AJUMTALÁB 25
¿Janéy in léˈ an Okʼoxláb abal wawáˈ?
An Biblia in ulal abal an atiklábtsik tokot «u kʼwajíl wéˈ i kʼij ani in kóˈyal yan i yajtsiktaláb» (Job 14:1). Por, ¿anchanáˈ tin léˈ an Okʼoxláb ku kʼwajay? Ani max yab anchanáˈ, ¿janéy in léˈ an Okʼoxláb abal wawáˈ? ¿Neˈech ka tʼajan jun i kʼij xowaˈ jajáˈ in léˈ? Ka chuˈuw an alabél tokʼtsixtaláb xin pidhnál an Biblia.
1. ¿Janti jaˈich an xeˈchintaláb xi an Okʼoxláb in léˈ ki kóˈoy?
An Okʼoxláb in léˈ xowaˈ más alwaˈ abal wawáˈ. Tam tin tʼajaˈ an jidhtal atiklábtsik, na Adán ani na Eva, in kʼwajbaˈ ba jun i alabél wichlom chabál: an jardín ti Edén. Ani tajaˈ «an Okʼoxláb in lábtʼajaˈtsik ani in utsaˈ: ‹Ka kóˈoytsik yan i chakam, ki yaneytsik, ka tsʼutsuy an Chabál ani ka tʼójomnaˈtsik›» (Génesis 1:28). Na Jehová in léˈak abal kin kóˈoy i chakamtsik, kin wenkʼo ejtal an Chabál ti jun i wichlom chabál ani kin beletnaˈ an koˈnéltsik. Xowaˈ in léˈ wiˈik na Jehová jaˈich abal an atiklábtsik ka kʼwajay alwaˈ ani ka kʼwajay abal echʼekʼij.
Aunque xoˈ yab u kʼwajat xanti in léˈ wiˈik an Okʼoxláb,a por jajáˈ yab in jalkʼuyámal nin chalápil (Isaías 46:10, 11). Jajáˈ bélkʼi in léˈ abal an atiklábtsik ka kʼwajay alwaˈ ani kin ejto ka kʼwajay abal echʼekʼij (ka ajay Apokalipsis 21:3, 4).
2. ¿Janti i ejtowal ki tʼajaˈ abal ku kʼwajay kulbél xoˈ ta kʼitsáj?
Ejtal an atiklábtsik «i yéntsal na Dios» kom jajáˈ anchanˈ tu tʼajámal, abal ki léˈnaˈ ki exlaˈ ani ki kʼakʼnaˈ (ka ajay Mateo 5:3-6). An Okʼoxláb in léˈ ki kóˈoy jun i alwaˈ jaˈúbtaláb kʼal jajáˈ, ani ki kʼanidhaˈ ani «ki tʼajaˈ ti kwentaj ejtal nin takʼixtal», ani jeye ki tʼojontsi kʼal ejtal ni itsích (Deuteronomio 10:12; Salmo 25:14). Max ki tʼajaˈ ejtal jechéˈ, neˈech ku kʼwajay kulbél aunque ki kóˈoy i tʼeˈpintaláb. Tam i kʼakʼnál na Jehová i achʼál abal ni xeˈchintal in koˈol tʼajat yan i jalbíl, kom exom i tʼajál xowaˈ an Okʼoxláb in kulbetnál.
ABAL KI EXÓBNAˈ MÁS
Neˈech ki chuˈuw janti in tejwaˈmédhaˈ i kʼanidhomtaláb na Jehová tam tin tʼajaˈ an Chabál abal ki ejto ku kʼwajay, ani jeye neˈech ki exóbnaˈ abal jantʼó tu tʼajámal.
3. Na Jehová in léˈ abal an atiklábtsik kin kóˈoy jun i xeˈchintaláb lej kʼijidh
Ka chuˈutsik an VIDEO ani ki tʼilmáchtsik kʼal tin kwentaj jechéˈ:
¿Abal jantʼó tin tʼajámal an Okʼoxláb lej alwaˈ an Chabál?
