¿Jant’ó tin jilál an Ok’oxláb ka waˈchin an at’axtaláb ani an yajtsiktaláb?

1. ¿Janti tujey an at’axtaláb?

An at’axtaláb tujey ban Chabál tam ti na Satanás in uluw an ok’ox k’ambixtaláb. Jajáˈ jaˈich wiˈik jun i ángel t’okat ani alwaˈ por «yab in óntsi ka k’wajay ban tsubaxtaláb» (Juan 8:44, TNM). Jajáˈ in léˈnaˈ kin bach’uw an k’ak’naxtaláb xi tokot in tomnál kin bach’uw na Jehová, ani yab in wixk’aˈ jechéˈ i chalap, jaxtám tin k’ambiy na Eva abal ka t’ajan ti kwentaj jajáˈ ani yab an Ok’oxláb. Tayíl na Adán in jek’omnaˈ jeye an Ok’oxláb. Kom na Adán yab in t’ajaˈ ti kwentaj an Ok’oxláb, jaxtám xoˈ ti waˈach i yajtsiktaláb ani i chemlá. Ka ajay Romanos 5:19 ani 2 Corintios 11:3.

Tam ti na Satanás in k’ambiy na Eva abal yab kin t’ajaˈ ti kwentaj an Ok’oxláb, in pojkantsi nin awiltalábil na Jehová abal ti tak’ix. Yan i atiklábtsik in t’ajámal jayéchk’i janti na Satanás ani in pojkámal nin tak’ixtalábil an Ok’oxláb, jaxtám ti an Biblia in ulal abal an Lej At’ax jaˈich «xu tak’ix techéˈ ti k’aˈylá». Ka ajay Juan 14:30 ani 1 Juan 5:19.

2. Tám, ¿yab lej alwaˈ xowaˈ in t’ajámal an Ok’oxláb?

Ejtal xowaˈ in t’ajámal na Jehová jaˈich lej alwaˈ ani t’okat. An ángeles ani an atiklábtsik, ech’ek’ij in ejtowal wiˈik kin t’ajaˈ ti kwentaj nin tak’ixtalábil an Ok’oxláb (Deuteronomio 32:4, 5). Jajáˈ tu pidhámal an walkadhtaláb abal ki takuy ti kwetémtal max i léˈ ki t’ajaˈ xowaˈ alwaˈ o xowaˈ yab alwaˈ, k’al jachanˈ i walkadhtaláb i ejtowal ki tejwaˈmédhaˈ max lej tsubax i k’anidhál. Ka ajay Santiago 1:13-15 ani 1 Juan 5:3.

3. ¿Jant’ó tin jilámal an Ok’oxláb ka waˈchin i yajtsiktaláb?

Na Jehová in jilámal jun wéˈ i k’ij ka pojkantsat tin awiltal abal ti tak’ix. ¿Abal jant’ó? Abal kin tejwaˈmédhaˈ kej ni jun i tak’ix xi yab in koˈol nin tolmixtal an Ok’oxláb, yab in ejtowal kin tolmiy an atiklábtsik (Eclesiastés 7:29; 8:9). Wat’enekich seis mil i tamub ani an tak’ixtsik yab in ejtowámal kin wixk’aˈ an at’axtaláb, an pejextaláb nibal an yawlách. Ka ajay 2 Pedro 3:7-9.

Por max ki jilaˈ kej an Ok’oxláb ti ku tak’iy, neˈech ki bach’uw i alwaˈtalábtsik (Isaías 48:17, 18). Yabich neˈech ka lej owey na Jehová neˈech kin wixk’aˈ an tak’ixtsik ani tokot neˈech ka k’wajay techéˈ ti Chabál an atiklábtsik xi kin jilaˈ ka tak’iyat k’al an Ok’oxláb (Isaías 11:9). Ka ajay Revelación (Apokalipsis) 11:15.

Ka chuˈuw an video ¿Jant’ó tin jilál an Ok’oxláb ki wat’naˈ i yajtsiktaláb?

4. ¿Janéy i ejtowal ki t’ajaˈ lejat an Ok’oxláb yabél in tsiˈdhál an pakwenib?

Na Satanás in uluw abal wawáˈ i k’ak’nál an Ok’oxláb kom Jajáˈ tu pidhál yan i alwaˈtalábtsik. Kom an Ok’oxláb yabél in tsiˈdhámal an pakwenib i ejtowal ki tejwaˈmédhaˈ abal na Satanás jaˈich jun i k’ambix. K’al ni xeˈchintal i tejwaˈmedhál max i léˈ kej an Ok’oxláb ti ku tak’iy o yabaˈ. Ka ajay 2 Pedro 3:9 ani Revelación (Apokalipsis) 12:10.

5. ¿Janti neˈech ki tejwaˈmédhaˈ abal i léˈ kej an Ok’oxláb ti ku tak’iy?

Max i léˈ kej an Ok’oxláb ti ku tak’iy, koˈol ki exóbnaˈ an Biblia ani ki k’ak’naˈ janti Jajáˈ in léˈ (Juan 4:23). Koˈol jeye ki t’ajaˈ janti na Jesús ani yab ku xeˈchin i palkóm an política nibal ku xeˈchin ban pejextaláb, anchanˈ i tejwaˈmedhál abal yab i léˈ ti ku tak’iy na Satanás. Ka ajay Juan 17:14.

Na Satanás in eynál nin cháplábil abal an atiklábtsik kin chalpay kej yab walats max kin t’ajaˈtsik xowaˈ yab alwaˈ ani xowaˈ xi lej k’ibenek. Tam ki jilaˈ ki t’ajaˈ ejtal jechéˈ, ni jaˈúbtsik neˈech ka laban ani neˈech xónaˈ tu labídhnaˈ ani tu at’ax tilaˈ (1 Pedro 4:3, 4). Max anchanaˈ ki tamu, ku junkun k’al i jaˈúbtsik xi in k’ak’nál an Ok’oxláb ani ki t’ajaˈ xowaˈ an Ok’oxláb in léˈ. Anchanaˈ neˈech ki tejwaˈmédhaˈ abal na Satanás k’ámbixin tam tin uluw kej yab neˈech ki k’ak’naˈ an Ok’oxláb tam ki koˈoy i taktamixtalábtsik. Ka ajay 1 Corintios 6:9, 10 ani 15:33.

An Ok’oxláb lej tsubax tu k’anidhál, jaxtám neˈech kin wixk’aˈ an at’axtaláb ani ejtal xowaˈ tu t’ajál ki yajtsiknaˈ. Max ki belaˈ an Ok’oxláb ani ki jilaˈ ti ku tak’iy, neˈech tám ki ejto ku k’wajay abal ech’ek’ij techéˈ ti Chabál. Ka ajay Juan 3:16.