AJUMTALÁB 23
Neˈech ka bachʼuw yan i alwaˈtalábtsik tam ki pujan
Na Jesús in okʼtsixnaˈ abal ki ejto ki tʼajaˈ tu aykol kʼal jajáˈ yejat ku pujan (ka ajay Mateo 28:19, 20). ¿Por janéy jaˈich an pujantaláb? ¿Janéy koˈol kin tʼajaˈ an atikláb abal ka pujan?
1. ¿Janéy jaˈich an pujantaláb?
An káw pujantaláb jaˈich jun i káw xi tál ti griego xin léˈ kin uluw «ka lupyat jun i atikláb ban jaˈ». Tam ti na Jesús pujyat ban waljaˈ, xin bij ti Jordán lupyat ani tayíl «kale ban jaˈ» (Markos 1:9, 10). Anchanáˈ jeye jun i atikláb xi tsubax in léˈ kin tʼajaˈ ti aykol kʼal na Kristo koˈol ka pujan anchanˈ janti in tʼajaˈ na Jesús, koˈol ka lupyat ban jaˈ.
2. ¿Janéy in tejwaˈmedhál jun i atikláb tám u pujnal?
Tám jun i atikláb u pujnal in tejwaˈmedhál abal in pidhámalich in ejattal na Jehová abal kin tʼojontsi. ¿Ani janti i ejtowal ki tʼajaˈ jechéˈ? Koˈol ki ólantsi na Jehová abal ki utsaˈ abal i léˈ ki tʼojontsi abal echʼekʼij. Ani jechéˈ an oláb u tʼajnal okʼox ti ku pujan. Ba jachanˈ i oláb an atikláb in utsál na Jehová abal neˈech kin kʼakʼnaˈ tokotkʼi jajáˈ ani abal neˈech kin tʼajaˈ xowaˈ jajáˈ in kulbetnál. Ani jeye in léˈ kin chápnantsi kin chʼilbay xowaˈ na Jesús in tʼajaˈ ani xowaˈ in okʼtsixnaˈ, na Jesús in uluw: «Max jun xitaˈ in léˈ ti kin wéwnaˈ, yejat kin ukʼtsi tinbáˈ ani tin wéwnaˈ» (Mateo 16:24). An atikláb xin pidhál tin ejattal na Jehová abal kin tʼojontsi ani u pujnal, in koˈol jun i chapik junaxtaláb kʼal na Jehová ani jeye kʼal an atiklábtsik xin kʼakʼnál.
3. ¿Janéy a ejtowal ka tʼajaˈ abal ka ejto ki pujan?
Max tatáˈ a léˈ ki pujan, okʼox koˈol ka exóbnaˈ tin kwentaj na Jehová ani ka chapikmédhaˈ na belomtal kʼal jajáˈ (ka ajay Hebreos 11:6). Tám tatáˈ más ka exlaˈ na Jehová, más neˈech ka chapikmé na belomtal, ani más neˈech ka kʼanidhaˈ. Jachanˈ neˈech ti tolmiy abal ka léˈnaˈ ka ólnaˈ an alwaˈ káw ani ka tʼajaˈ ti kwentaj xowaˈ an Biblia in okʼtsixnál (2 Timoteo 4:2; 1 Juan 5:3). Tam jun i atikláb u kʼwajílich xanti na Jehová in kulbetnál neˈech tám kin ejtóch kin pidhaˈ in ejattal abal kin tʼojontsi ani ka pujan (Kolosenses 1:9, 10).a
ABAL KI EXÓBNAˈ MÁS
Ki exóbnaˈ janéy tu okʼtsal nin pujantal na Jesús ani janéy in ejtowal kin tʼajaˈ jun i atikláb abal kin ejto ka pujan.
4. Xowaˈ tu okʼtsal nin pujantal na Jesús
Abal ka exlaˈ más janti pujan na Jesús, ka ajaytsik Mateo 3:13-17. Ani ki tʼilmáchtsik kʼal tin kwentaj jechéˈ:
Tam ti pujan na Jesús, ¿jaˈichak jun i chakam chipíl?
¿Tokotkʼi joltsin wéˈ i jaˈ tin ókʼ? Tám, ¿janti ti pujan?
Tam ti na Jesús pujan, in tuju kin tʼajaˈ an tʼojláb xi punkʼuntsidh kʼal an Okʼoxláb. Ka ajaytsik Lukas 3:21-23 ani Juan 6:38, ani ki tʼilmáchtsik kʼal tin kwentaj jechéˈ:
Tayíl tam ti pujan na Jesús, ¿jantʼom tʼojláb jaˈich xin pidhaˈ tʼajat tin exbádh?
