AJUMTALÁB 05
An Biblia tu óltsal i káw xi an Okʼoxláb in léˈ ki choˈóbnaˈ
Na Jehová tu pidhámal jun i alabél chʼejwalixtaláb: jechéˈ i chʼejwalixtaláb jaˈich an 66 dhutslabtsik xin koˈol an Biblia. Por awich xónaˈ ka konoy tabáˈ: «¿Jonti kale an Biblia? ¿Jita jáˈ in chalápil xi kʼwajat dhutsadh?». Abal ki tok’oy jechéˈ i konowixtalábtsik, neˈech ki chuˈuw janti ulnek nin Káwintal an Okʼoxláb hasta xoˈ ta kʼitsáj.
1. Max an Biblia dhutsan kʼal i iniktsik, ¿jantʼó ti ulal kej jaˈich in chalápil an Okʼoxláb?
An T’okat Dhutslab dhutsan kʼal 40 i iniktsik xi in koˈolak jalulúl in tʼojlábiltsik ani juntsik tumínladh ani juntsik chʼojontál. Ani tujey ti dhutsnal ban tamub 1513 okʼox ti ka ulich na Jesús ani okʼyat ti dhutsnal ban tamub 98 tayíl ti ka tsích na Jesús. Jechéˈ i dhutslab in júnaˈ 1,600 i tamub abal ka kidhbayat. Por bélk’i anchanáˈ, xowaˈ kʼwajat dhutsadh juniniˈ in chalap. ¿Jantʼókʼi ti juniniˈ? Kom xowaˈ k’wajat dhutsadh an Ok’oxláb in tʼajaˈ ka dhutsan (ka ajay 1 Tesalonisenses 2:13). An iniktsik xi in dhutsaˈ an Biblia yab in dhutsaˈ i chalaptsik xi jajáˈtsik in kʼál. Más alwaˈ, in ólnaˈtsik «i tsubaxtaláb xi tál ban Ok’oxláb ijtsidh kʼal an t’okat chápláb» (2 Pedro 1:21, TNM).a Kʼal an t’okat chápláb, an Okʼoxláb in tʼajaˈ abal an atiklábtsik kin dhutsaˈ xowaˈ jajáˈ in chalpayal (2 Timoteo 3:16).
2. ¿Jitaˈtsik in ejtowal kin ajay an Biblia?
Ejtal an atiklábtsik ba «ejtal an kidhtalábtsik, an bitsowtsik xi k’eˈetich k’eˈetich i káwintalábtsik» in ejtowal kin exlaˈ an alwaˈ t’ilab xi in ólnál an Biblia (ka ajay Apokalipsis 14:6). An Okʼoxláb in tʼajámal abal an Biblia ka k’wajay wilkadh ba yan i káwintalábtsik. Ani lej tsubax abal an Biblia jaˈich an dhutslab xi más wilkadh tin pubél an Chabál. Casi ejtal an atiklábtsik in ejtowal kin ajay xowaˈ in ólnál an T’okat Dhutslab ani yab in kwentaj jonti tu k’wajíl o jant’om káwintaláb in káwnál.
3. ¿Janti in beletnaˈ na Jehová an Tʼokat Dhutslab?
Abal ka dhutsan an Tʼokat Dhutslab éyná in otʼól i koˈnéltsik ani in teˈlíl jun i chʼojól xi in bij ti papiro. Por jechéˈ jikʼatak u k’achel. Por juntsik i atiklábtsik xi in k’anidhál an Biblia in chʼilbaytsik ani in dhutsaˈ yáníl an Biblia ani in tʼajaˈtsik kʼal yan i kwentaj. Aunque waˈchin i atiklábtsik xi in léˈnaˈ kin talabédhaˈ an Biblia, por waˈchin jeye k’eˈet i atiklábtsik xi kʼwajay tʼojojodh abal kin pidhnaˈ in ejattal abal kin beletnaˈ an Biblia. Na Jehová yab in jilámal abal ka tamkʼuyat kʼal ni jun xitaˈ abal an atiklábtsik yab kin ajay an Biblia. An Tʼokat Dhutslab in ulal: «Nin káwintal an Okʼoxláb in kuxyal abal ech’ekʼij» (Isaías 40:8).
ABAL KI EXÓBNAˈ MÁS
Techéˈ neˈech ki exóbnaˈ juntsik xanéy xi na Jehová in tʼajámal abal an atiklábtsik kin dhutsaˈ an Tʼokat Dhutslab, ani jeye neˈech ki exóbnaˈ xowaˈ na Jehová in tʼajámal abal kin beletnaˈ an Biblia abal an atiklábtsik kin ejto kin koˈoy.
4. An Biblia tu óltsal jitaˈ jáˈ in chalap xi kʼwajat dhutsadh
Ka chuˈutsik an VIDEO. Tayíl ka ajaytsik 2 Timoteo 3:16 ani ki t’ilmáchtsik kʼal tin kwentaj jechéˈ:
Max an Biblia dhutsan kʼal i iniktsik, ¿jant’ó tám tu ulwáb abal jaˈich in Káwintal an Okʼoxláb?
¿Lej tsubax i ejtowal ki belaˈ abal an Okʼoxláb in óltsi tin chalápil an iniktsik abal kin dhutsaˈ?
