AJUMTALÁB 6
¿Jant’om aytsixtaláb waˈach abal an chemélomtsik?
1. ¿Janéy tu ok’tsal an Biblia k’al tin kwentaj an chemélomtsik?
Jun i k’ij tam ti na Jesús techéˈ ti k’wajat ti Chabál, chemech jun in jaˈúb xi in bijak ta Lázaro, jajáˈ u k’wajílak ti Betania jun i kwentsal k’unat ti Jerusalén. Tam ti na Jesús ulich xonti k’wajat nin kidhábtsik an chemélom, na Lázaro in neˈdhálichak chéˈ a k’itsáj ti chemnek. Tayíl na Jesús, na Marta ani na María k’aletsik kin chuˈuw xonti jolidh na Lázaro ani yab owey ti junkun yan i atiklábtsik. ¿A chalpayal an kulbetaláb xi in ach’aˈ na Marta ani na María tam ti na Jesús in witsbantsi tin xeˈchintal na Lázaro? Ka ajay Juan 11:21-24, 38-44.
An T’okat Dhutslab tu ok’tsal abal an Ok’oxláb neˈech kin witsbantsi tin xeˈchintal an chemélomtsik abal ka k’wajay techéˈ ti Chabál. Na Marta in exlálich jeye wiˈik xowaˈ in ulal an T’okat Dhutslab. Ka ajay Juan 11:24.
2. ¿Janéy u wat’el tam jun i atikláb ka chemech?
An Ok’oxláb in utsaˈ na Adán: «Kom tatáˈ i pojodh ani i pojodh neˈech ki wenk’on» (GÉNESIS 3:19)
An T’okat Dhutslab in ulal abal an atiklábtsik t’ajadh k’al i «pojodh» (Génesis 2:7; 3:19). Tam jun i atikláb ka chemech yabich in choˈób nibal in ach’ál ni jun xataˈ, anchanˈ xanti in ulal Eclesiastés 9:5: «Kom xi ejattsik in choˈób abal neˈech ka chemech, por xi chemnekichtsik, jajáˈtsik yab in choˈób ni jun xataˈ». Yab i koˈol jun i espíritu alk’idh ti t’uˈúl xi u jilk’onal ejat tam ku chemech. Tam jun u chemel yabich in chalpayal ni jun xataˈ, jaxtám tam ti na Lázaro witsbantsat tin xeˈchintal yab k’wajay kin uluw max k’alnek píl xonti. Ka ajay Juan 11:11-14.
Waˈach taltsik i atikláb xi in belál abal an Ok’oxláb in yajlombédhál an chemélomtsik ban k’amal, por jechéˈ yab tsubax, kom ban T’okat Dhutslab i chuˈúmalich abal an chemélomtsik yabich in choˈób ni jun xataˈ. K’al xowaˈ in belál an atiklábtsik, in walbiyal an Ok’oxláb k’al jun xataˈ xi Jajáˈ yab in kulbetnál, nibal in chalpayámal kin t’ajaˈ (Jeremías 7:31). Ka ajay 1 Juan 4:8.
Ka chuˈuw an video ¿Janti k’wajat an chemélomtsik?
3. ¿I ejtowal ku káwin k’al an chemélomtsik?
Yabaˈ, kom an chemélomtsik yabich u káw nibal u och’ox (Salmo 115:17). Por waˈach i ángeles xi at’ax, xi in ch’ilbayal nin káwintal an atiklábtsik xi chemnekich ani anchanˈ in t’ajál kin belaˈ an atiklábtsik abal jaˈich nin kidhtal xi chemnek (2 Pedro 2:4). Jaxtám na Jehová in pojkál ki aliy an atiklábtsik xi in wáynál u t’ilom k’al an chemélomtsik (Deuteronomio 18:10, 11). Ka ajay Gálatas 5:20, 21.
4. ¿Jitaˈtsik neˈech ka witsbantsat tin xeˈchintal?
Yan i atiklábtsik xi chemnekich neˈech ka witsbantsat tin xeˈchintal abal ka k’wajay techéˈ ti Chabál. Neˈech ka ejech an atiklábtsik xi in exlámal k’al tin kwentaj an Ok’oxláb ani jeye an atiklábtsik xi yab in exlámal ani in t’ajámaltsik xowaˈ yab alwaˈ. Ka ajay Hechos 24:15.
An atiklábtsik xi ka witsbantsat tin xeˈchintal neˈech kin ejto kin exóbnaˈ k’al tin kwentaj an Ok’oxláb, kin belaˈ na Jesús ani kin t’ajaˈ ti kwentaj (Revelación [Apokalipsis] 20:11-13). Max anchanˈ kin t’ajaˈtsik neˈech kin ejto ka k’wajay abal ech’ek’ij techéˈ ti Chabál. Ka ajay Juan 5:28, 29.
5. Kom na Jehová neˈech kin witsbantsi tin xeˈchintal an chemélomtsik, ¿janéy tu ok’tsal k’al tin kwentaj Jajáˈ?
K’al xowaˈ neˈech kin t’ajaˈ na Jehová, tu xalk’antsal abal tu k’anidhál ani tu pidhál i labt’ajaxtalábtsik aunque yab in tomnál tu pidhaˈ. Kom tu k’anidhál t’ajat in abaˈ nin Chakámil abal tu loˈo, ani anchanaˈ wawáˈ ki ejto ki bach’uw jechéˈ i alwaˈtaláb. Ani tatáˈ, ¿jitaˈ a léˈ ka chuˈuw tam an Ok’oxláb kin witsbantsi tin xeˈchintal an chemélomtsik? Ka ajay Juan 3:16 ani Romanos 6:23.