AJUMTALÁB 55
Ki tólmixin ban junkuntaláb
Tin pubél an chabál waˈach yan i junkuntalábtsik xonti i kʼakʼnál na Jehová. An óltsixtsik kʼal a Jehová i kʼakʼnál an óltsixtaláb ani an tolmixtaláb xi u pidhnal tʼajaˈ, ani u tolmix ban junkuntaláb kʼal i kulbétaláb ani ikʼaxtaláb. ¿A achʼál teye anchanáˈ?
1. ¿Janti a ejtowal ka éynaˈ an kʼij ani a cháp abal ki tólmíxin ban junkuntaláb?
Ejtal i ejtowal ku tólmixin ban junkuntaláb. ¿Waˈach i kidháblábtsik xi púlekich xi a ejtowal ka tolmiy? ¿A ejtowal ka júnaˈ ban junkuntaláb? ¿A ejtowal ki kʼale ka tolmiy tin kʼimáˈ ani ka chʼaytsi xowaˈ in yejentsal? (Ka ajay Santiago 1:27). Aníl jeye i ejtowal ku tólmixin abal ka tʼokédhá ani ka lejkiyat an atáj junkuntaláb. Yab xitaˈ tu nixoknál abal ki tʼajaˈ; i tʼajál ejtal jechéˈ kʼal i kulbétal kom i kʼanidhál na Jehová ani i kʼanidhál an kidháblábtsik (Salmo 110:3).
An kidháblábtsik kwitól xi pujadh in ejtowal jeye ka tólmixin ban junkuntaláb kʼal kʼeˈet i tʼojlábtsik. Max kin chápnantsi in ejtowal kin bajaw ti tolmix okʼnom ani tayíl ti okʼnom ban junkuntaláb. Aníl jeye, ejtal i ejtowal ku tʼojon jelti precursores. Kʼeˈet i kidháblábtsik u kʼalel ti tolmix abal ka kuban i atáj junkuntaláb. Ani kʼeˈettsik u kʼalel ti kʼwajíl ba kʼeˈet i junkuntaláb xonti in yejentsal i tolmixtaláb.
2. ¿Janti i ejtowal ki éynaˈ i tumínal ani xowaˈ i koˈol abal ku tólmixin ban junkuntaláb?
An Tʼokat Dhutslab in ulal: «Ka kʼakʼnaˈ na Jehová kʼal xowaˈ a koˈol» (Proverbios 3:9). I kulbetnál juntʼakʼi ki éynaˈ i tumínal ani xowaˈ i koˈol abal ku tólmixin ban junkuntaláb ani abal ka ólná an alwaˈ tʼilab tin pubél an chabál (ka ajay 2 Korintios 9:7). Aníl jeye kʼal an tolmixtaláb kʼal an tumín xi pidhnál in tolmiyal an kidháblábtsik xin watʼnámal jun i kʼakʼadhtaláb. Yan i kidháblábtsik in ujnámal kin pílmédhá wéˈ i tumín abal kin pidhnaˈ i tolmixtaláb (ka ajay 1 Korintios 16:2). Jechéˈ i tolmixtaláb u ejtowáb ka balyat ban tsʼitsik cajas xi waˈach ban atáj junkuntaláb o ka abnaˈ ti internet ban página donate.jw.org. Na Jehová tu jilál ki pidhaˈ xowaˈ i koˈol abal ki xalkʼantsi abal i kʼanidhál.
ABAL KI EXÓBNAˈ MÁS
Ki chuˈuw juntsik xanéy kʼal xanti a ejtowal ki tólmixin ban junkuntaláb.
3. A ejtowal ka éynaˈ xowaˈ a koˈol
Na Jehová ani na Jesús in kʼanidhál xitaˈ in pidhnál xowaˈ in koˈol kʼal i kulbétaláb. Jun a kʼitsáj na Jesús in chuˈuw an chápláb xin tʼajaˈ jun i chemtsidh mímláb abal kin pidhnaˈ i tolmixtaláb. Ka ajaytsik Lukas 21:1-4 ani ki tʼilmáchtsik kʼal tin kwentaj jechéˈ:
¿Yejat ki pidhnaˈ yan i tumín abal ka kulbé na Jehová?
¿Janti in achʼál na Jehová ani na Jesús tam i pidhnál kʼal i kulbétal?
Abal ka choˈóbnaˈ janéy tu éynáb an tolmixtaláb kʼal i tumín xi pidhnál, ka chuˈutsik an VIDEO. Tayíl ki tʼilmáchtsik kʼal tin kwentaj jechéˈ:
¿Janti in tolmiyal an junkuntalábtsik tin pubél an chabál an tolmixtaláb kʼal an tumín xi pidhnál?
