AJUMTALÁB 57
¿Janéy neˈech ka watʼey max ka tʼajaˈ jun i walastaláb púlek?
Aunque a kʼanidhál na Jehová ani a chápnantsal abal ka tʼajaˈ xowaˈ jajáˈ in kulbetnál, juntsikíl neˈech ki ukʼpin ani ka tʼajaˈ jun i walastaláb púlek (1 Korintios 6:9, 10). Max tatáˈ jun a kʼitsáj ki walbin na Jehová neˈech kin ojontsi ti kʼanidhaˈ; neˈech ti pakwlantsi ta walab ani neˈech ti tolmiy.
1. ¿Janéy koˈol ki tʼajaˈ abal na Jehová tu pakwlantsi i walab?
Tam jun i atikláb xin tʼójontsal na Jehová in tʼajál ti kwentaj abal walbinék, u tʼeˈpinal juntʼakʼi. Por na Jehová in pidhál jechéˈ i káw abal ka kʼijidhmé: «Aunque na walastalábil ka kʼwajay chakniˈ juntʼakʼi, neˈech ka jilkʼon dhakniˈ jelti an nieve» (Isaías 1:18). Na Jehová neˈech tu pakwlantsi ti walabil, max tsubax ku tʼeˈpin kʼal xowaˈ i tʼajámal ani ki kontsi ti pakwlantsixtaláb kʼal ejtal i itsích. Aníl jeye koˈol ki chápnantsi abal ki jalkʼuy ni chalápil ani yabich ki tʼajaˈ an walastaláb xi tʼajámal, ani ki tʼajaˈ ti kwentaj an takʼixtalábtsik xi tu pidhál ban Biblia (ka ajay Isaías 55:6, 7).
2. Max ku walbin, ¿janti in éynál na Jehová an okʼnomtsik abal tu tolmiy?
Na Jehová in pidhál jechéˈ i takʼixtaláb an atikláb xu walbinal: «yejat ka kantsin an ti takʼix belomtsik», jechéˈ i takʼix belomtsik jaˈich an okʼnomtsik (ka ajay Santiago 5:14, 15). Jajáˈtsik bijidh kʼal an tʼokat chápláb, in kʼanidhál na Jehová ani in kʼanidhál an kidháblábtsik ban junkuntaláb ani in ejtowal tu tolmiy abal ku utey juní kʼal an Okʼoxláb (Gálatas 6:1).
¿Janti tu tolmiyal an okʼnomtsikmax ki tʼajaʼ jun i púlek walastaláb? Cháb o óx i okʼnomtsik tu wiltsal kʼal an Biblia jantʼó ti yab alwaˈ xowaˈ i tʼajámal. Tu tolmiyal ani tu pidhál i takʼixtaláb abal yabich ki tʼajaˈ an walastaláb xi tʼajámal. Max jun xitaˈ ban junkuntaláb yab in léˈ kin jilaˈ kin tʼajaˈ an walastaláb xin tʼajál, neˈech ka káldhá ban junkuntaláb abal yab kin chʼilkʼoy xi kʼeˈettsik.
ABAL KI EXÓBNAˈ MÁS
Ki kʼakʼnaˈ an tolmixtalábsik xi na Jehová tu pidhál tam u ukʼpinal.
3. Ki ólnaˈ an walastaláb xi tʼajámal neˈech tu tolmiy tʼajat
Tam u ukʼpinal i tʼeˈpindhantsal tin itsích na Jehová, jaxtám koˈol ki óltsi an walastaláb xi tʼajámal. Ka ajaytsik Salmo 32:1-5 ani ki tʼilmáchtsik kʼal tin kwentaj jechéˈ:
¿Jantʼó ti lej alwaˈ ki óltsi na Jehová an walastaláb xi tʼajámal?
Koˈol ki óltsi na Jehová an ukʼpintaláb xi koˈyámal por aníl jeye koˈol ki óltsi ani ki kontsi ti tolmixtaláb an okʼnomtsik abal ku kʼwajay kʼijidh. Ka chuˈutsik an VIDEO ani ki tʼilmáchtsik kʼal tin kwentaj jechéˈ:
¿Janti ti tolmiyat na Canon kʼal an okʼnomtsik abal ka witsiy kʼal na Jehová?
Jaˈich lej exbadh abal ki utsaˈ an okʼnomtsik xowaˈ i achʼál ani ki utsaˈ an tsubaxtaláb, kom jajáˈtsik kʼwajat abal tu tolmiy. Ka ajaytsik Santiago 5:16 ani ki tʼilmáchtsik kʼal tin kwentaj jechéˈ:
¿A chalpayal max ka óltsi an tsubaxtaláb an okʼnomtsik neˈech kin ejto ti tolmiy? ¿Jantʼókʼi ?
