¿Janti i ejtowal ku utey k’al an Ok’oxláb?

1. ¿In ach’ál an Ok’oxláb ejtal an olábtsik?

An Ok’oxláb in kaniyal ejtal an atiklábtsik abal ka ólantsat (Salmo 65:2). Por jechéˈ yab in léˈ kin uluw abal in ach’ál ejtal an olábtsik. An T’okat Dhutslab in ulal abal max jun i inik in at’ax t’ajtsal nin tomtal, yab u axtsinal tin olábil (1 Pedro 3:7). Ani jeye, tam ti an israelitatsik in t’ajálaktsik xowaˈ yab alwaˈ, an Ok’oxláb yab in axtsi an tin olábiltsik. Jaxtám tin utsaˈ ti Isaías 1:15: «Ani tam tatáˈtsik a ch’abál na k’ubak, u chinál nu wal. Aunque ka t’ajaˈtsik yan i oláb, yab u ach’ál; na k’ubaktsik ts’utsenek k’al an xich’ xi a wak’lámaltsik». Por na Jehová in axtsal tin olábil an atikláb xi in walámal, max tsubax k’wajat lej t’eˈpidh k’al xowaˈ in t’ajámal, ani in léˈ kin jilaˈ kin t’ajaˈ xowaˈ yab alwaˈ. Ka ajay Hechos 3:19.

Ka chuˈuw an video ¿In ach’ál an Ok’oxláb ejtal an olábtsik?

2. ¿Janti koˈol ku olách?

Tam i t’ajál i oláb i k’ak’nál an Ok’oxláb, jaxtám koˈol ki ólantsi tokot na Jehová (Mateo 4:10; 6:9). Jajáˈ yab in léˈ ki utsaˈ xowaˈ k’wajat dhutsadh ba jun i úw nibal ki wíts’k’ók’liy jayéchk’i i káw, más alwaˈ, Jajáˈ in léˈ ki t’iltsi xowaˈ i ach’ál ba ni itsích. Ani kom wawáˈ u walablom yejat ki ólantsi an Ok’oxláb k’al tin bij na Jesús, kom jajáˈ in pidhnaˈ tin baˈ abal ku pakwlantsat ti walab (Juan 14:6). Ka ajay Mateo 6:7 ani Filipenses 4:6, 7.

An Ok’oxláb Jehová tu axtsal ni olábil asta tam i t’ajál ti chalápilk’i (1 Samuel 1:12, 13). Jajáˈ tu kaniyal ki t’ajtsi ti oláb ech’ek’ij, tam dhajaw, tam wákal, tam neˈech tu k’apul ani jeye tam i wat’nál i t’eˈpintalábtsik. Ka ajay Mateo 15:36 ani 1 Pedro 5:7.

3. ¿Jant’ó tu junkunal an belomtsik xi tsubax?

U k’wajíl k’al i atiklábtsik xi yab in belál an Ok’oxláb, ani xi in labídhnál xowaˈ Jajáˈ in ulúmal neˈech kin t’ajaˈ techéˈ ti Chabál, jachanˈ in t’ajál abal ki ach’aˈ t’ojláb ku utey k’al Jajáˈ (2 Timoteo 3:1, 4; 2 Pedro 3:3, 13). Jaxtám ti yejentsal ku junkun k’al i at belomtsik abal ku tolmíxin ani ku k’ijidhmédháxin jun ani jun. Ka ajay Hebreos 10:24, 25.

Tam u junkunal k’al xi in k’ak’nál na Jehová, tu tolmiyal ku utey k’al Jajáˈ. Ani jeye, an junkuntalábtsik k’al an Óltsixtsik k’al a Jehová, tu tolmiyal ku líkédhántsíxin ti itsích jun ani jun k’al an belomtaláb xi i koˈol. Ka ajay Romanos 1:11, 12.

4. ¿Janti a ejtowal ki utey k’al an Ok’oxláb?

Xowaˈ neˈech ti tolmiy ki utey k’al na Jehová jaˈich, ka lej chalpay k’al i kwentaj xowaˈ a exobnámal ban Biblia, janti an tak’ixtalábtsik xi tu pidhál, xowaˈ in t’ajámal ani xowaˈ neˈech kin t’ajaˈ ban k’ij xi taˈtál. Tam ka ólantsi ani ka chalpay k’al i kwentaj xowaˈ an Ok’oxláb ti ok’tsal, neˈech ti tolmiy ka exlaˈ nin k’anidhomtalábil ani neˈech ti tolmiy ka chuˈuw abal Jajáˈ jaˈich xi más chalpadh. Ka ajay 1 Timoteo 4:15, 16.

Tokot neˈech ka ejto ki k’wajay utat k’al an Ok’oxláb, max lej tsubax ka belaˈ Jajáˈ ani xowaˈ ti ok’tsal. An belomtaláb jaˈich janti jun i chakam wich xi in yejentsal ka beletná ani ka wak’yat tsudhey ka tsudhey abal ka pubey ani ka k’wajay ejat, anchanaˈ jeye u wat’el k’al na belomtal, abal ka k’wajay ejat a yejentsal ka chalpay k’al i kwentaj jant’ó ta belál xowaˈ an Ok’oxláb ti ok’tsal. Ka ajay Mateo 4:4 ani Hebreos 11:1, 6.

5. ¿Jant’om alwaˈtalábtsik neˈech ka bach’uw max ki utey k’al an Ok’oxláb?

An alwaˈtaláb xi neˈech ka bach’uw jaˈich, kej an Ok’oxláb neˈech ti k’anidhaˈ, kom Jajáˈ in k’anidhál xitaˈ k’al tu k’ak’náb ani jeye neˈech ti beletnantsi ta belomtal ani neˈech ti tolmiy ka bach’uw an xeˈchintaláb xi yab in koˈol in ok’ontal (Salmo 91: 1, 2, 7-10). Jajáˈ tu óltsal xowaˈ yab in tomnál ki t’ajaˈ, ani jeye tu ok’tsal janti i ejtowal ku k’wajay más alwaˈ ti xeˈchintal. Ka ajay Santiago 1:25 ani 4:4, 8.