Ka ajaytsik Eclesiastés 3:11 ani ki tʼilmáchtsik kʼal tin kwentaj jechéˈ:
¿Janéy tu okʼtsal jechéˈ kʼal tin kwentaj na Jehová?
4. An Okʼoxláb yab in jalkʼuyámal nin chalap kʼal xowaˈ in léˈ wiˈik kin tʼajaˈ
Ka ajaytsik Salmo 37:11, 29 ani Isaías 55:11, ani ki tʼilmáchtsik kʼal tin kwentaj jechéˈ:
¿Janti i choˈób abal an Okʼoxláb yab in jalkʼuyámal nin chalap kʼal xowaˈ in léˈ kin tʼajaˈ kʼal wawáˈ?
Jun i atáj xi kʼwajat lej pakukulich u ejtowáb ka lejkiyat ti ít. Anchanˈ jeye an Chabál: an atiklábtsik yab in beletnámal, por an Okʼoxláb neˈech kin lejkiy ti ít abal ka kʼwajay an atiklábtsik xi kʼál tu kʼanidháb
5. Ki kʼakʼnaˈ na Jehová tu tʼajál ku kʼwajay kulbél ti xeˈchintal
Tam i exlál jantʼó tu kʼwajat ejat tu tʼajál ku kʼwajay más kulbél. Ka chuˈutsik an VIDEO ani ki tʼilmáchtsik kʼal tin kwentaj jechéˈ:
¿Jantʼom alwaˈtalábtsik in bachʼuw na Terumi kom in choˈóbnaˈ jantʼó tu kʼwajat ejat?
Ka ajaytsik Eclesiastés 12:13 ani ki tʼilmáchtsik kʼal tin kwentaj jechéˈ:
Kʼal ejtal xowaˈ an Okʼoxláb in tʼajámal kʼal wawáˈ, ¿janéy in tomnál ki tʼajaˈ abal ki tejwaˈmédhantsi ti kʼakʼnaxtaláb?
XOWAˈ JUNTSIK IN KONIAL: «¿Jantʼó tu jiladh ba jechéˈ i xeˈchintaláb? ¿Jantʼó tu kʼwajat ejat?».
¿Janéy neˈech ka tokʼoy tatáˈ?
XOWAˈ I EXOBNÁMICH
Na Jehová in léˈ abal ku kʼwajay kʼijidh abal echʼekʼij techéˈ ti Chabál. Por aníl jeye xoˈ ta kʼitsáj, i ejtowal ku kʼwajay kulbél max i kʼakʼnál an Okʼoxláb kʼal ejtal ni itsích.
Ki chalpay xowaˈ i exobnámal
Tam ti na Jehová in tʼajaˈ na Adán ani na Eva, ¿janéy in léˈak abal jajáˈtsik?
¿Jantʼó ti choˈób abal an Okʼoxláb yab in jalkʼuyámal nin chalap kʼal xowaˈ in léˈ kin tʼajaˈ kʼal an atiklábtsik?
¿Janéy neˈech ti tolmiy abal ka kóˈoy jun i xeˈchintaláb kulbél?
KA EXLAˈ JUN XATAˈ MÁS
Ka chuˈuw jantʼó ti tsubax i belál abal an wichlom chabál ti Edén tsubax waˈchinék.
«An wichlom chabál ti Edén, ¿jaˈichkʼi tokot jun i aniˈ tʼilab?» (La Atalaya, 1 de enero de 2011)
Ka chuˈuw jantʼó ti tsubax i belál abal an Chabál yab jaykʼi neˈech ka wixkʼá.
Ka exóbnaˈ xowaˈ in ulal an Biblia kʼal tin kwentaj jantʼó tu kʼwajat ejat.
Ki chuˈuw janti jun i inik in chalpayalak abal in koˈol ejtal xowaˈ in léˈ por in tʼajaˈ ti kwentaj abal in yejentsal jun xataˈ tin xeˈchintal.
a Xi ba jun an ajumtaláb neˈech ki chuˈuw jantʼó ti yab u kʼwajat xanti in léˈ wiˈik an Okʼoxláb.