AJUMTALÁB 07
¿Janti jaˈich an Ok’oxláb Jehová?
Tam a chalpayal a Jehová, ¿janti a chalpayal abal jaˈich jajáˈ? ¿A chalpayal abal jaˈich lej púlek, por k’wajat lej ów k’al tatáˈ, jelti an óttsik xi k’wajat t’ek’at ban k’aylál? ¿O a chalpayal abal jaˈich jun xataˈ xi in koˈol t’ajat i chápláb, por yab in ach’ál xataˈ, jelti an junkil tam u nikwnal? ¿Janti jaˈich lej tsubax na Jehová? Ba nin Káwintal, an T’okat Dhutslab, tu óltsal janti jaˈich jajáˈ, ani jeye tu óltsal abal tu k’anidhál.
1. ¿Jant’ó ti yab i ejtowal ki chuˈuw an Ok’oxláb Jehová?
«An Ok’oxláb jaˈich jun i espíritu» (Juan 4:24). Na Jehová yab in junwal janti wawáˈ, jajáˈ yab in koˈol in beklák nibal in tuˈúl. Jaxtám yab i ejtowal ki chuˈuw. Jajáˈ jaˈich jun i espíritu xu k’wajíl tuwaˈ walk’iˈ, ani xonti tu k’wajíl yab jeye i ejtowal ki chuˈuw.
2. ¿Jant’om alwaˈtalábtsik in tejwaˈmedhál na Jehová?
Aunque yab i ejtowal ki chuˈuw na Jehová, tam ki exlaˈ i ejtowal ki k’anidhaˈ, kom jajáˈ jaˈich jun xitaˈ xi tsubax ejat, xin tejwaˈmedhál yan i alwaˈtalábtsik. An T’okat Dhutslab in ulal: «Na Jehová in k’anidhál an lujattaláb, ani jajáˈ, yab neˈech kin jilaˈ, xitaˈ k’ál tu k’anidháb» (Salmo 37:28). Ani jeye an Ok’oxláb «u kóˈontsix t’ajat i yajnantsixtaláb ani u k’anidhax», ani in tejwaˈmédhantsal t’ajat ti k’anidhomtaláb xitaˈ k’wajattsik in wat’nál i yajtsiktaláb (Santiago 5:11). «Na Jehová k’wajat utat k’al xitaˈ in koˈoltsik jun i púlek t’eˈpintaláb tin itsích; ani in tolmiyal xitaˈtsik in ach’ál abal yab in koˈol in jalbíl» (Salmo 34:18). ¿A choˈóbak tatáˈ abal wawáˈ i ejtowal ki kulbédhaˈ o ki t’eˈpindhaˈ na Jehová k’al xowaˈ i t’ajál? An atikláb xi in t’ajál xowaˈ yab alwaˈ in t’eˈpindhál t’ajat an Ok’oxláb (Salmo 78:40, 41). Por an atikláb xi in t’ajál xowaˈ alwaˈ in kulbédhál junt’ak’i an Ok’oxláb (ka ajay Proverbios 27:11).
3. ¿Janti in tejwaˈmedhál na Jehová abal tu k’anidhál?
An alwaˈtaláb xi más in xalk’ál na Jehová, jaˈich an k’anidhomtaláb. An Biblia in ulal: «An Ok’oxláb jaˈich i k’anidhomtaláb» (1 Juan 4:8, TNM). Na Jehová tu xalk’antsal ti k’anidhomtaláb k’al an T’okat Dhutslab, ani k’al ejtal xowaˈ in t’ajámal (ka ajay Hechos 14:17). Ka chalpay ta kwetémtal, janti tu t’ajámal an Ok’oxláb. Jajáˈ tu jiltsámal ti wal abal ki chuˈuw yan i colores, ani jeye abal ku k’ijidhmé k’al an són, ani ki kulbétnaˈ an k’apnél. Na Jehová in léˈ abal ku k’wajay kulbél ti ejattal.
ABAL KI EXÓBNAˈ MÁS
Techéˈ neˈech ki exóbnaˈ xowaˈ in éynál na Jehová abal kin t’ajaˈ yan xataˈ. Ani tayíl neˈech ki exóbnaˈ janti jaˈich na Jehová.
