¿Janéy in chalpayal kin t’ajaˈ an Ok’oxláb k’al an Chabál?

1. ¿Abal jant’ó tin t’ajaˈ an Ok’oxláb an Chabál?

Na Jehová in t’ajaˈ an ángeles abal ka k’wajay tuwaˈ walk’iˈ. Ani in t’ajaˈ an Chabál abal ka k’wajay an atiklábtsik, jaxtám tam tin t’ajaˈ na Adán ani na Eva, in t’ajaˈ abal ka k’wajay techéˈ ti Chabál (Job 38:4, 7). Na Jehová in k’wajbaˈ na Adán ani na Eva ba jun i labidh wichlom chabál xi in bijak Edén (Génesis 2:15-17). Ani jeye, nin chakámiltsik neˈechak kin ejto kin koˈoy an xeˈchintaláb abal ech’ek’ij. An Biblia in ulal abal na Jehová yab jalk’unenek, jaxtám ti Salmo 37:29 in ulal: «Xi lujattsik neˈech kin dhabalnaˈ an chabál, ani neˈech ka k’wajaytsik tajaˈ abal ech’ek’ij». Ka ajay Hechos 17:26.

An alabél wichlom chabál, jaˈichak wiˈik tokot ba jun pejeˈ i chabál. Na Adán ani na Eva in koˈolak kin pubédhaˈ an labidh wichlom chabál k’al nin chakámiltsik (Génesis 1:28). An Chabál yab jayk’ij neˈech ka wixk’á, ech’ek’ij neˈech ka k’wajay abal an atiklábtsik. Ka ajay Salmo 104:5.

Ka chuˈuw an video ¿Jant’ó tin t’ajaˈ an Ok’oxláb an Chabál?

2. ¿Jant’ó ti jechéˈ i k’ij an Chabál yab jaˈich jun i alabél wichlom chabál?

Na Jehová in káldhaˈ na Adán ani na Eva kom yabtsik bélkaxin (Génesis 3:23, 24). Jaxtám xoˈ yab u k’wajat ba jun i labidh wichlom chabál ani ni jun i atikláb in ejtowámal kin lejkiy. Ani an T’okat Dhutslab in ulal: «An chabál pidhnats tin k’ubak an at’ax» (Job 9:24).

Na Jehová yab in uk’tsámal xowaˈ xi in léˈak kin t’ajaˈ tin tujtal k’al an Chabál. Kom Jajáˈ jaˈich xi más pulek tin pubél an Chabál, jaxtám neˈech kin t’ajaˈ xowaˈ in ulúmal (Isaías 45:18). Ban k’ij xi taˈtál na Jehová neˈech kin t’ajaˈ kej an atiklábtsik ka k’wajay kulbél, anchanˈ xanti in léˈak k’al an ok’ox k’wajíltsik. Ka ajay Mateo 5:5.

3. ¿Janti neˈech ka lejkiyat an Chabál?

Kom na Jesús jaˈich an Tak’ix ba nin Tak’ixtal an Ok’oxláb, jajáˈ neˈech kin tajáˈ an Chabál lej alabél. Ban pejextaláb xi in bij Armagedón, na Jesús junax k’al an ángeles neˈech kin wixk’aˈ an atiklábtsik xi yab in léˈ kin t’ajaˈ ti kwentaj na Jehová. Ba jachanˈ i pakwenib, an atiklábtsik xi kin t’ajaˈ ti kwentaj na Jehová neˈech ka loˈey, kom na Jesús neˈech kin beletnaˈ. Tám, na Jesús neˈech kin mapuy ti mil i tamub na Satanás, xi in k’ambiy na Eva. Ani tám, an atiklábtsik neˈech ka k’wajay abal ech’ek’ij ban Alabél Chabál. Ka ajay Revelación (Apokalipsis) 20:1-3 ani 21:3, 4.

4. ¿Jowk’i neˈech ka taley an yajtsiktaláb?

¿Jowk’i neˈech kin wixk’aˈ an Ok’oxláb an at’axtaláb? Na Jesús in uluw an «exól» xi neˈech ki chuˈuw tam wéˈich ka ulich in ok’ontal an k’ij. Xowaˈ k’wajat i chuˈtal jechéˈ i k’ij, in tejwaˈmedhál abal «u k’unelich an pakwenib». Ka ajay Mateo 24:3, 7-14, 21, 22.

Tam na Jesús kin tak’iy an Chabál ti mil i tamub, jajáˈ neˈech kin wixk’aˈ ejtal an yajtsiktaláb (Isaías 9:6, 7; 11:9). Ani kom jajáˈ neˈech ti ok’lek paleˈ neˈech kin wixk’antsi tin walab an atiklábtsik xi kin t’ajaˈ ti kwentaj na Jehová. K’al nin tolmixtal na Jesús, na Jehová neˈech kin wixk’aˈ an yawlách, an chemlá ani ejtal an yajtsiktaláb xi waˈach ani tám neˈech ka t’ájanich an káw xi ti Isaías 33:24 xi in ulal: «Ani ni jun i k’wajíl neˈech kin uluw: ‹In k’wajat tin yaˈul›. An atiklábtsik xi ka k’wajay ban chabál jaˈich xi neˈech ka pakwlantsat tin walab». Ka ajay 1 Corintios 15:26.

5. ¿Jitaˈtsik neˈech ka k’wajay ban Alabél Chabál?

An atiklábtsik xi kin t’ajaˈ ti kwentaj na Jehová neˈech ka k’wajay ban Alabél Chabál (1 Juan 2:17). Na Jesús in abaˈ nin aykóliltsik abal kin aliy an atiklábtsik abal kin ok’tsi janti kin kulbédhaˈ an Ok’oxláb. Xoˈ jechéˈ i k’ij na Jehová k’wajat in ok’tsal yan i atiklábtsik abal ka k’wajay ban Alabél Chabál (Sofonías 2:3). Ban Atáj xonti u junkunal an Óltsixtsik k’al a Jehová, an atiklábtsik k’wajat in exobnál kin t’ajaˈ ti más alwaˈ tomkíltsik ani tátaˈlábtsik. An chakamtsik ani an tátaˈlábtsik k’wajat in k’ak’nál junax na Jehová, ani k’wajat in exobnál janti in ejtowal ka tolmiyat k’al xowaˈ k’wajat in exobnál ban Biblia. Ka ajay Revelación (Apokalipsis) 15:4.