AJUMTALÁB 56
Ki tólmixin abal an junkuntaláb ka kʼwajay junkudh
Tam u kʼwajat kʼal an kidháblábtsik i achʼál kʼijidh juntʼakʼi. I achʼál jelti an takʼix David tam tin uluw: «¡In kulbél juntʼakʼi ku chuˈuw an kidháblábtsik abal kʼwajat kʼijidh ani junkudh!» (Salmo 133:1). Abal ka waˈchin echʼekʼij i junkudhtaláb ani kʼijidhtaláb ban junkuntaláb; koˈol ki chápnantsi echʼekʼij ku junaxin alwaˈ.
1. ¿Janéy neˈech ka chuˈuw ba nin bitsówil na Jehová?
Max ki kʼale ba jun i junkuntaláb ba píl i bitsow xon tu káwnáb kʼeˈet i káwintaláb, yab xónaˈ neˈech ka exbay; por neˈech ka achʼaˈ kʼijidh ki kʼwajay kʼal an kidháblábtsik. ¿Jantʼókʼi? Kom neˈech ka chuˈuw abal an kidháblábtsik u kʼánídháxtsik jún ani jún. In chápnantsaltsik kin kʼanidhaˈ na Jehová ani in exóbnáltsik an Biblia kʼal an publicaciones xi wawáˈ weye i éynál. Ejtal an kidháblábtsik tin pubél an chabál i léˈ «ku utey kʼal na Jehová» abal ki kʼakʼnaˈ ani ku tʼójon «junkudh» (Sofonías 3:9; nota).
2. ¿Janti a ejtowal ki tólmixin abal an junkuntaláb ka kʼwajay junkudh?
An Tʼokat Dhutslab in ulal: «Ki kʼánídháxintsik jún ani jún kʼal ejtal na tʼokat itsích» (1 Pedro 1:22). ¿Janti i ejtowal ki tʼajaˈ ti kwentaj jechéˈ i takʼixtaláb? Ki kʼanidhaˈ ejtal an kidháblábtsik ani yab ki tʼajaˈ ti kwentaj an ukʼpintalábtsik xin koˈyal, más alwaˈ ki chuˈuw xowaˈ in tʼajál alwaˈ. Yab tokot ku junkun kʼal xitaˈ u chalpax jayéchkʼi jelti wawáˈ; ki jaˈúbnaˈ ejtal an kidháblábtsik ani yab ki pojkaˈ kom júnich in káwintal júnich in wal o kom tál ba píl i bitsow (ka ajay 1 Pedro 2:17).a
3. ¿Janéy neˈech ka tʼajaˈ tam ka tamétnaˈ jun i kʼibataláb kʼal jun i kidhábláb?
Ejtal i chápnantsal ku kʼwajay junkudh; por kom u walbidh ejtal u ukʼpinal ani juntsikíl i ulal o i tʼajál jun xataˈ xi kin yajbédhaˈ xi kʼeˈet, ani juntsikíl xi kʼeˈettsik jeye tu yajbedhál. Jaxtám an Tʼokat Dhutslab tu pidhál jechéˈ i takʼixtaláb: «Ki kóˈóntsixintsik ti chaˈattaláb jún ani jún ani ki pákwlántsíxin jún ani jún max ki waltsíxin. Anchanˈ jelti na [Jehová] ti pakwlantsámaltsik, anchanˈ teye ka tʼajaˈtsik» (ka ajay Kolosenses 3:13). Tsudhey ka tsudhey wawáˈ u ukʼpinal yaníl kʼal na Jehová ani jajáˈ tu pakwlantsal. Jaxtám jajáˈ in léˈ abal wawáˈ weye ki pakwlantsi xi kʼeˈet. Jaxtám max tatáˈ a waltsámal kʼeˈet xitaˈ, ka kontsi ti pakwlantsixtaláb ani anchanˈ neˈech ki kʼwajaytsik kʼijidh (ka ajay Mateo 5:23, 24).b
ABAL KI EXÓBNAˈ MÁS
Ka chalpay janéy a ejtowal ka tʼajaˈ abal an junkuntaláb ka kʼwajay kʼijidh ani junkudh.
¿Janéy koˈol ka tʼajaˈ abal ki junaxin alwaˈ kʼal jun i kidhábláb?
4. Ki kʼanidhaˈ ejtal an kidháblábtsik
I kʼanidhál ejtal an kidháblábtsik por juntsikíl awich ki achʼaˈ tʼojláb ku junkun ani ki jaˈúbnaˈ jun i kidhábláb, kom júnich in káwintal o júnich in wal. ¿Janéy neˈech tu tolmiy? Ka ajaytsik Hechos 10:34, 35 ani ki tʼilmáchtsik kʼal tin kwentaj jechéˈ:
Kom na Jehová in bachʼwal ejtal an atiklábtsik abal ka tʼojontsat, ¿janti koˈol ka chuˈuw an atiklábtsik xi yab jayéchkʼi jelti tatáˈ?
Xonta kʼwajíl, ¿jantʼó ti an atiklábtsik in pojkál xi kʼeˈet? ¿Jantʼó ti yab koˈol teye ka tʼajaˈ anchanáˈ?
Ka ajaytsik 2 Korintios 6:11-13 ani ki tʼilmáchtsik kʼal tin kwentaj jechéˈ:
¿Janéy a ejtowal ka tʼajaˈ abal ka kʼanidhaˈ más an kidháblábtsik?