5. An pujantaláb jaˈich jun xataˈ xi a ejtowal ka tʼajaˈ
Awich xónaˈ tám a chalpayal abal a léˈ ki pujan ka achʼaˈ i jikʼél o ka achʼaˈ tʼojláb. Por max ka ojontsi ka exóbnaˈ más tin kwentaj na Jehová, neˈech ka exlaˈ más ani neˈech ka achʼaˈ más alwaˈ ta báˈ abal ki pujan. Abal ka exlaˈ juntsik i atiklábtsik xi pujan ka chuˈutsik an VIDEO.
Ka ajaytsik Juan 17:3 ani Santiago 1:5, ani ki tʼilmáchtsik kʼal tin kwentaj jechéˈ:
¿Kʼal janéy ti neˈech ka tolmiyat jun i atikláb abal ka kʼwajay tʼojojodh abal ka pujan?
I pidhál ni ejattal na Jehová tám i utsál abal i léˈ ki tʼojontsi abal echʼekʼij.
6. Tam jun u pujnal u ulel ti kʼwajíl tin bitsówil na Jehová
Tam jun u pujnal, u ulel ti kʼwajíl ba nin bitsówil na Jehová, jechéˈ jaˈich jelti jun i yaneláb xi kʼwajat junkudh ani xi kʼwajat tin pubíl an Chabál. Aunque u tál ba kʼeˈet i bitsowtsik o kʼeˈetich xanti tu pubenek, ejtal i belál jayéchkʼi ani i chápnantsal ki tʼajaˈ xowaˈ an Okʼoxláb in kulbetnál. Ka ajaytsik Salmo 25:14 ani 1 Pedro 2:17, ani ki tʼilmáchtsik kʼal tin kwentaj jechéˈ:
Kʼal xowaˈ i ajay ban versículos, ¿jantʼom alwaˈtaláb i bachʼwal tam u pujnal?
XOWAˈ JUNTSIK IN ULAL: «Nanáˈ yabél u achʼál in tʼojojodh abal kin pujan».
Aunque a achʼál anchanáˈ, ¿a chalpayal abal alwaˈ abal ka chápnantsi abal ki pujan?
XOWAˈ I EXOBNÁMICH
Na Jesús in uluw abal ki tʼajaˈ tu aykol kʼal jajáˈ koˈol ku pujan. Abal ki bajaw ki tʼajaˈ jechéˈ koˈol ki chapikmédhaˈ ni belomtal kʼal na Jehová, koˈol ki tʼajaˈ xowaˈ in kulbetnál ani koˈol ki tʼajtsi jun i oláb xonti utsál abal neˈech ki tʼojontsi abal echʼekʼij.
Ki chalpay xowaˈ i exobnámal
¿Janéy jaˈich an pujantaláb, ani jantʼó ti jaˈich lej exbadh?
¿Jowaˈ alwaˈtalábtsik neˈech ki bachʼuw max ki pidhaˈ ni ejattal na Jehová ani ku pujan?
¿Janéy koˈol kin tʼajaˈ jun i atikláb okʼox kin pidhaˈ in ejattal na Jehová ani ka pujan?
KA EXLAˈ JUN XATAˈ MÁS
Ka chuˈuw xowaˈ in chalpayal juntsik i atikláb kʼal tin kwentaj an pujantaláb ani xowaˈ in ulal an Biblia.
Ka exóbnaˈ juntsik i tolmixtaláb xi neˈech ti tolmiy abal ki pujan.
Ka ajay xowaˈ in tʼajaˈ jun i inik abal kin ejto ka pujan.
«In léˈaktsik abal tu kwetémtal ku exlaˈ an tsubaxtaláb» (La Atalaya, 1 de febrero de 2013)
Ka chuˈuw jantʼó ti lej alwaˈ ka chápnantsi ki pujan ani janéy a ejtowal ka tʼajaˈ abal ki kʼwajay tʼojojodh.
«¿Koˈolich kin pujan?» (Lo que los jóvenes preguntan. Respuestas prácticas [volumen 2], capítulo 37)
a Ani max jun xitaˈ pujnékich ba kʼeˈet i belomtaláb, koˈol juní ka pujan. ¿Jantʼókʼi? Kom ba jachanˈ i belomtaláb yab okʼtsin an tsubaxtaláb xin ólnál an Biblia (ka chuˈuw Hechos 19:1-5 ani an ajumtaláb 13).