¿Jant’ó ti yejat ka óntsi ka exóbnaˈ an T’okat Dhutslab?

1. ¿Janti neˈech ti tolmiy ka óntsi ka exóbnaˈ an T’okat Dhutslab?

K’al xowaˈ a exobnámich wéˈ ban Biblia, a bajúmalich ka k’anidhaˈ an Ok’oxláb, por yejat ka óntsi an ta exóbal abal ka exlaˈ ani ka k’anidhaˈ más (1 Pedro 2:2). Max tatáˈ ka óntsi ka exóbnaˈ an T’okat Dhutslab, neˈech tám ka ejto ki k’wajay utat k’al an Ok’oxláb, ani jeye neˈech ka ejto ki k’wajay abal ech’ek’ij. Ka ajay Juan 17:3 ani 1 Timoteo 2:3, 4.

Tam tatáˈ ka óntsi ta exóbal, neˈech tám ka chapikmé na belomtal. Ani anchanaˈ tám, neˈech ka k’ijidhmédhaˈ na Jehová (Hebreos 11:1, 6). Ani jeye, jachanˈ i belomtaláb neˈech ti t’ajaˈ ka jilaˈ xowaˈ yab alwaˈ ani ka t’ajaˈ xowaˈ alwaˈ. Ka ajay Hechos 3:19.

2. ¿Janti a ejtowal ka tolmiy xi k’eˈettsik?

Kom ejtal i kulbetnál ki pidhnaˈ i alwaˈ óltsixtalábtsik, awich xónaˈ neˈech teye ka léˈnaˈ ka óltsi xi k’eˈettsik xowaˈ a exobnámal. Ani max tatáˈ ka óntsi ka exóbnaˈ k’al tin kwentaj na Jehová, neˈech ka wit’aˈ ka éynaˈ an T’okat Dhutslab abal ka ok’tsi xi k’eˈettsik xowaˈ neˈech kin t’ajaˈ an Ok’oxláb. Ka ajay Mateo 28:19, 20.

A ejtowal ka tuju ka óltsi an tsubaxtaláb na jaˈúbtsik ani na yanél, por tam ka óltsi, yab ka utsaˈ abal yab alwaˈ xowaˈ k’wajat in t’ajál, más alwaˈ, ka óltsi abal max kin t’ajaˈ ti kwentaj na Jehová neˈech kin bach’uw an alwaˈtalábtsik xi na Jehová in ulúmal neˈech kin t’ajaˈ. Ech’ek’ij ka chalpay kej jajáˈtsik in t’ajál más ti kwentaj xowaˈ ka t’ajaˈ ani yab xowaˈ ka uluk’i. Ka ajay 2 Timoteo 2:24, 25.

3. ¿Janti a ejtowal ki k’wajay utat k’al an Ok’oxláb?

Max tatáˈ ka exóbnaˈ xowaˈ in ulal an T’okat Dhutslab, neˈech tám ka ejto ka t’ajaˈ ta jaˈúb an Ok’oxláb, ani Jajáˈ neˈech ti dhabalnaˈ, kom tatáˈ teye neˈech ki k’wajay jelti jun in chakámil an Ok’oxláb. Ka ajay 2 Corintios 6:18.

4. ¿Janéy neˈech ti tolmiy abal ka óntsi ka pubédhaˈ na belomtal?

Yab ka jilaˈ ta exóbal. Tam tatáˈ ka óntsi ka exóbnaˈ an T’okat Dhutslab, neˈech más ka k’anidhaˈ an Ok’oxláb (Hebreos 5:13, 14). Jaxtám ka utsaˈ jun i óltsix k’al a Jehová ti ok’tsi k’al an libro ¿Qué nos enseña la Biblia? Tam tatáˈ ka exóbnaˈ más k’al tin kwentaj na Jehová, más k’ijidh neˈech ki k’wajay. Ka ajay Romanos 12:2 ani 1 Timoteo 4:15, 16.

An T’okat Dhutslab in koˈol «an labidh t’okat alwaˈ t’ilabtsik xin k’ál an Ok’oxláb xi k’ijidh» (1 Timoteo 1:11, TNM). Ani neˈech ka ejto ki utey más k’al an Ok’oxláb, max ki k’ale ban junkuntalábtsik xi in t’ajál an Óltsixtsik k’al a Jehová (Hebreos 10:24, 25). Ani max tatáˈ ka óntsi ka t’ajaˈ xowaˈ in léˈ an Ok’oxláb, neˈech tám ka ejto ka koˈoy an xeˈchintaláb abal ech’ek’ij. Anchanˈ tám, xowaˈ xi más alwaˈ a ejtowal ka t’ajaˈ, jaˈich, ki k’uney más k’al na Jehová. Ka ajay 1 Timoteo 6:19.