AJUMTALÁB 13
An belomtalábtsik xi yab tsubax in kʼutʼlintsal tin bij an Okʼoxláb
Max an Okʼoxláb u kʼánidhax, ¿jantʼó ti yan i belomtalábtsik xi in ulal abal in kʼakʼnál an Okʼoxláb in tʼajámal yan i atʼaxtaláb? An tokʼoxtaláb jaˈich kom jachanˈ i belomtalábtsik, yab tsubax. Kʼal an kʼambixtalábtsik xi in okʼtsixnál ani kʼal xowaˈ in tʼajáltsik, in kʼutʼlintsaltsik tin bij an Okʼoxláb. ¿Janti tin tʼajámaltsik? ¿Janéy in achʼál an Okʼoxláb kʼal xowaˈ in tʼajál an belomtalábtsik? ¿Ani janéy neˈech kin tʼajaˈ jajáˈ?
1. ¿Janti in kʼutʼlintsámaltsik in bij an Okʼoxláb kʼal xowaˈ in okʼtsal an atiklábtsik?
An belomtalábtsik xi yab tsubax in jalúmaltsik «nin tsubaxtalábil na Dios kʼal i kʼambixtaláb» (Romanos 1:25). Jun xanti in tʼajámaltsik jaˈich, abal yab in okʼtsal an atiklábtsik janti in bij an Okʼoxláb. Por an Biblia tu okʼtsal abal koˈol ki éynantsi tin bij (Romanos 10:13, 14). Juntsik i okʼlek belomtsik in okʼtsixnál abal tam u watʼel jun xataˈ, jun i kʼakʼadhtaláb o jun i támnél jaˈich kom an Okʼoxláb anchanˈ tin léˈak ka támun. Por jachanˈ jaˈich jun i kʼambixtaláb. Jajáˈ yab jaykʼi in koˈol in walab kʼal xowaˈ u watʼel (ka ajay Santiago 1:13). Lej tʼeˈpintál tʼajat, por jachanˈ i kʼambixtalábtsik in tʼajámal abal an atiklábtsik ka ówmé kʼal an Okʼoxláb.
2. ¿Janti in kʼutʼlintsámal in bij an Okʼoxláb kʼal xowaˈ in tʼajáltsik?
An belomtalábtsik xi yab tsubax, yab in kʼanidhál an atiklábtsik anchanˈ xanti na Jehová in kʼanidhál. An Tʼokat Dhutslab in ulal abal «nin walabtsik jachanˈ an yejcheˈ bitsow yanenekich tʼajat ani in bajúmalich hasta walkʼiˈ» (Apokalipsis 18:5). Ba yan i tamub, an belomtalábtsik in tolmiyámal an política, ani jeye tolmixnéktsik ban péjextaláb ani in walkámal ka chemechtsik yan i atikláb. Juntsik i okʼlek belomtsik in kontsal an atiklábtsik i tumín abal kin ejto kin kóˈoytsik xowaˈ in léˈ. Kʼal ejtal xowaˈ in tʼajáltsik, in tejwaˈmedhál abal yab in exlál an Okʼoxláb. Jaxtám, ¿awxeˈ in tomnál kin ulutsik abal in kʼakʼnál an Okʼoxláb? (Ka ajay 1 Juan 4:8).
3. ¿Janéy in achʼál an Okʼoxláb tam in chuˈtal xowaˈ in tʼajál an belomtalábtsik xi yab tsubax?
Max tatáˈ yab a kulbetnál xowaˈ in tʼajál an belomtalábtsik xi yab tsubax, xoˈ ka chalpay, ¿janti in achʼál an Okʼoxláb? Jajáˈ in kʼanidhál an atiklábtsik, por u lej chakúl kʼal an okʼlek belomtsik xi yab in kʼakʼnantsal tin bij ani kom in atʼax tʼajtsal an atikláb. An Okʼoxláb in ulal abal an belomtalábtsik xi yab tsubax, neˈech ka wixkʼá ani «yab más jaykʼi neˈech ka witsiy ka chuˈtat» (Apokalipsis 18:21). Wéˈich i kʼij u kʼibel, an Okʼoxláb neˈech kin okʼondhaˈ ejtal an belomtalábtsik xi yab tsubax (Apokalipsis 18:8).
