wajay abal ech’ek’ij (Génesis 2:16, 17; 5:5). An T’okat Dhutslab tu ok’tsal abal an chemlá, k’al junk’i tokot i inik ti «tujey». Kom na Adán walbin, jaxtám ejtal an atiklábtsik u chemel. Jaxtám ti yejentsal ku loˈwat. Ka ajay Romanos 5:12 ani 6:23.
Por, ¿jitaˈ in ejtowalak tu loˈo k’al an chemlá? Tam u chemel i jalbiyal ni walab, por kom u walablom, ni jun i atikláb in ejtowal kin jalbintsi nin walab xi k’eˈet xitaˈ. Ka ajay Romanos 3:23.
4. ¿Jant’ó ti chemech na Jesús?
Na Jesús yab chemech abal kin jalbiy nin walab, kom jajáˈ yab u walablom, jajáˈ chemech abal kin jalbintsi nin walab xi k’eˈettsik. An Ok’oxláb in abaˈ nin Chakámil abal ka chemech k’al wawáˈ ti kwentaj, anchanˈ tin tejwaˈmédhaˈ abal tu k’anidhál t’ajat. Na Jesús in t’ajaˈ ti kwentaj nin Tátaˈ ani chemech abal kin jalbiy ni walab, anchanˈ jeye tin xalk’aˈ abal tu k’anidhál. Ka ajay Juan 3:16 ani Romanos 5:18, 19.
Ka chuˈuw an video ¿Jant’ó ti chemech na Jesús?
5. ¿Janéy k’wajat in t’ajál na Jesús xoˈ?
Tam ti na Jesús k’wajay techéˈ ti Chabál in jeldhaˈ i yaˈultsik, in witsbantsi tin xeˈchintal an chemélomtsik ani in tolmiy xitaˈkich i atikláb xi k’wajatak in wat’nál i yajtsiktaláb, k’al xowaˈ in t’ajaˈ ti wejeˈ in tejwaˈmédhaˈ xowaˈ neˈech kin t’ajaˈ k’al an atiklábtsik xi kin t’ajaˈ ti kwentaj an Ok’oxláb (Mateo 15:30, 31; Juan 5:28). Tam ti na Jesús chemech, an Ok’oxláb in witsbantsi tin xeˈchintal janti jun i ángel abal ka k’wajay tuwaˈ walk’iˈ (1 Pedro 3:18).Tayíl na Jesús in aytsi ba nin eját nin Tatáˈ abal ka pidhan an awiltaláb ti tak’ix (Hebreos 10:12, 13). Xoˈ na Jesús jaˈich jun i tak’ix tuwaˈ walk’iˈ ani nin aykóliltsik k’wajat in olnál jechéˈ i alwaˈ t’ilab tin pubél an Chabál. Ka ajay Mateo 24:14 ani Revelación (Apokalipsis) 11:15.
Yabich neˈech ka lej owey, na Jesús neˈech kin éynaˈ an awiltaláb xi pidhan k’al nin Tátaˈ abal kin wixk’aˈ an atiklábtsik xi at’ax ani an yajtsiktalábtsik xi jajáˈtsik in t’ajál ka waˈchin. Ejtal xitaˈ kin belaˈ ani kin t’ajaˈ ti kwentaj na Jesús, neˈech ka k’wajay kulbél techéˈ ti Chabál tam ka wenk’oyatich labidh junt’ak’i. Ka ajay Mateo 5:5.