¿Janéy jaˈich nin Tak’ixtal an Ok’oxláb?

1. ¿Janéy jaˈich nin Tak’ixtal an Ok’oxláb?

Jaˈich jun i tak’ixtaláb xi k’wajat tuwaˈ walk’iˈ, xi neˈech kin wixk’aˈ ejtal an tak’ixtsik xi techéˈ ti Chabál ani anchanaˈ neˈech kin t’ajaˈ xowaˈ in léˈ na Jehová abal techéˈ ti Chabál ani tuwaˈ walk’iˈ. In Tak’ixtal an Ok’oxláb, jaˈich xi neˈech kin t’ajaˈ abal an atiklábtsik ka k’wajay junkudh. ¿Yabxeˈ tsubax abal jechéˈ jaˈich jun i lej alwaˈ t’ilab? Ka ajay Daniel 2:44; Mateo 6:9, 10, ani 24:14.

Kom ba jun i tak’ixtaláb yejat jun i tak’ix, jaxtám ti na Jehová in bijiy nin Chakámil Jesukristo abal ka k’wajay ti Tak’ix ba nin Tak’ixtal an Ok’oxláb. Ka ajay Revelación (Apokalipsis) 11:15.

Ka chuˈuw an video ¿Janéy jaˈich nin Tak’ixtal an Ok’oxláb?

2. ¿Jant’ó ti na Jesús jaˈich an más alwaˈ tak’ix?

Nin Chakámil an Ok’oxláb jaˈich an más alwaˈ tak’ix, kom jajáˈ u k’anidhom ani in t’ajál xowaˈ xi lujat (Mateo 11:28-30). Tam jajáˈ kin tak’ích an Chabál desde tuwaˈ walk’iˈ, tám neˈech kin éynaˈ nin cháplábil abal kin tolmiy an atiklábtsik. Tam ti na Jesús ejdhá ti ít, jajáˈ k’ale tuwaˈ walk’iˈ abal kin aytsi tin eját an Ok’oxláb abal ka pidhan an awiltaláb abal ti tak’ix (Hebreos 10:12, 13). Ani tayíl an Ok’oxláb in pidhaˈ an awiltaláb abal ka tak’ixin. Ka ajay Lucas 1:32, 33.

3. ¿Jitaˈtsik neˈech ti tak’ix k’al na Jesús?

An T’okat Dhutslab in ulal abal an Ok’oxláb in takwyámal jun kweneˈ i atiklábtsik abal ka tak’ixin junax k’al na Jesús tuwaˈ walk’iˈ (Revelación 5:10). Xi takwyattsik ok’ox, jaˈich nin abatwálejiltsik na Jesús. Asta jechéˈ i k’ij, na Jehová in óntsal kin takuy an iniktsik ani an mimlábtsik xi u belom, abal ka k’ale ti tak’ix k’al na Jesús. Tam jajáˈtsik u chemel u wenk’onal ti espíritu, ani u k’alel ti k’wajíl tuwaˈ walk’iˈ anchanˈ janti na Jesús. Ka ajay Juan 14:1-3 ani 1 Corintios 15:42-44.

¿Jay i atiklábtsik neˈech ka k’ale tuwaˈ walk’iˈ? An Biblia in ulal abal yab ejtal an belomtsik neˈech ka k’ale tuwaˈ walk’iˈ. Na Jesús in utsaˈ nin aykóliltsik xi neˈech ka k’ale tuwaˈ walk’iˈ: «Tatáˈtsik [...] yab t’ajat yan ta éb». Jaxtám na Jesús in bijyal ti chakam bukeˈ (Lucas 12:32). An Biblia in ulal kej tokot neˈech ka k’aleˈ ti tak’ix k’al na Jesús 144,000 i atiklábtsik. Ka ajay Revelación (Apokalipsis) 14:1.

4. ¿Janéy wat’ey tam ti na Jesús bijyat ti tak’ix?

Na Jesús bijyat ti tak’ix ti 1914. Wéˈ i k’ij tayíl tam ti tujey ti tak’ix na Jesús, in pet’naˈ na Satanás ani nin tolmiwáltsik techéˈ ti Chabál.a An Lej At’ax chakuy t’ajat ani tujey kin t’ajaˈ i yajtsiktalábtsik tin pubél an Chabál (Revelación 12:7-10, 12). Ba jachanˈ i k’ij tujey ti waˈchinal más i pejextaláb, i yawlách, i k’aˈínab ani ti dhiynal an chabál, ejtal jechéˈ in tejwaˈmedhál abal wéˈich ka tak’ixin nin Tak’ixtal an Ok’oxláb techéˈ ti Chabál. Ka ajay Lucas 21:7, 10, 11, 31.

5. ¿Janéy k’wajat in t’ajál in Tak’ixtal an Ok’oxláb jechéˈ i k’ij ani janéy neˈech kin t’ajaˈ ban k’ij xi taˈtál?

K’al jun i óltsixtaláb xi k’wajat ti t’ajnal tin pubél an Chabál, in Tak’ixtal an Ok’oxláb k’wajat in junkuwal «yan t’ajat an atiklábtsik» xi u junáx alwaˈ. Yan i iniktsik ani i uxumtsik k’wajat in t’ajál ti kwentaj nin tak’ixtalábil na Jesús. Ejtal jajáˈtsik neˈech ka loˈey tam nin Tak’ixtal an Ok’oxláb kin wixk’aˈ an at’axtaláb. Jaxtám, max wawáˈ i léˈ ki bach’uw an labt’ajaxtalábtsik xi neˈech kin t’ajaˈ nin Tak’ixtal an Ok’oxláb, koˈol ki t’ajaˈ ti kwentaj na Jesús. Ka ajay Revelación (Apokalipsis) 7:9, 14, 16, 17.

Ban k’ij xi ti mil i tamub, in Tak’ixtal an Ok’oxláb neˈech kin t’ajaˈ xowaˈ in léˈak kin t’ajaˈ na Jehová tin tujtal an k’ij abal an atiklábtsik. An Chabál neˈech ka wenk’on ti jun i labidh wichlom chabál. Tayíl na Jesús neˈech kin witsbantsi an ti awiltaláb nin Tátaˈ (1 Corintios 15:24-26). ¿Yabxeˈ a kulbetnál ka utsaˈ jun xitaˈ xowaˈ neˈech kin t’ajaˈ nin Tak’ixtal an Ok’oxláb? Ka ajay Mateo 5:5.