ABAL KI EXÓBNAˈ MÁS
Ki chuˈuw janéy más in chalpayal na Jehová kʼal tin kwentaj an belomtalábtsik xi yab tsubax. Ani jeye neˈech ki chuˈuw más i óltsixtaláb kʼal xowaˈ jajáˈtsik in tʼajámal. Ani tin okʼontal neˈech ki exóbnaˈ, kej xowaˈ in tʼajál an belomtalábtsik yab kin tʼajaˈ abal ki jilaˈ tu exóbal.
4. An Okʼoxláb yab in kulbetnál ejtal an belomtalábtsik
Yan i atiklábtsik in belál abal ejtal an belomtalábtsik jaˈich yan i bél xi tu júnál ban Okʼoxláb. ¿Por jaˈich tsubax jechéˈ? Ka ajaytsik Mateo 7:13, 14 ani ki tʼilmáchtsik kʼal tin kwentaj jechéˈ:
¿Janti in ulal an Biblia abal jaˈich an bél xi tu júnál ban ejattaláb?
Ka chuˈutsik an VIDEO ani ki tʼilmáchtsik kʼal tin kwentaj jechéˈ:
¿In okʼtsixnál an Biblia abal an Okʼoxláb in kulbetnál yan i belomtalábtsik?
5. An belomtalábtsik xi yab tsubax yab in xalkʼál an kʼanidhomtaláb xi in xalkʼál an Okʼoxláb
An belomtalábtsik xi yab tsubax in kʼutʼlintsámaltsik in bij an Okʼoxláb, kom tolmixnéktsik ban péjextaláb. Abal ka chuˈutsik janti in tʼajámal, ka chuˈutsik an VIDEO. Tayíl ki tʼilmáchtsik kʼal tin kwentaj jechéˈ:
¿Janéy in tʼajaˈtsik yan i belomtaláb ban Chábtsíl Guerra Mundial?
¿Janéy a chalpayal tatáˈ kʼal xowaˈ in tʼajaˈtsik?
Ka ajaytsik Juan 13:34, 35 ani 17:16. Ani tayíl ki tʼilmáchtsik kʼal tin kwentaj jechéˈ:
¿Janéy in achʼál na Jehová tam an belomtalábtsik in tolmiyal an péjextaláb?
An belomtalábtsik xi yab tsubax, in tʼajámal yan i atʼaxtaláb ani yabtsik in tejwaˈmedhál an kʼanidhomtaláb janti in tʼajál na Jehová. ¿Janéy a chuˈúmal tatáˈ xi in tejwaˈmedhál abal tsubax anchanáˈ?
An belomtalábtsik xi yab tsubax, yab in xalkʼámal an kʼanidhomtaláb xi in tejwaˈmedhál an Okʼoxláb.
6. An Okʼoxláb in léˈ kin tolmiy an atiklábtsik abal ka kale ban belomtalábtsik xi yab tsubax
Ka ajaytsik Apokalipsis 18:4a ani ki tʼilmáchtsik kʼal tin kwentaj jechéˈ:
An Okʼoxláb in léˈ kin tolmiy an atiklábtsik xi kʼambidh kʼal an belomtaláb xi yab tsubax. ¿Janéy a chalpayal tatáˈ kʼal tin kwentaj jechéˈ?