5. Ka pakwlantsi echʼekʼij xi kʼeˈettsik
Na Jehová tu kʼanidhál juntʼakʼi ani echʼekʼij tu pakwlantsal i walab. Ka ajaytsik Salmo 86:5 ani ki tʼilmáchtsik kʼal tin kwentaj jechéˈ:
Kʼal xowaˈ i ajay ba jechéˈ i pejats, ¿jáyíl tu pakwlantsal na Jehová?
¿A kʼakʼnál kom na Jehová u pakwlantsix? ¿Jantʼókʼi?
¿Joykʼi ti ejtowal ki achʼaˈ tʼojláb ku junaxin alwaˈ kʼal xi kʼeˈettsik?
¿Janéy i ejtowal ki tʼajaˈ abal ki chʼilbay na Jehová, ani ku kʼwajay junkudh ani kʼijidh kʼal an kidháblábtsik? Ka ajaytsik Proverbios 19:11 ani ki tʼilmáchtsik kʼal tin kwentaj jechéˈ:
Tam jun xitaˈ ti waltsal ani ti itʼixbédhál, ¿janéy a ejtowal ka tʼajaˈ abal yab ki péjéxin?
Tam wawáˈ i waltsal xi kʼeˈettsik, ¿janéy koˈol ki tʼajaˈ? Ka chuˈutsik an VIDEO ani ki tʼilmáchtsik kʼal tin kwentaj jechéˈ:
¿Janéy in tʼajaˈ an kidhábláb abal ka kʼwajay kʼijidh kʼal xi jun an kidhábláb?
6. Ka chápnantsi ka chuˈuw xowaˈ in tʼajál alwaˈ an kidháblábtsik
Tam i watʼnál más i kʼij kʼal an kidháblábtsik i exlál más alwaˈ, ani i chuˈtal xowaˈ alwaˈ in tʼajál por i chuˈtal jeye tam u ukʼpinal. ¿Janéy koˈol ki tʼajaˈ abal ki chuˈuw an alwaˈtalábtsik xin tʼajál? Ka chuˈutsik an VIDEO ani ki tʼilmáchtsik kʼal tin kwentaj jechéˈ:
¿Janéy neˈech ti tolmiy abal ka kʼanidhaˈ ejtal an kidháblábtsik?
Na Jehová in tʼajál ti kwentaj xowaˈ i tʼajál alwaˈ. Ka ajaytsik 2 Crónicas 16:9a ani ki tʼilmáchtsik kʼal tin kwentaj jechéˈ:
¿Janéy a achʼál kom na Jehová in tʼajál ti kwentaj xowaˈ a tʼajál alwaˈ?
Hasta jun i tʼujub xi alabél tʼajat yab u kalel alwaˈ, por in koˈol tʼajat yan in jalbíl. Anchanˈ jeye u watʼel kʼal an kidháblábtsik; u ukʼpinal kom u walbidh por bélkʼi na Jehová tu kʼanidhál tʼajat.
XOWAˈ JUNTSIK IN ULAL: «Neˈech tu pakwlantsi por yab neˈech ku ukʼtsi janéy tin tʼajtsi».
¿Jantʼó ti koˈol ku pakwlantsixin echʼekʼij?
XOWAˈ I EXOBNÁMICH
Max tatáˈ a pakwlantsal ani a kʼanidhál ejtal an kidháblábtsik, neˈech ki tólmixin abal an junkuntaláb ka kʼwajay kʼijidh ani junkudh.
Ki chalpay xowaˈ i exobnámal
¿Janéy a ejtowal ka tʼajaˈ abal ka kʼanidhaˈ ejtal an atiklábtsik?
¿Janéy neˈech ka tʼajaˈ tam ka tamétnaˈ jun i kʼibataláb kʼal jun i kidhábláb?
¿A léˈ ka pakwlantsi xi kʼeˈet anchanˈ xanti in tʼajál na Jehová? ¿Jantʼókʼi?
KA EXLAˈ JUN XATAˈ MÁS
Jantʼom jumbaxtaláb in éynaˈ na Jesús abal tu okʼtsi abal yab koˈol ki koˈoy ti kwentaj an ukʼpintalábtsik xin koˈyal xi kʼeˈet.
¿Koˈol ki konoy i pakwlantsixtaláb aunque i chalpayal abal yab i walámal?
«Yejat ku pakwlantsixin abal ku kʼwajay kʼijidh» (La Atalaya, 1 de noviembre de 2002)
Ka chuʼuw xanéy neʼech tu tolmiy abal ki kʼanidhaʼ ejtal an atiklábtsik.
Ka exóbnaˈ janéy a ejtowal ka tʼajaˈ tam ka tamétnaˈ jun i kʼibataláb kʼal jun i kidhábláb.
«Ki lejkiy an kʼibatalábtsik kʼal i kʼanidhomtaláb» (La Atalaya, mayo de 2016)
a Ban óltsixtaláb 6 u ólnáb janéy i tʼajál an óltsixtsik kʼal a Jehová abal yab ki chʼilkʼoy xi kʼeˈet kʼal jun i yawˈlách kom i kʼanidhál.
b Ban óltsixtaláb 7 u wilkʼáb janti i ejtowal ki éynaˈ an takʼixtalábtsik xi tu pidhál an Biblia tam ki koˈoy jun i kʼibataláb tin kwentaj an tumín o tam koˈol ku kʼale tu lejkinal ban awiltaláb.