AJUMTALÁB 10
¿Janti i ejtowal ki exlaˈ an belomtaláb xi tsubax?
1. ¿Tokot waˈach jun i belomtaláb xi tsubax?
«Ka kóˈoytsik t’ajat i kwenta k’al an k’ambix t’iltsixtsik». (MATEO 7:15)
Na Jesús ani nin exóbaliltsik in ok’tsixnaˈ jun tokot i belomtaláb xi tsubax, jechéˈ jaˈich janti jun i bél xi u júnax ban xeˈchintaláb xi yab in koˈol in ok’ontal, ani jechéˈ i bél «wéˈ t’ajat xin eláltsik» (Mateo 7:14). An Ok’oxláb tokot in bach’wal an belomtaláb xin t’ajál ti kwentaj an tsubaxtaláb xi k’wajat ban Biblia. Xitaˈtsik in k’ak’nál an Ok’oxláb anchanˈ xanti in ulal an T’okat Dhutslab, k’wajattsik junkudh k’al jun tokot in belomtalábil. Ka ajay Juan 4:23, 24; 14:6, ani Efesios 4:4, 5.
Ka chuˈuw an video ¿In kulbetnál an Ok’oxláb ejtal an belomtalábtsik?
2. ¿Janéy in uluw na Jesús k’al tin kwentaj an k’ambix belomtsik?
«In ulaltsik abal in exlál a Dios, por k’al xowaˈ in t’ajáltsik u xalk’anal kej yab aniˈ». (TITO 1:16)
Na Jesús in uluw abal neˈechak ka waˈchin i k’ambix belomtsik xi neˈechak kin odhiy an belomtaláb xi tsubax. Jachanˈ i belomtalábtsik in ulal abal in olnál an tsubaxtaláb ani kej in belál na Kristo, jaxtám tin bijnáltsik ti «kristianas», por k’al xowaˈ in t’ajáltsik in xalk’ál abal yab tsubax. Por tatáˈ a ejtowal ka exlaˈ an belomtaláb xi tsubax, kom jajáˈtsik u k’wajíl anchanˈ xanti in léˈ na Kristo. Ka ajay Mateo 7:13-23.
3. ¿Janti a ejtowal ka exlaˈ an belomtsik xi tsubax?
Ka chuˈuw bóˈ i tsubaxtalábtsik xi neˈech ti tolmiy ka exlaˈ:
In beláltsik kej an Biblia jaˈich in Káwintal an Ok’oxláb. Jajáˈtsik in chápnantsal kin t’ajaˈ ti kwentaj xowaˈ in ulal an Biblia, ani yab xowaˈ in ok’tsixnál nin tak’ixtal an iniktsik (Mateo 15:7-9). Ani jeye in t’ajáltsik ba nin xeˈchintal xowaˈ in óltsal an atiklábtsik. Ka ajay Juan 17:17 ani 2 Timoteo 3:16, 17.
In olnáltsik nin bij an Ok’oxláb, Jehová. Na Jesús in óltsi an atiklábtsik in bij an Ok’oxláb, jaxtám tin utsaˈ nin Tátaˈ ti Juan 17:26: «Nanáˈ u óltsámalichtsik na bij, ani neˈech ku t’ajaˈ ka exlá» (TNM). In tolmiy an atiklábtsik kin exlaˈ k’al tin kwentaj na Jehová ani in ok’tsi kin konoy ban oláb ka t’okedhá nin bij an Ok’oxláb (Mateo 6:9, TNM). ¿Jowaˈ belomtaláb in olnál in bij an Ok’oxláb xon ta k’wajíl? Ka ajay Hebreos 13:15.
In olnáltsik k’al tin kwentaj nin Tak’ixtal an Ok’oxláb. An Ok’oxláb in abaˈ na Jesús techéˈ ti Chabál abal kin ólnaˈ an alwaˈ t’ilab k’al tin kwentaj nin Tak’ixtal. Nin Tak’ixtal an Ok’oxláb jaˈich tokot xi in ejtowal kin wixk’aˈ an yajtsiktaláb xi xoˈ waˈach. Ani na Jesús in ólnaˈ jechéˈ i alwaˈ t’ilab asta tam ti wéˈich ka chemech (Lucas 4:43; 8:1; 23:42, 43, TNM). Na Jesús in uluw jeye kej nin aykóliltsik neˈech kin ólnaˈ jechéˈ i alwaˈ t’ilab. Ani tám, max jun xitaˈ ti óltsi k’al tin kwentaj nin Tak’ixtal an Ok’oxláb, ¿ba jant’om belomtaláb a belál jaˈich? Ka ajay Mateo 24:14.
An belomtsik xi tsubax exlantáltsik, kom yab u xeˈchinal k’al tin kwentaj an política nibal tam u junkunal an atiklábtsik abal kin péjéxnaˈ jun xataˈ (Juan 17:16; 18:36). Yabtsik jeye in t’ajál xowaˈ yab alwaˈ, nibal in ch’ilbantsal tin chalápil an atiklábtsik xi yab in k’ak’nál an Ok’oxláb. Ka ajay Santiago 4:4.
In exobnámaltsik ba nin Káwintal an Ok’oxláb kin k’anidhaˈ ejtal an atiklábtsik, jaxtám ti yabtsik in t’ajál ti kwentaj ba jant’om bitsow ti tál. An belomtalábtsik xi yab tsubax in tolmiyal an atiklábtsik abal ka k’ale ban pejextalábtsik, por an belomtsik xi tsubax yabtsik in t’ajál anchanˈ (Miqueas 4:1-3). An belomtsik xi tsubax in jolk’áltsik i k’ij, ani in eynáltsik xowaˈ in koˈol abal kin tolmiy ani kin k’ijidhmédhaˈ nin at k’wajíl. Ka ajay Juan 13:34, 35 ani 1 Juan 4:20.
4. ¿A ejtowalich ka exlaˈ jowaˈ jaˈich an belomtaláb xi tsubax?
¿Jowaˈ jaˈich an belomtaláb xi in ok’tsixnál xowaˈ in ulal an Biblia, in olnál nin bij an Ok’oxláb, ani in olnál abal nin Tak’ixtal an Ok’oxláb jaˈich tokot xi in ejtowal kin tolmiy ejtal an atiklábtsik? ¿Jowaˈ jaˈich an belomtaláb xi lej tsubax u k’anidháxtsik ani xi yabtsik in tolmiyal an pejextaláb? ¿Janéy a chalpayal tatáˈ? Ka ajay 1 Juan 3:10-12.