An t’ójontsix in dhutsál an dhutsadh úw, por an chalap in kʼál an ok’lek xi exom in utsál xowaˈ koˈol kin dhutsaˈ. Tám, anchanˈ jeye u wat’el kʼal an Tʼokat Dhutslab, in dhutsaˈ i atiklábtsik, por xowaˈ kʼwajat dhutsadh jaˈich in káwintal an Okʼoxláb.
5. An Biblia in kuxuy yan xanéy
Max an Biblia tál kʼal an Ok’oxláb, lej tsubax tám, abal neˈech kin beletnaˈ. Tin nakél an k’ij waˈchinék yan i tak’ixtsik xi in léˈnámal kin ok’ondhaˈ an Biblia. Aníl jeye waˈchínenek i ok’lek belomtsik xin yabtsik in léˈnámal abal an atiklábtsik kin ajay an Biblia. Por aunque waˈchin i atiklábtsik xi at’ax, aníl jeye waˈchin yan i atiklábtsik xi alwaˈ, xi yabtsik in tʼajaˈ ti kwentaj max ka chemdhájak, jajáˈtsik in beletnaˈ an Biblia abal yab ka ok’ondhá. Abal ka exlaˈ jechéˈ i iniktsik, ka chuˈutsik an VIDEO ani ki t’ilmáchtsik kʼal tin kwentaj jechéˈ:
Kom a exlálich xoˈ an chápláb xi t’ajan abal ka beletná an Biblia, ¿a léˈ más ka ajay? ¿Jantʼókʼi?
Ka ajaytsik Salmo 119:97 ani ki t’ilmáchtsik k’al tin kwentaj jechéˈ:
¿Jant’ó ti yan i atiklábtsik in pidhnámal nin ejattal abal ka wilká ani ka bukʼwat an Biblia?
6. Jun i dhutslab abal ejtal an atiklábtsik
An Biblia jaˈich an dhutslab xi más wilkadh ba yan i káwintalábtsik ani xi más bukʼudh tin pubíl an Chabál. Ka ajaytsik Hechos 10:34, 35 ani ki tʼilmáchtsik k’al tin kwentaj jechéˈ:
¿Jant’ó tin léˈ an Okʼoxláb, abal an Biblia ka wilká ba yan i káwintalábtsik ani ka bukʼwat ba yan i bitsowtsik?
¿Janéy jaˈich xi más a kulbetnál kʼal tin kwentaj an Tʼokat Dhutslab?
Lej
yan
i atiklábtsik tin pubíl an Chabál
in ejtowal kin ajay an Biblia ba jun i káwintaláb xi in exbayal
Kʼwajat ti más ti
3.000
i kawintalábtsik,
juntsik kidhat ani kʼeˈettsik ti pejeˈ
5.000 i millones
Jaˈich in yantal an Biblia xi u chalpantsáb abal bukʼudh tin pubíl an Chabál.
Yab waˈach k’eˈet i dhutslab xi bukʼudh t’ajat tin pubíl an Chabál
XOWAˈ JUNTSIK IN ULAL: «An Biblia jaˈich jun i wejeˈ dhutslab xi in dhutsám i iniktsik».
¿Janéy a chalpayal tatáˈ?
¿Jant’ó ta belál abal an Biblia jaˈich in Káwintal an Okʼoxláb?
XOWAˈ I EXOBNÁMICH
An Biblia jaˈich nin Káwintal an Okʼoxláb, ani jajáˈ in tʼajámal abal ejtal kin ejto kin koˈoy.
Ki chalpay xowaˈ i exobnámal
¿Janéy in léˈ kin uluw kej an Okʼoxláb in pidhaˈ ti chalap an atiklábtsik abal kin dhutsaˈ an Biblia?
Kʼal xowaˈ i exobnaˈ, ¿janéy jaˈich xi a kulbetnaˈ más kʼal tin kwentaj an Biblia? ¿Ani janéy a chalpayal kom wilkadh ba yan i káwintaláb ani bukʼudh tin pubíl an Chabál?
¿Janéy a ach’ál abal an Okʼoxláb in tʼajám yan i chápláb abal ka exlantsi tin káwintal?
KA EXLAˈ JUN XATAˈ MÁS
Ka chuˈuw xowaˈ in wat’námal an Biblia: desde tam ti dhutsan ti wejeˈ hasta ban dhutslabtsik xi xoˈ i exlál.
«Janti ulnek an Biblia hasta xoˈ ta kʼitsáj» (¡Despertad!, noviembre de 2007)
Ka chuˈuw janti an Biblia in kuxyámal aunque in tametnámal óx xanéy.
«An Tʼokat Dhutslab in lej kuxyámal» (La Atalaya, núm. 4 2016)
Ka chuˈuw juntsik i k’ak’adhtalábtsik xi an atiklábtsik in tamétnaˈ abal kin wilkaˈ an Biblia.
Xoˈ ta kʼitsáj waˈach yan i Biblia ani t’ajadh ba yan i kawintalábtsik. ¿Jant’ó ta ejtowal ka belaˈ abal in Káwintal an Okʼoxláb yab jalkʼunenek?
«¿Jalkʼudh an káw xi kʼwajat ban Biblia?» (Artículo de jw.org)
a An t’okat chápláb jaˈich in cháp an Okʼoxláb xin éynál abal kin tʼajaˈ xataˈ, anchanáˈ janti tu wilkáb ban ajumtaláb 07.