¿Janéy in ulal an T’okat Dhutslab kej neˈech kin tamu an belomtalábtsik?

1. ¿Jaˈich alwaˈ ejtal an belomtalábtsik?

Ba ejtal an belomtalábtsik waˈach i atiklábtsik xi alwaˈ, xi tsubax in léˈ kin exlaˈ k’al tin kwentaj an Ok’oxláb. Ani tu k’ijidhmédhál t’ajat ki choˈóbnaˈ abal na Jehová in t’ajál ti kwentaj jechéˈ i atiklábtsik. Por waˈach i belomtalábtsik xi in t’ajámal xowaˈ yab t’ajk’ij in tomnál (2 Corintios 4:3, 4; 11:13-15). Ban noticias i ach’ámal abal juntsik i belomtalábtsik in tolmiyámal an terroristas, xi jaˈich i atiklábtsik xu chemdhax abal kin jik’édhaˈ an k’wajílomtsik, jeye tolmixnék abal ka chemdhá yan i atiklábtsik xi júnich in belomtal o xi píl in bitsówil, ani in tolmiyámal xitaˈ in at’ax t’ajtsal an chakamtsik, ani jeye in tolmiyámal an pejextalábtsik. ¡Jechéˈ in t’eˈpindhál t’ajat an atiklábtsik xi lej tsubax in léˈ kin exlaˈ k’al tin kwentaj an Ok’oxláb! Ka ajay Mateo 24:3-5, 11, 12.

An belomtaláb xi tsubax, in k’ak’nál na Jehová, por an belomtalábtsik xi yab tsubax in pojkál an Ok’oxláb Jehová, kom jajáˈtsik in ok’tsixnál i k’ambixtaláb k’al tin kwentaj an Ok’oxláb ani k’al tin kwentaj an chemélomtsik. Por na Jehová in léˈ kej an atiklábtsik kin exlaˈ an tsubaxtaláb. Ka ajay Mateo 10:28 ani 1 Timoteo 2:3-5.

2. ¿Janéy in ulal an T’okat Dhutslab kej neˈech kin tamu an belomtalábtsik?

An belomtalábtsik yab in ejtowal kin k’ambiy an Ok’oxláb, tam in ulal abal in k’anidhál an Ok’oxláb por in t’ajál xowaˈ in léˈ na Satanás (Santiago 4:4). An Biblia in ulal kej in bij jechéˈ i bukeˈ i belomtalábtsik xi yab tsubax jaˈich «An yejcheˈ bitsow Babilonia», kom an belomtalábtsik xi yab tsubax tujey ba jun i bitsow xi in bijak Babilonia, tayíl tam ti wat’ey an Pulek Pubénib tin k’itsájil na Noé. Yabich neˈech ka lej owey an Ok’oxláb neˈech kin wixk’aˈ jik’towál an belomtalábtsik xi in k’ambiyal ani in at’ax t’ajtsal an k’wajílomtsik. Ka ajay Revelación (Apokalipsis) 17:1, 2, 5, 16, 17 ani 18:8.

Na Jehová in t’ajál ti kwentaj an atiklábtsik xi alwaˈ, xi k’wajat tin pubél an Chabál ban belomtalábtsik xi yab tsubax, ani k’wajat in junkuwal. ¿Janti k’wajat in t’ajál? Jajáˈ k’wajat in ok’tsal an tsubaxtaláb. Ka ajay Juan 6:45.

3. ¿Janéy koˈol kin t’ajaˈ an atiklábtsik xi tsubax in léˈ kin exlaˈ k’al tin kwentaj an Ok’oxláb?

Na Jehová in t’ajál ti kwentaj an atiklábtsik xi lej tsubax in léˈ kin choˈóbnaˈ an tsubaxtaláb. Jaxtám tin utsál kin jilaˈtsik an belomtaláb xi yab tsubax. Ani max jajáˈtsik lej tsubax in k’anidhál an Ok’oxláb, neˈech kin t’ajaˈ an chápláb abal kin t’ajaˈ xowaˈ Jajáˈ in kulbetnál. Ka ajay Revelación (Apokalipsis) 18:4.

Yan i atiklábtsik xi ti ok’ox siglo in t’ajaˈ ti kwentaj an tsubaxtaláb xi ok’tsin k’al an abatwáletsik. Na Jehová in ok’tsi jechéˈ i atiklábtsik ka k’wajay más alwaˈ ani k’ijidh, ani jeye in pidhaˈ ti aytsixtaláb abal an k’ij xi más tayíl. Anchanaˈ janti jajáˈtsik in t’ajaˈ, wawáˈ jeye koˈol ki t’ajaˈ ti kwentaj xowaˈ tu ok’tsal na Jehová. Ka ajay 1 Tesalonicenses 1:8, 9 ani 2:13.

Na Jehová in bach’wal k’al i kulbetaláb an atiklábtsik xi in jilál an belomtalábtsik xi yab tsubax ani u ochel ban belomtaláb xi tsubax. Jajáˈ in jaˈúbnál jechéˈ i atiklábtsik ani u k’wajíltsik janti jun tokot i yaneláb ani in koˈol an aytsixtaláb abal ka k’wajay abal ech’ek’ij. ¿A kulbetnál teye ka bach’uw jechéˈ i labt’ajaxtalábtsik? Ka ajay Marcos 10:29, 30 ani 2 Corintios 6:17, 18.

4. ¿Janéy neˈech kin t’ajaˈ an Ok’oxláb abal ka waˈchin i k’ijidhtaláb ani alwaˈtaláb tin pubél an Chabál?

Tam na Jehová kin wixk’aˈ an belomtalábtsik xi yab tsubax, neˈech tám ka k’wajích alwaˈ an k’wajíltsik, kom yabich xitaˈ neˈech kin k’ambiy nibal kin k’éˈáxliy an atiklábtsik. Ejtal tám, neˈech kin k’ak’naˈ tokot an Ok’oxláb Jehová. Jechéˈ, ¿yab jaˈich jun i lej alwaˈ óltsixtaláb? Ka ajay Revelación (Apokalipsis) 18:20, 21 ani 21:3, 4.