Ka ólnaˈ an walastaláb xi a tʼajámal, ka utsaˈ an tsubaxtaláb an okʼnomtsik ani ka jilaˈ abal ti tolmiy.
4. Na Jehová in xalkʼantsal ti yajnantsixtaláb xitaʼtsik walbinék
Tam jun xitaˈ xi walbinék yab in léˈ kin tʼajaˈ ti kwentaj nin takʼixtal na Jehová, u káldháb ban junkuntaláb. Ani yabich tam u junkunal kʼal jajáˈ. Ka ajaytsik 1 Korintios 5:6, 11 ani ki tʼilmáchtsik kʼal tin kwentaj jechéˈ:
Anchanˈ jelti an levadura max ka xukʼyat kʼal an kʼoye in jilbédhál, a chalpayal max ku junkun kʼal jun xitaˈ xi yab in léˈ kin jilaˈ kin tʼajaˈ an walastaláb, ¿neˈech tu chʼilkʼoy kʼal xowaˈ in chalpayal? ¿Jantʼókʼi?
Kom an okʼnomtsik in achʼál i yajnantsixtaláb anchanʼ janti na Jehová, in kʼankʼumiyal an walablomtsik abal ka witsiy ban junkuntaláb an junkuntaláb witsenek juní kʼal na Jehová ¿Jantʼókʼi? Tam ti kaldhátsik in yajnaˈtsik juntʼakʼi por kʼál ti tolmiyat abal ka witsiytsik (Salmo 141:5).
Tam jun i atikláb u káldháb ban junkuntaláb, ¿janti in xalkʼál na Jehová abal jaʼich jun i okʼoxláb xi lujat, xi u yajnantsix ani u kʼanidhax?
5. Na Jehová tu pakwlantsal max tsubax i jilál ki tʼajaˈ xowaˈ yab alwaˈ
Na Jesús in tʼilaˈ jun i tʼilab xonti in ólnál janéy in achʼál na Jehová tam jun i atikláb in jilál kin tʼajaˈ xowaˈ yab alwaˈ. Ka ajaytsik Lukas 15:1-7 ani ki tʼilmáchtsik kʼal tin kwentaj jechéˈ:
¿Janéy in achʼál na Jehová tam jun i atikláb in jilál kin tʼajaˈ xowaˈ yab alwaˈ?
Ka ajaytsik Ezequiel 33:11 ani ki tʼilmáchtsik kʼal tin kwentaj jechéˈ:
¿Janéy koˈol ki tʼajaˈ abal ki kulbédhaˈ na Jehová?
Na Jehová jaˈich jelti jun i beletnom: tu kʼanidhál juntʼakʼi.
XOWAˈ JUNTSIK IN ULAL: «Yab u léˈ kin tʼilmách kʼal an okʼnomtsik. Max ku tʼiltsi xowaˈ u tʼajámal neˈech kin káldhá ban junkuntaláb».
¿Janéy neˈech ka uluw max jun xitaˈ ti utsaˈ anchanˈ?
XOWAˈ I EXOBNÁMICH
Max jun a kʼitsáj ki tʼajaˈ jun i walastaláb pulek por tsubax ku tʼeˈpin kʼal xowaˈ i tʼajámal ani yabich ki tʼajaˈ an walastaláb, na Jehová neˈech tu pakwlantsi.
Ki chalpay xowaˈ i exobnámal
¿Jantʼó ti alwaˈ abal ki óltsi na Jehová an walastaláb xi tʼajámal?
¿Janéy koˈol ki tʼajaˈ abal na Jehová tu pakwlantsi i walab?
Max jun a kʼitsáj ki tʼajaˈ jun i walastaláb púlek, ¿jantʼó ti lej exbadh ki kontsi ti tolmixtaláb an okʼnomtsik?
KA EXLAˈ JUN XATAˈ MÁS
Ka chuˈuw janti tolmiyat jun i inik tam tin exóbnaˈ ti Isaías 1:18 abal na Jehová u yajnantsix.
¿Janéy in t’ajál an ok’nomtsik abal kin tolmiy xitaˈtsik in t’ajamál jun i púlek walastaláb?
An atiklábtsik xi yab in jilámal ti walablom jeye u xalkʼantsáb ti kʼanidhomtaláb ani ti yajnantsixtaláb. ¿Janti?
«Janti u tolmiyáb an atiklábtsik jitaʼtsik káldhats ban junkuntaláb?» (La Atalaya, agosto de 2024)
Ka chuˈuw ban biografía «U yejentsalak kin witsiy kʼal na Jehová» janti jun i inik in achʼaˈ abal u kʼanidháb kʼal na Jehová.