¿Jant’ó ti koˈol ku k’wajay junkudh xi i k’ak’nál an Ok’oxláb?

1. ¿Jant’ó ti an Ok’oxláb in t’ajaˈ abal an bitsow ti Israel ka k’wajay junkudh?

Na Jehová in t’ajaˈ an bitsow ti Israel k’al in chakámiltsik na Abrahán ani in pidhaˈ ti tak’ixtalábtsik. Jeye in punk’untsi kin beletnaˈ nin káwintal an Ok’oxláb ani an k’ak’naxtaláb xi tsubax (Salmo 147:19, 20). Jalbintsích k’al jechéˈ, an atiklábtsik tin pubél an Chabál neˈech kin bach’uw i alwaˈtalábtsik. Ka ajay Hechos 3:25.

Na Jehová in takuy an bitsow ti Israel abal ti óltsixtsik, anchanˈ tin utsaˈ ti Isaías 43:10: «Tatáˈtsik tu óltsíxiltsik -jaˈich xowaˈ in ulal na Jehová-, nu t’ojnálil xi u takwyámal, abal kin choˈóbnaˈtsik ani ti kin belaˈtsik nanáˈ, ani kin exbaytsik kej nanáˈ in Jayéchk’i». K’al xowaˈ wat’ey k’al an bitsow ti Israel, tu ok’tsal abal max ki t’ajaˈ ti kwentaj nin tak’ixtalábil an Ok’oxláb, neˈech ki bach’uw i alwaˈtalábtsik (Deuteronomio 4:6). Anchanˈ tám, k’al tin kwentaj an bitsow ti Israel, yan i atiklábtsik neˈechak kin ejto kin exlaˈ an Ok’oxláb xi tsubax.

2. ¿Jant’ó ti koˈol ka k’wajay junkudh an belomtsik xi tsubax?

Más tayíl an israelitatsik in jilaˈtsik kin t’ajaˈ ti kwentaj an Ok’oxláb, jaxtám ti na Jehová in jaluj k’al an junkuntaláb xi na Kristo in jilaˈ (Mateo 21:43; 23: 37, 38). Xoˈ ta k’itsáj nin aykóliltsik na Kristo, jaˈich xi in t’ójontsal na Jehová ti óltsixtsik ani yabich an israelitatsik. Ka ajay Hechos 15:14, 17.

Na Jesús in abaˈ in aykóliltsik ka k’ale kin ok’tsi ejtal an atiklábtsik tin putál an Chabál (Mateo 10:7, 11; 24:14; 28:19, 20). Jechéˈ i óltsixtaláb exomich ti ulel k’al ejtal an atiklábtsik, anchanˈ, na Jehová exom in junkuwal yan t’ajat i atiklábtsik abal ka k’wajay ban belomtaláb xi tsubax (Revelación [Apokalipsis] 7:9, 10). Kom k’wajattsik junkudh an belomtsik xi tsubax in ejtowal ka tolmíxintsik jun ani jun. Jeye tin pubíl an Chabál in bach’wal jununúl an ok’tsixtaláb xu pidhnáb ban junkuntalábtsik. Ka ajay Hebreos 10:24, 25.

3. ¿Janti tujey an Óltsixtsik k’al a Jehová xoˈ ta k’itsáj?

An Óltsixtsik k’al a Jehová xi jechéˈ i k’ij tujey ti 1870, tam ti jun i chakam bukeˈ i atiklábtsik xi in exobnálak an Biblia in elaˈtsik an tsubaxtaláb xi k’al yan i k’ij k’wajinek chinat. Jachanˈ i bukeˈ i atiklábtsik in choˈóbaktsik abal na Jesús in abámal nin aykóliltsik ti óltsix, jaxtám tin tujutsik kin ólnaˈ an alwaˈ t’ilab k’al tin kwentaj nin Tak’ixtal an Ok’oxláb tin putál an Chabál. Ban tamub 1931 in bijnaˈtsik ti Óltsixtsik k’al a Jehová. Ka ajay Hechos 1:8; 2:1, 4, 11, ani 5:42.

4. ¿Janti in ójontsal ka k’wajay junkudh an Óltsixtsik k’al a Jehová?

Ti wejeˈ ban ok’ox siglo waˈchin jun kweneˈ i ok’lektsik xi in tolmiyalak an junkuntalábtsik xi waˈachak. Jachanˈ i ok’lektsik in exbayalak abal na Jesús jaˈich xi k’wajat jelti in Ók’ an belomtsik (Hechos 16:4, 5). Anchanˈ jeye xoˈ ta k’itsáj, an Óltsixtsik k’al a Jehová in koˈol jun i kweneˈ i belomtsik xi in exlál alwaˈ an Biblia, jechéˈ i kidháblábtsik punk’udh abal kin beletnaˈ an t’ojláb xu t’ajnal tin pubél an Chabál. Jajáˈtsik in beldhál an t’ojláb xi u t’ajnal ban atáj xonti u wilk’áb an káw ani u buk’wáb an dhutsadh úw xi káldhats ban Biblia ti más ti seiscientos i káwintalábtsik. Ani jeye, jachanˈ i punk’udh ok’lektsik in beletnál ani in pidhál ti tolmixtaláb k’al an Biblia an cien mil i junkuntalábtsik xi waˈach tin pubél an Chabál. Ani tajaˈ ban junkuntalábtsik, jeye waˈach i kidháblábtsik xin beletnál k’al i k’anidhomtaláb an belomtsik xi punk’untsidh k’al an Ok’oxláb. Ka ajay 1 Pedro 5:2, 3.

An Óltsixtsik k’al a Jehová u k’alel atáj ti atáj abal kin ólnaˈ an alwaˈ t’ilab, anchanˈ xanti in t’ajaˈ an abatwáletsik (Hechos 20:20). Jeye in ok’tsal an atiklábtsik xi tsubax in léˈ kin exlaˈ xowaˈ in olnál an Biblia. Por an Óltsixtsik k’al a Jehová yab tokot u k’wajat junkudhk’ij, más alwaˈ, u k’ánídháx ani u bélétnáx janti i kidháblábtsik ba jun i pulek yaneláb, xi u beletnáb k’al jun i tátaˈláb lej k’anidhom, an Ok’oxláb Jehová (2 Tesalonicenses 1:3). Ani kom i chápnantsal ki t’ojontsi an Ok’oxláb ani ki tolmiy ni at k’wajíltsik, u k’wajat janti in ulal an Salmo 33:12: «K’ijidh jaˈich an bitsow xi in Ok’oxlábil jaˈich na Jehová». Ka ajay Hechos 20:35.