¿Janti tu kʼwajílaktsik an okʼox atiklábtsik ti Edén?

Na Adán ani na Eva pidhan yan xataˈ xowaˈ alwaˈ kʼal an Okʼoxláb (Génesis 1:28; Hechos 17:25)

Na Jehová in tʼajaˈ an okʼox uxum Eva, ani in pidhaˈ na Adán abal ka tomkin kʼal jajáˈ (Marcos 10:6, 7).

An Okʼoxláb in tʼajaˈ na Adán ani na Eva tʼokat tin chalapil ani tin tʼuˈúl. Yabtsik wiˈik walbidh.

U kʼwajílaktsik ti Edén: xonti jaˈichak lej alabél, kom waˈachak jun i waljaˈ, i walilábtsik ani koˈnéltsik. Jaˈichak jun i labidh wichlom chabál.

Na Jehová u káw wiˈik kʼal jajáˈtsik ani in okʼtsalak yan xataˈ. Anchanaˈ tam, max jajáˈtsik in léˈaktsik ka kʼwajay abal echʼekʼij ban Alabél Chabál, in koˈolaktsik kin ochʼówiy an Okʼoxláb ani kin tʼajaˈ ti kwentaj.

An Okʼoxláb in utsaˈ abal yab kin kʼapu in walíl jun i teˈ xi kʼwajatak junax chʼejel ti Edén (Génesis 2:16, 17)

Na Jehová in utsaˈ na Adán ani na Eva abal yab kin kʼaputsik jun i waliláb xi kʼwajatak ban Alabél Chabál. Max kin kʼaputsik, neˈechak ka chemech.

Jun i ángel atʼaxméj ani in jekʼomnaˈ an Okʼoxláb. Jachanˈ i ángel xi atʼax in bij ta Satanás an Diablo.

Na Satanás xi jaˈich an Lej Atʼax, yab in léˈak abal jajáˈtsik kin tʼajaˈ ti kwentaj na Jehová, jaxtám in eynaˈ jun i chan abal kin utsaˈ na Eva abal yab neˈech ka chemech max kin kʼapu an waliláb xi usnék yab kin kʼapu. In utsaˈ abal neˈechak ka wenkʼon janti an Okʼoxláb. ¡Jaˈichak jun i kʼambixtaláb! (Génesis 3:1-5).