AJUMTALÁB 04
¿Jitaˈ jaˈich an Ok’oxláb?
Desde tin tujtal an k’aylál, an atiklábtsik in k’ak’námal yan i dioses. Por an Biblia in t’ilál abal waˈach jun i Ok’oxláb xi «jaˈich mas pubidh kej xi k’eˈet an dioses» (2 Crónicas 2:5). ¿Jitaˈ jaˈich jajáˈ? ¿Ani jant’ó ti an Ok’oxláb xi tsubax yab in junwal jelti an dioses xi in k’ak’nál an atiklábtsik? Ka exóbnaˈ ba jechéˈ i ajumtaláb xowaˈ an Ok’oxláb in léˈ abal tatáˈ ka choˈóbnaˈ.
1. ¿Janti in bij an Ok’oxláb ani janti ti choˈób abal in léˈ ki exlantsi tin bij?
Ban Biblia, an Ok’oxláb in ólnál tinbáˈ: «Nanáˈ in Jehová ani jaˈich nu bij» (ka ajay Isaías 42:5, 8). An káw Jehová jaˈich jun i bijláb hebreo, ani yan i chalpadh iniktsik in ulal abal in bij in léˈ kin uluw «jajáˈ in t’ajál ka t’ajan xowaˈ in léˈ». Na Jehová in léˈ ki exlantsi tin bij (Éxodo 3:15). ¿Jant’ó ti choˈób? Kom jajáˈ in t’ajámal ka k’wajay nin bij ban Biblia más ti 7000 in yáníl.a Jehová jaˈich in bij an «junkax Dios xi tsubax» (Juan 17:3).
2. ¿Janéy tu óltsal an Biblia k’al tin kwentaj na Jehová?
An Biblia in ulal, abal ejtal an dioses xin k’ak’nál an atiklábtsik yab tsubax, kom xi tsubax jaˈich tokot na Jehová, ¿jant’ó? Jaˈich abal waˈach yan xant’ó. Na Jehová in koˈol ejtal an chápláb, kom jaˈich «xi lej Pubidh tin pubél an chabál» (ka ajay Salmo 83:18). Jajáˈ jaˈich xi ejtal in ejtowal kin t’ajaˈ, tám jajáˈ in ejtowal kin t’ajaˈ xowaˈ kin léˈnaˈ. Jeye jaˈich an t’ojom, xin «t’ajámal ejtal xowaˈ waˈach», an k’aylál ani ejtal an ejattaláb xi waˈach ban Chabál (Apokalipsis 4:8, 11). Ani jeye, na Jehová ech’ek’ij k’wajinek ani ech’ek’ij neˈech ka k’wajay (Salmo 90:2).
ABAL KI EXÓBNAˈ MÁS
Ki chuˈuw jant’ó ti yab in junwal an título Dios k’al nin lej bij an Ok’oxláb, xi tokot jajáˈ in tomnál kin bijnaˈ. Jeye neˈech ki exóbnaˈ janti tu ok’tsal nin bij ani jant’ó tin léˈ ki choˈóbnantsi.
3. An Ok’oxláb u bijyáb yan xanti, por tokot in koˈol jun in lej bij
Abal ki chuˈuw jant’ó ti yab in junwal an títulos k’al in lej bij jun i atikláb, ka chuˈutsik an VIDEO ani ki t’ilmáchtsik k’al tin kwentaj jechéˈ:
¿Jant’ó ti yab jayéchk’i jun i aniˈ bijláb k’al jun i lej bijláb, jelti tam ki uluw inik?
An Biblia in ulal abal an atiklábtsik in k’ak’nál yan i dioses ani yan i ajatiklábtsik. Ka ajaytsik Salmo 136:1-3 ani ki t’ilmáchtsik k’al tin kwentaj jechéˈ:
¿Jitaˈ jaˈich an «Ok’oxláb xi tsubax» ani an «Ajátikláb xi tsubax»?
4. Na Jehová in léˈ abal tatáˈ ka exlantsi tin bij ani ka éyendhantsi
¿Janti ti choˈób kej na Jehová in léˈ ka exlantsi tin bij? Ka chuˈutsik an VIDEO ani ki t’ilmáchtsik k’al tin kwentaj jechéˈ:
¿Jant’ó ta belál tatáˈ abal na Jehová in léˈ ka exlantsat tin bij?
