¿Janti tu tolmiyal an tak’ixtalábtsik xi k’wajat ban T’okat Dhutslab?

1. ¿Jant’ó ti yejentsal ku tak’yat?

Na Jehová jaˈich ni Tátaˈ kom Jajáˈ tu t’ajámal, ani Jajáˈ jaˈich xi más chalpadh. Jeye tu k’anidhál t’ajat ani in léˈ abal ku k’wajay alwaˈ. Jajáˈ yab tu t’ajámal abal ki tak’iy ti baˈ (Jeremías 10:23). Anchanˈ janti an chakamtsik in yejentsal ka tak’yat k’al nin tátaˈtsik, anchanˈ jeye an atiklábtsik in yejentsal ka tak’yat k’al an Ok’oxláb (Isaías 48:17, 18). An tak’ixtalábtsik xi k’wajat ban Biblia, jaˈich jun nin ch’ejwalixtalábil an Ok’oxláb. Ka ajay 2 Timoteo 3:16.

In tak’ixtalábil na Jehová tu ok’tsal janti ku k’wajay más alwaˈ xoˈ jechéˈ i k’ij, ani tu ok’tsal janti i ejtowal ki koˈoy i alwaˈtalábtsik ban k’ij xi taˈtál. Ani kom Jajáˈ tu t’ajámal, jaxtám tin léˈ abal wawáˈ ki t’ajaˈ ti kwentaj nin tak’ixtal. Ka ajay Romanos 15:4 ani Revelación (Apokalipsis) 4:11.

2. ¿Janti tu tolmiyal in Káwintal an Ok’oxláb?

Juntsik i tak’ixtaláb xi tu pidhál an Ok’oxláb tu tolmiyal ki exbay xowaˈ in léˈ ki t’ajaˈ ba ni xeˈchintal, ani tu walkál ki éynaˈ xanti i chalpayal jaˈich más alwaˈ. Por waˈach k’eˈet i tak’ixtalábtsik xi expidh tu abál ki t’ajaˈ jun xataˈ (Deuteronomio 22:8). Abal ki t’ajaˈ ti kwentaj an tak’ixtalábtsik, koˈol ki chalpay alwaˈ abal ki exbay xowaˈ an Ok’oxláb in léˈ ki t’ajaˈ (Proverbios 2:10-12). Jun xanéy xi tu ok’tsal an Biblia jaˈich, kej an Ok’oxláb tu ch’ejwaliyamal ni ejattal. Jechéˈ i tak’ixtaláb in ejtowal tu tolmiy abal ki beletnaˈ ti baˈ tam u xeˈech tu t’ojnal, tam u xeˈech tu belelél ani tam u k’wajat ti k’imaˈ. K’al jechéˈ, an Ok’oxláb tu chalpantsal kej koˈol ku xeˈchin k’al i kwentaj abal yab ki tamu ni jun xataˈ xi yab alwaˈ. Ka ajay Hechos 17:28.

3. ¿Jowaˈ jaˈich xi cháb an tak’ixtalábtsik xi más exbadh?

Na Jesús in uluw cháb i tak’ixtalábtsik xi más exbadh. Xi ok’ox in tejwaˈmedhál abal jant’ó tu k’wajat ejat: in uluw abal jaˈich abal ki exlaˈ, ki k’anidhaˈ ani ki t’ojontsi an Ok’oxláb. Jechéˈ i tak’ixtaláb koˈol ki t’ajaˈ ti kwentaj ba ejtal xowaˈ ki takuy ki t’ajaˈ ba ni xeˈchintal (Proverbios 3:6). Jitaˈtsik kin t’ajaˈ ti kwentaj jechéˈ i tak’ixtaláb, neˈech kin ejto kin t’ajaˈ tin jaˈúb an Ok’oxláb, ka k’wajay kulbél jechéˈ i k’ij, ani ka k’wajay abal ech’ek’ij. Ka ajay Mateo 22:36-38.

An chabtsíl tak’ixtaláb tu tolmiyal abal ku junáxin alwaˈ k’al xi k’eˈettsik (1 Corintios 13:4-7). Max ki t’ajaˈ ti kwentaj jechéˈ i tak’ixtaláb, neˈech tám ki t’ajaˈ janti in t’ajál na Jehová k’al an atiklábtsik. Ka ajay Mateo 7:12 ani 22:39, 40.

4. ¿Janti in ejtowal tu tolmiy an tak’ixtalábtsik xi tu pidhál an Ok’oxláb?

An tak’ixtalábtsik xi k’wajat ban Biblia tu tolmiyal ki koˈoy i k’anidhomtaláb ani ku k’wajay junkudh k’al ni yanél (Colosenses 3:12-14). Jechéˈ i tak’ixtalábtsik in beletnál an yanél abal ka k’wajay alwaˈ, kom an Biblia in ok’tsixnál abal an tomkinéltsik koˈol ka k’wajaytsik junax. Ka ajay Mateo 19:5.

Ki t’ajaˈ ti kwentaj an tak’ixtalábtsik xi tu pidhál an Ok’oxláb, jeye tu tolmiyal ba ni t’ojlábil ani tu tolmiyal ku k’wajay kulbél ba ni xeˈchintal. Kom ba yan i tojlábtsik u leˈnáb i t’ojnaltsik xi kin t’ajaˈ ti kwentaj jechéˈ i tak’ixtaláb, abal kin t’ajaˈtsik xowaˈ in tomnál ani yab ka kwéˈlách (Proverbios 10:4, 26; Hebreos 13:18). An Biblia jeye tu ok’tsal ki aliy ok’ox nin jaˈublábil an Ok’oxláb ani ku k’wajay kulbél k’al xowaˈ xi koˈol. Ka ajay Mateo 6:24, 25, 33 ani 1 Timoteo 6:8-10.

An tak’ixtalábtsik xi k’wajat ban Biblia, jeye tu tolmiyal abal ku k’wajay alwaˈ ti baˈ; janti an tak’ixtaláb k’al tin kwentaj an uch’áchnich, tu tolmiyal abal yab ku yawlách ani yab ki tamu xowaˈ yab alwaˈ (Proverbios 14:30; 22:24, 25; 23:20). Por na Jehová tu walkál ki uch’aˈ jun i wéˈ i yajtsik uxnél, por yab in léˈ ku itey (Salmo 104:15; 1 Corintios 6:10). An tak’ixtalábtsik xi k’wajat ban T’okat Dhutslab tu tolmiyal t’ajat, kom tu t’ajál ki chalpay ani ki t’ajaˈ xowaˈ xi alwaˈ (Salmo 119:97-100). Por an belomtsik xi tsubax, yab tokot i t’ajál ti kwentaj an tak’ixtalábtsik kom i léˈ ku k’wajay alwaˈ, más alwaˈ, i t’ajál abal ki k’ak’naˈ an Ok’oxláb Jehová. Ka ajay Mateo 5:14-16.