AJUMTALÁB 12
¿Janéy neˈech ti tolmiy abal ka ojontsi ka exóbnaˈ an Tʼokat Dhutslab?
Ki exóbnaˈ an Biblia jaˈich jun xataˈ xi lej alwaˈ. Por juntsikíl neˈech ki achʼaˈ tʼojláb ki tʼajaˈ. Hasta neˈech xónaˈ ka konoy tabáˈ max neˈech ka ejto ka óntsi ka exóbnaˈ. ¿Jantʼó ti lej alwaˈ ki tʼajaˈ an chápláb abal ki exóbnaˈ? Ani max ka koˈoy i dhukʼeltaláb, ¿janéy neˈech ti tolmiy abal ka ojontsi ta exóbal?
1. ¿Jantʼó ti lej alwáˈ ki exóbnaˈ an Tʼokat Dhutslab?
«Nin káwintal na Dios ejat ani in koˈol i awiltaláb» (Hebreos 4:12). An Biblia jaˈich jun i dhutslab xin koˈol tʼajat yan in jalbíl, kom tajaˈ in ulal xowaˈ an Okʼoxláb in chalpayal ani in achʼál kʼal tatáˈ. Ka exóbnaˈ an Biblia, yab tokot neˈech ti tolmiy ka exlaˈ yan xataˈ, más alwaˈ, neˈech ti tolmiy ka choˈóbnaˈ janéy ka tʼajaˈ ta xeˈchintal ani neˈech ti tolmiy ka koˈoy jun i alwaˈ xeˈchintaláb ban kʼij xi taˈtál. Ani xowaˈ más exbadh, jaˈich kej an Biblia neˈech ti tolmiy ka tʼajaˈ ta jaˈúb na Jehová. Ani tam a exóbnál an Biblia, exom a jilál abal jajáˈ ti tolmiy ka koˈoy jun i ejattaláb más alwaˈ.
2. ¿Jantʼó ti lej exbadh ki pidhaˈ tin jalbíl xowaˈ in okʼtsixnál an Biblia?
An Biblia in ulal abal an óltsixtaláb xin ólnál jaˈich jelti jun xataˈ xin koˈol tʼajat in jalbíl, jaxtám an Biblia in ulal: «Ka chʼaˈay an tsubaxtaláb ani yab jaykʼi ka nujuw» (Proverbios 23:23). Max i koˈol ti kwentaj abal xowaˈ in okʼtsixnál an Tʼokat Dhutslab in koˈol tʼajat yan in jalbíl, neˈech tám ki ojontsi ki exóbnaˈ aunque ki tamétnaˈ i dhukʼeltalábtsik (ka ajay Proverbios 2:4, 5).
3. ¿Janéy neˈech kin tʼajaˈ na Jehová abal ti tolmiy ka ojontsi ta exóbal?
Kom na Jehová jaˈich an Okʼoxláb xi lej chápniˈ tʼajat ani jaˈich na jaˈúb ani ti exlál tʼajat, jajáˈ in léˈ ti tolmiy abal ka exlaˈ. An Okʼoxláb in ejtowal ti tolmiy «ka chalpay xowaˈ alwaˈ ka tʼajaˈ» ani ti pidhál ti «chapiktaláb» abal ka tʼajaˈ (ka ajay Filipenses 2:13 ani 4:13). Jaxtám, max juntsikíl a achʼál a yejentsal i chápláb abal ka óntsi ta exóbal o ka tʼajaˈ ta xeˈchintal xowaˈ a exobnámal, jajáˈ neˈech ti tolmiy. Ani max a yejentsal i tolmixtaláb abal ka kuxuy an dhukʼeltaláb, jajáˈ neˈech ti pidhaˈ. Jaxtám echʼekʼij ka kontsi na Jehová ban oláb abal ti tolmiy ka ojontsi ta exóbal (1 Tesalonisenses 5:17).
ABAL KI EXÓBNAˈ MÁS
Ki chuˈuw janéy a ejtowal ka tʼajaˈ abal ka óntsi ta exóbal aunque xi kʼeˈettsik yab kin léˈnaˈ ki exóblách, aníl jeye ki chuˈuw janéy a ejtowal ka tʼajaˈ max yab lej i jolat. Ani tayíl neˈech ki exóbnaˈ janéy neˈech kin tʼajaˈ na Jehová abal ka óntsi ta exóbal.
4. Ki exóbnaˈ an Tʼokat Dhutslab, jaˈich xowaˈ xi más exbadh
Juntsikíl i achʼál abal i koˈol yan xanéy ki tʼajaˈ ani i achʼál tʼojláb abal ki elaˈ an kʼij abal ki exóbnaˈ an Biblia. ¿Janéy i ejtowal ki tʼajaˈ? Ka ajaytsik Filipenses 1:10 ani ki tʼilmáchtsik kʼal tin kwentaj jechéˈ:
Abal tatáˈ, ¿janéy jaˈich «xowaˈ na más alwaˈ» ka tʼajaˈ?
¿Janéy a ejtowal ka tʼajaˈ abal an exobintaláb kʼal an Biblia ka kʼwajay okʼox ba na xeˈchintal?
Max ka tsʼutsuy jun i balixtaláb kʼal i kidhib ani tayíl ka léˈnaˈ ka baliy i tʼujubtsik, an tʼujubtsik yab neˈech ka exey.