Na Jehová in léˈ kej an atiklábtsik kin éynantsi tin bij. Ka ajaytsik Romanos 10:13 ani ki t’ilmáchtsik k’al tin kwentaj jechéˈ:
¿Jant’ó ti lej yejat ki éyendhantsi tin bij an Ok’oxláb, Jehová?
¿Janéy a ach’ál tatáˈ tam i bijyáb k’al na bij?
¿Janéy a chalpayal tatáˈ kej in ach’ál na Jehová tam a éynantsal tin bij?
5. An Ok’oxláb Jehová in léˈ abal ka t’ajaˈ ta jaˈúb
Jun i mímláb xi ti Camboya xin bij ta Soten in uluw abal kin exóbnantsi tin bij an Ok’oxláb Jehová, jaˈich jun i púlek alwaˈtaláb xin ejtowal kin wat’naˈ jun xitaˈ. Ka chuˈutsik an VIDEO ani ki t’ilmáchtsik k’al tin kwentaj jechéˈ:
K’al xowaˈ i chuˈuw ban video, ¿janti tolmiyat tin xeˈchintal na Soten kom in exlantsi tin bij an Ok’oxláb Jehová?
Abal ki t’ajaˈ ti jaˈúb jun xitaˈ ok’ox koˈol ki exlantsi janti in bij. Ka ajaytsik Santiago 4:8a ani ki t’ilmáchtsik k’al tin kwentaj jechéˈ:
¿Janéy in kulbetnál an Ok’oxláb Jehová abal tatáˈ ka t’ajaˈ?
¿A chalpayal kej max ka exlantsi ani ka éynantsi tin bij an Ok’oxláb Jehová neˈech ti tolmiy ki utey k’al jajáˈ? ¿Jant’ók’i ta belál anchanˈ?
XOWAˈ JUNTSIK IN ULAL: «Kom tokot waˈach jun i Ok’oxláb, i ejtowal ki bijiy xantik’i».
¿A belál tatáˈ kej an Ok’oxláb in bij Jehová?
¿Janti neˈech ka utsaˈ an atiklábtsik kej an Ok’oxláb Jehová in léˈ ki éynantsi tin bij?
XOWAˈ I EXOBNÁMICH
An junkax Ok’oxláb xi tsubax in bij Jehová. Jajáˈ in léˈ ki exlaˈ jachanˈ i bijláb ani ki éynantsi abal ki ejto ki t’ajaˈ ti jaˈúb.
Ki chalpay xowaˈ i exobnámal
¿Jant’ó ti júnich na Jehová k’al ejtal an dioses xi in k’ak’nál an atiklábtsik?
¿Jant’ó ti alwaˈ ki éyendhaˈ in bij an Ok’oxláb?
¿In léˈ an Ok’oxláb Jehová kej tatáˈ ka t’ajaˈ ta jaˈúb? ¿Janti ta choˈób?
KA EXLAˈ JUN XATAˈ MÁS
Ki chuˈuw bóˈ i t’ilab xonti in tejwaˈmedhál kej an Ok’oxláb ta k’wajat.
«¿Lej tsubax abal waˈach jun i Ok’oxláb?» (Artículo de jw.org)
Ki chuˈuw jant’ó ti alwaˈ ki chalpay abal an Ok’oxláb ech’ek’ij k’wajinek.
«¿Jitaˈ in t’ajaˈ an Ok’oxláb?» (La Atalaya, 1 de agosto de 2014)
Ki chuˈuw jant’ó ti alwaˈ ki éyendhaˈ in bij an Ok’oxláb aunque yab i exlál janti tu ulwábak ti wejeˈ.
¿Lej uluts janti ki bijiy an Ok’oxláb? Ki chuˈuw jant’ó ti ulal kej an Ok’oxláb tokot in koˈol jun in lej bij.
a Ban apéndice A4 Ban T’okat Dhutslab La Biblia. Traducción del Nuevo Mundo neˈech ka elaˈ más i óltsixtaláb k’al xowaˈ in léˈ kin uluw nin bij an Ok’oxláb ani jant’ó ti wixk’adh ba juntsik i Biblia an bijláb Jehová.