4. A ejtowal ki kʼale ta tolmix
Nin tʼojnáliltsik na Jehová ti wejeˈ yab tokot tólmixintsik kʼal i tumín, aníl jeye tólmixin kʼal i kulbétaláb abal ka lejkiyat an atájtsik xonti tu junkunalak abal kin kʼakʼnaˈ na Jehová. Ka ajaytsik 2 Crónicas 34:9-11 ani ki tʼilmáchtsik kʼal tin kwentaj jechéˈ:
¿Janéy in tʼajaˈ ejtal an bitsow ti Israel abal kin beletnaˈ «nin kʼimáˈ na Jehová» xon tu junkunalak abal kin kʼakʼnaˈ?
Abal ka chuˈuw janti in ojontsaltsik kin tʼajaˈ an óltsixtsik kʼal a Jehová hasta xoˈ ta kʼitsáj, ka chuˈutsik an VIDEO. Tayíl ki tʼilmáchtsik kʼal tin kwentaj jechéˈ:
¿Jantʼó ti lej exbadh ki koˈoy an atáj junkuntaláb tʼokat ani lejkidh alwaˈ?
¿Janéy a ejtowal ka tʼajaˈ abal ki tólmixin?
5. An kidhábláb inik in ejtowal kin chápnantsi abal kin tʼajaˈ más i tʼojláb
An Tʼokat Dhutslab in ulal abal an kidháblábtsik inik yejat kin chápnantsi abal ka utey más kʼal na Jehová, kom anchanˈ neˈech kin ejto kin tolmiy más an kidháblábtsik ban junkuntaláb. Abal ka chuˈutsik janti in tʼajaˈ jun i kidhábláb, ka chuˈutsik an VIDEO. Tayíl ki tʼilmáchtsik kʼal tin kwentaj jechéˈ:
¿Janéy in tʼajaˈ na Ryan abal ka utey más kʼal na Jehová ani kin tolmiy más an kidháblábtsik ban junkuntaláb?
An Tʼokat Dhutslab in ulal janéy koˈol kin tʼajaˈ an kidháblábtsik abal kin bajaw ti okʼnom o ti tolmix okʼnom. Ka ajaytsik 1 Timoteo 3:1-13 ani ki tʼilmáchtsik kʼal tin kwentaj jechéˈ:
¿Janéy koˈol kin tʼajaˈ an kidháblábtsik xin léˈ kin bajaw ti okʼnom ani ti tolmix okʼnom?
¿Janéy koˈol kin tʼajaˈ nin yaníl? (Ka chuˈutsik an versículos 4 ani 11).
Max an kidháblábtsik kin chápnantsi kin tʼajaˈ ejtal xowaˈ in konial an Tʼokat Dhutslab, ¿jantʼom alwaˈtaláb neˈech kin bachʼuw an junkuntaláb?
XOWAˈ JUNTSIK IN KONIAL: «¿Jonti in elál an tumín an óltsixtsik kʼal a Jehová abal kin tʼajaˈ ejtal xowaˈ in tʼajáltsik?».
¿Janéy neˈech ka tokʼoy?
XOWAˈ I EXOBNÁMICH
Na Jehová in kʼakʼnál juntʼakʼi an chápnantsixtaláb xi tʼajál tam i pidhnál kʼal i kulbétal xowaˈ i koˈol, i kʼij ani cháplabil abal ku tólmixin ban junkuntaláb.
Ki chalpay xowaˈ i exobnámal
¿Janti i ejtowal ki éynaˈ i kʼij ani cháp abal ku tólmixin ban junkuntaláb?
¿Janti i ejtowal ki éynaˈ xowaˈ i koˈol abal ku tólmixin ban junkuntaláb?
¿Janéy a léˈ ka tʼajaˈ abal ki tólmixin ban junkuntaláb?
KA EXLAˈ JUN XATAˈ MÁS
Ka exóbnaˈ jantʼó ti an Okʼoxláb yabich in léˈ abal nin tʼojnáliltsik kin pidhnaˈ an diezmo.
«¿Janéy in okʼtsixnál an Biblia kʼal tin kwentaj an diezmo?» (Artículo de jw.org)
An Biblia in pidhál juntsik i tʼojláb an iniktsik xi pujadh. Por ¿janéy koʼol kin tʼajaʼ jun i mímláb max neʼech kin tʼajaʼ jun i tʼojláb xin tʼajál jun i inik?.
Ka exlaˈ juntsik i óltsix kʼal a Jehová xin tʼajál ejtal xowaˈ kin ejto abal an kidháblábtsik kin bachʼuw an publicaciones.
U bukʼwáb an publicaciones xi káldhats ban Biblia ti Congo (4:25)
Ka chuˈuw jonti tu kalel an tumín xin éynál an óltsixtsik kʼal a Jehová abal kin tʼajaˈ nin tʼojlábil