7. Ka ojontsi ka exóbnaˈ kʼal tin kwentaj an Okʼoxláb xi tsubax
¿Alwaˈ ki walbi an Okʼoxláb kʼal xowaˈ in tʼajámaltsik an belomtalábtsik xi yab tsubax? Ka chalpay kʼal tin kwentaj jun i kwitól xi yab in léˈ kin tʼajaˈ ti kwentaj nin tátaˈ, ani in tʼajál yan xataˈ xi yab alwaˈ. An tátaˈláb yab in kulbetnál xowaˈ in tʼajál nin kwitólil. ¿A chalpayal abal alwaˈ ki walbi an tátaˈláb kʼal xowaˈ in tʼajál nin chakámil?
¿In tomnál ki chalpay abal an Okʼoxláb in koˈol in walab kʼal ejtal xowaˈ in tʼajál an belomtalábtsik xi yab tsubax ani ki jilaˈ tu exóbal?
XOWAˈ JUNTSIK IN ULAL: «Nanáˈ yab u léˈ ku choˈóbnaˈ xataˈ kʼal tin kwentaj an Okʼoxláb; an belomtalábtsik in tʼajámal yan i atʼaxtaláb».
¿A chalpayal teye anchanáˈ?
¿Jantʼó ti yab alwaˈ ki walbi na Jehová kʼal ejtal xowaˈ in tʼajál an belomtalábtsik xi yab tsubax?
XOWAˈ I EXOBNÁMICH
An belomtalábtsik xi yab tsubax in kʼutʼlintsámaltsik nin bij an Okʼoxláb kʼal xowaˈ in okʼtsixnál ani kʼal an atʼaxtalábtsik xi in tʼajámaltsik. Jaxtám wéˈich i kʼij u kʼibel abal an Okʼoxláb kin wixkʼaˈ ejtal an belomtalábtsik.
Ki chalpay xowaˈ i exobnámal
¿Janéy a chalpayal tatáˈ kʼal xowaˈ in tʼajámal ani in okʼtsixnámal an belomtalábtsik xi yab tsubax?
¿Janéy in chalpayal na Jehová tin kwentaj an belomtalábtsik xi yab tsubax?
¿Janéy neˈech kin tʼajaˈ na Jehová kʼal an belomtalábtsik xi yab tsubax?
KA EXLAˈ JUN XATAˈ MÁS
Ki exóbnaˈ cháb xanéy xi tu óltsal jantʼó ti na Jehová yab in kulbetnál an belomtalábtsik xi waˈach.
«¿Tu tolmiyal ejtal an belomtalábtsik ku utey kʼal an Okʼoxláb?» (Artículo de jw.org)
¿Jantʼó ti na Jehová in léˈ ku junkun abal ki kʼakʼnaˈ ani yab ki tʼajaˈ ti kwetémtal?
«¿In yejentsal kin kʼwajay ba jun i belomtaláb?» (Artículo de jw.org)
Jun i paleˈ in léˈnaˈ kin exóbnaˈ an Biblia kom yab in exbayalak xowaˈ in okʼtsixnáltsik an belomtaláb xonti kʼwajatak.
«Jun i paleˈ in jilaˈ an Iglesia» (¡Despertad!, febrero de 2015)
Tin nakél yan i kʼij, an belomtalábtsik in ulúmal i kʼambixtaláb tin kwentaj an Okʼoxláb ani jeye in okʼtsámal an atiklábtsik abal jajáˈ yab tu tʼajál ti kwentaj ani tu tʼajál ki watʼnaˈ i yajtsiktaláb. Ka exóbnaˈ kʼal tin kwentaj óx i kʼambixtalábtsik.
«Kʼambixtalábtsik xi tu ówmédhál kʼal an Okʼoxláb» (La Atalaya, 1 de noviembre de 2013)
a An dhutslab ti Apokalipsis in jumbayal an belomtalábtsik xi yab tsubax, kʼal jun i uxum xu bijyáb «yejcheˈ bitsow Babilonia». Abal ka choˈóbnaˈ jantʼó, ka chuˈuw an óltsixtaláb 1.