Por, max ka baliy okʼox an tʼujubtsik, an balixtaláb neˈech kin ákʼnaˈ casi ejtal an kidhib. Anchanáˈ jeye, max ka kʼwajbaˈ okʼox ba na xeˈchintal xowaˈ xi más exbadh, neˈech ka ejto ka tʼajaˈ, ani aníl jeye neˈech ki jolkʼan abal ka tʼajaˈ kʼeˈet xanéy.
An exobintaláb kʼal an Biblia tu tolmiyal ki exlaˈ más an Okʼoxláb, aníl jeye tu tolmiyal ki choˈóbnaˈ janti i ejtowal ki kʼakʼnaˈ. Ka ajaytsik Mateo 5:3 ani ki tʼilmáchtsik kʼal tin kwentaj jechéˈ:
¿Jantʼom alwaˈtaláb i bachʼwal max echʼekʼij i tʼajál ti kwentaj an exobintaláb kʼal an Biblia?
5. Ka ojontsi ta exóbal aunque xi kʼeˈettsik yab kin kulbétnaˈ
Juntsikíl an atiklábtsik neˈech xónaˈ ti utsaˈ abal ka jilaˈ ka exóbnaˈ an Tʼokat Dhutslab. Ka chuˈuw xowaˈ in watʼnaˈ na Francesco. Ka chuˈutsik an VIDEO ani ki tʼilmáchtsik kʼal tin kwentaj jechéˈ:
¿Janéy in tʼajaˈ nin yanél na Francesco tam tin utsaˈ xowaˈ kʼwajat in exóbnál?
¿Jantʼom alwaˈtalábtsik in bachʼuw kom yab in jilaˈ ti exóbal?
Ka ajaytsik 2 Timoteo 2:24, 25 ani ki tʼilmáchtsik kʼal tin kwentaj jechéˈ:
¿Janéy in chalpayal na yanél ani na jaˈúbtsik kʼal xowaˈ kʼwajat a exóbnál?
¿Janéy koˈol ka tʼajaˈ tam jun xitaˈ yab in kulbetnál ka exóbnaˈ an Biblia? ¿Jantʼókʼi?
6. Ka belaˈ abal na Jehová neˈech ti tolmiy
Tam más i exlál ani u utel kʼal an Okʼoxláb, más neˈech ki léˈnaˈ ki tʼajaˈ xowaˈ jajá in kulbetnál. Por juntsikíl neˈech ki achʼaˈ tʼojláb ki tʼajaˈ i jalkʼuxtalábtsik ti xeˈchintal abal ku kʼwajay xanti na Jehová in kulbetnál. Max ka achʼaˈ anchanáˈ, yab ki tʼeˈpin, na Jehová neˈech ti tolmiy. Ka chuˈutsik an VIDEO ani ki tʼilmáchtsik kʼal tin kwentaj jechéˈ:
¿Janéy in tʼajaˈ na Jim abal kin kulbédhaˈ na Jehová?
¿Janéy a kulbétnaˈ más kʼal xowaˈ in tʼajaˈ na Jim?
Ka ajaytsik Hebreos 11:6 ani ki tʼilmáchtsik kʼal tin kwentaj jechéˈ:
¿Janéy neˈech kin tʼajaˈ na Jehová kʼal xitaˈ tu «alyáb», xitaˈ in chápnantsaltsik abal kin exlaˈ ani kin tʼajaˈ xowaˈ in kulbetnál?
¿Janéy a chalpayal in achʼál na Jehová, tam in chuˈtal a tʼajál an chápláb abal ka exóbnaˈ an Biblia?
XOWAˈ JUNTSIK IN KONIAL: «Ani tatáˈ, ¿jantʼó ti kʼwajat a exóbnál an Biblia?».
¿Janti neˈech ki tokʼon?
XOWAˈ I EXOBNÁMICH
Juntsikíl neˈech xónaˈ ka achʼaˈ tʼojláb ka exóbnaˈ an Biblia, por max ka óntsi ka exóbnaˈ, jechéˈ neˈech ti tolmiy ki kʼwajay abal echʼekʼij. Max ka óntsi ka belaˈ na Jehová, jajáˈ neˈech ti pidhaˈ i alwaˈtalábtsik.
Ki chalpay xowaˈ i exobnámal
¿Jantʼó ta kʼakʼnál xowaˈ a exóbnál ban Biblia?
¿Janéy koˈol ka tʼajaˈ tam a choˈóbich janéy jaˈich xi más exbadh?
¿Jantʼó ti alwaˈ ka kontsi na Jehová ti tolmiy abal ka óntsi ta exóbal?
KA EXLAˈ JUN XATAˈ MÁS
Ka chuˈuw chéˈ xanéy xin tolmiyámal yan i atiklábtsik abal kin éynaˈ alwaˈ an kʼij.
«Janti a ejtowal ka éynaˈ alwaˈ an kʼij» (¡Despertad!, febrero de 2014)
Ka chuˈuw janti na Jehová in tolmiy jun i mímláb, xin koˈolak jun in tomkíl xi yab in exbayálak xowaˈ in tʼajál abal kin tʼojontsi na Jehová.
Na Jehová tu pidhál ti chápláb abal ki kuxuy an dhukʼeltalábtsik (5:05)
Ka chuˈuw janti jun i mímláb in tolmiy nin tomkíl kom in koˈoy jun in belomtal chapik.
U ulwáb kej an óltsixtsik kʼal a Jehová in kʼeˈáxliyal an yanelábtsik. ¿Por tsubax anchanáˈ?
«¿An óltsixtsik kˈal a Jehová in junkuwal o in kʼeˈáxliyal an yanelábtsik?» (Artículo de jw.org)