¿Janti in ejtowal ka k’wajay kulbél an yanél?

1. ¿Jant’ó ti yejat kej an atiklábtsik ka tomkin ban awiltaláb?

An T’okat Dhutslab in koˈol «an labidh t’okat alwaˈ t’ilabtsik xin k’ál an Ok’oxláb xi k’ijidh» (1 Timoteo 1:11, TNM). An Ok’oxláb xi k’ijidh, in léˈ abal an yanél ka k’wajay alwaˈ ani k’ijidh. Tam ti na Jehová in tomkiy na Adán k’al na Eva, anchanˈ tin t’ajaˈ an ok’ox tomkintaláb. Jaxtám, abal an atiklábtsik kin ejto kin beletnaˈ alwaˈ nin chakámiltsik ani ka k’wajaytsik alwaˈ ani kulbél, yejat ka tomkintsik ban awiltaláb. An belomtsik koˈol kin t’ajaˈ ti kwentaj jechéˈ i abatnaxtaláb ani ka tomkin ban awiltaláb abal kin ejto ka k’wajay junax. Ka ajay Lucas 2:1, 4, 5.

Na Jehová in léˈ abal an atiklábtsik xi tomkidh ka k’wajay junax abal ech’ek’ij. Jajáˈ yab in léˈ ka k’ambíxintsik (Hebreos 13:4). Na Jehová in at’ál kej jun i tomkinél ka t’aj jiláxin (Malaquías 2:16). Por in jilál kej jun i atikláb kin jilaˈ nin tomkíl ani ka tomkin ti ít max k’ambidh k’al nin tomkíl. Ka ajay Mateo 19:3-6, 9.

2. ¿Janti koˈol ka k’ak’náxin an tomkinéltsik?

Na Jehová in t’ajaˈ an inik ani an uxum abal ka tolmíxin tam ka tomkin (Génesis 2:18). An tomkidh inik jaˈich an ok’lek ban atáj, jaxtám jajáˈ koˈol kin aliy an tumín abal nin yanél, ani jeye koˈol kin ok’tsi nin chakámiltsik k’al tin kwentaj an Ok’oxláb. Kom an tomkidh inik in k’anidhál nin k’imádhil, koˈol kin t’ajaˈ i chápláb abal kin pidhaˈ xowaˈ in yejentsal. Xi tomkidhtsik koˈol ka k’anidháxin ani ka k’ak’náxin, ani kom cháblom u walablom koˈol ka pakwlantsíxin abal ka k’wajaytsik kulbél. Ka ajay Efesios 4:31, 32; 5:22-25, 33, ani 1 Pedro 3:7.

3. Max an tomkinéltsik yab k’wajat k’ijidh, ¿alwaˈ ka jiláxin?

Max jun i tomkinél in koˈol i dhuk’eltalábtsik, koˈoltsik kin t’ajaˈ an chápláb abal kin lejkiy k’al i k’anidhomtaláb (1 Corintios 13:4, 5). An tomkinéltsik juntsikíl yab u junáx alwaˈ tam in wat’nál i dhuk’eltalábtsik, por an Biblia yab in ulal abal alwaˈ ka jiláxin abal ka lejkin an dhuk’eltaláb. Ka ajay 1 Corintios 7:10-13.

4. ¿Janéy in léˈ an Ok’oxláb abal an chakamtsik?

Na Jehová in léˈ abal an chakamtsik ka k’wajay kulbél, jaxtám tin ok’tsal an kwitóltsik ani an tsidhantsik abal kin t’ajaˈ xowaˈ alwaˈ tam bél likat. Jeye in léˈ abal an chakamtsik kin t’ajaˈ ti kwentaj nin tátaˈtsik kom jajáˈtsik in koˈol más i chalpadhtaláb (Colosenses 3:20). Na Jehová in léˈ ka t’ójontsat k’al an kwitóltsik ani an tsidhantsik, ani jeye in léˈ kin t’ajaˈtsik ti kwentaj na Jesús ani anchanˈ ka k’wajaytsik kulbél. Ka ajay Mateo 19:13-15; 21:15, 16 ani Efesios 6:1, 2.

5. ¿Janti in ejtowal an tátaˈlábtsik kin tolmiy nin chakámiltsik abal ka k’wajaytsik kulbél?

An tátaˈlábtsik koˈol kin pidhaˈ nin chakámiltsik xonti ka k’wajay, an k’apnél ani kin k’udhk’umliy (1 Timoteo 5:8). Por jeye koˈol kin ok’tsi k’al tin kwentaj an Ok’oxláb (Deuteronomio 6:4-7). Tam an tátaˈlábtsik in t’ajál ti kwentaj an Ok’oxláb, anchanˈ in ejtowal kin ok’tsi nin chakámiltsik kin t’ojontsi an Ok’oxláb. Max an chakamtsik ka ok’tsin k’al tin kwentaj an T’okat Dhutslab, anchanˈ neˈech kin choˈóbnaˈ kin t’ajaˈ xowaˈ xi alwaˈ. Ka ajay Efesios 6:4, ani 2 Timoteo 3:15.

An chakamtsik in yejentsal jeye ka k’ank’umiyat, ani ka utsan jun i alwaˈ káw tam kin t’ajaˈ xowaˈ xi alwaˈ. Por juntsikíl tam kin t’ajaˈ xowaˈ xi yab alwaˈ, yejat ka tawná abal yab kin wat’naˈ i yajtsiktaláb (Proverbios 22:15). Por tam ka tawná, yab koˈol ka tawná k’al i at’ax káw nibal ka kwadhan lej wat’ats. Ka ajay Colosenses 3:21.

An Óltsixtsik k’al a Jehová in t’ajám yan i libro abal kin tolmiy an tátaˈlábtsik ani an chakamtsik, ani ejtal k’wajat káldhats ban T’okat Dhutslab. Ka ajay Santiago 1:25.