4. An t’okat chápláb jaˈich xowaˈ in éynál na Jehová abal kin t’ajaˈ yan xataˈ
Wawáˈ i éynál ni k’ubak abal ki t’ajaˈ an t’ojláb, na Jehová in éynál nin t’okat cháp abal ka t’ojon. An Biblia yab in ólnál abal an t’okat chápláb jaˈich jun i atikláb, más alwaˈ, in ulal abal jaˈich an chápláb xi in éynál abal kin t’ajaˈ ejtal xowaˈ in léˈ. Ka ajaytsik Lukas 11:13 ani Hechos 2:17, ani ki t’ilmáchtsik k’al tin kwentaj jechéˈ:
An Ok’oxláb neˈech kin pidhaˈ ti t’okat chápláb xitaˈ k’ál ti ka kontsin. Tám, ¿a chalpayal tatáˈ abal an t’okat chápláb jaˈich jun i atikláb, o a belál abal jaˈich in cháp an Ok’oxláb xi in éynál abal kin t’ajaˈ yan xataˈ? ¿Jant’ó ta chalpayal anchanáˈ?
Na Jehová in éynál nin t’okat cháp abal kin t’ajaˈ yan xanéy xi tu labandhál. Ka ajaytsik Salmo 33:6 ani 2 Pedro 1:20, 21, ani ki t’ilmáchtsik k’al tin kwentaj jechéˈ:
¿Abal janéy tin éynámal nin t’okat cháp na Jehová?
5. Na Jehová in koˈol i alwaˈtalábtsik xi in t’ajál ku utey k’al jajáˈ
Na Moisés in t’ójontsalak lej alwaˈ an Ok’oxláb. Por bélk’i in utsaˈ abal in léˈak kin exlaˈ más alwaˈ, janti jaˈich jajáˈ. Jaxtám na Moisés in utsaˈ: «Tin óltsi ta bélil abal ku ejto tu exlaˈ» (Éxodo 33:13). Tám, na Jehová in tok’oy ani in óltsi janti jaˈich jajáˈ. Ka ajaytsik Éxodo 34:4-6 ani ki t’ilmáchtsik k’al tin kwentaj jechéˈ:
¿Janti in uluw na Jehová abal jaˈich jajáˈ?
¿Tatáˈ janéy a kulbetnál más tin kwentaj na Jehová?
6. Na Jehová in t’ajál ti kwentaj an atiklábtsik
An hebreos, jaˈichak nin bitsówil an Ok’oxláb ti wejeˈ, jajáˈtsik u t’ójondhábak lej chapik ti Egipto. ¿Janéy in ach’álak na Jehová, tam tin chuˈuw nin bitsówil abal k’wajatak in yajtsiknál? Ka och’ówitsik an AUDIO ani ka t’ajaˈtsik ti kwentaj an ajumtaláb, o tokot ka ajaytsik Éxodo 3:1-10. Tayíl ki t’ilmáchtsik k’al tin kwentaj jechéˈ:
K’al an ajumtaláb xi a ajay, ¿janéy in ach’ál na Jehová, tam in chuˈtal kej an atiklábtsik in wat’nál i yajtsiktaláb? (Ka chuˈutsik an ts’itsik pejats 7 ani 8).
¿A belál abal na Jehová lej tsubax in léˈ kin tolmiy an atiklábtsik? ¿A chalpayal abal in ejtowal kin tolmiy? ¿Jant’ó ta chalpayal anchanˈ?
7. Xowaˈ na Jehová in t’ajámal in xalk’ál janti jaˈich jajáˈ
Na Jehová tu óltsal janti jaˈich jajáˈ k’al xowaˈ in t’ajámal. Ka chuˈutsik an VIDEO. Tayíl ka ajaytsik Romanos 1:20 ani ki t’ilmáchtsik k’al tin kwentaj jechéˈ:
¿Janéy ti óltsal k’al tin kwentaj na Jehová k’al ejtal xowaˈ in t’ajámal?
XOWAˈ JUNTSIK IN ULAL: «An Ok’oxláb xontakich ti k’wajat, jaxtám yab i ejtowal ki exlaˈ alwaˈ».
¿Janéy a chalpayal tatáˈ?
¿Jant’ó ta chalpayal anchanˈ?
XOWAˈ I EXOBNÁMICH
Na Jehová jaˈich jun i espíritu, jaxtám yab i ejtowal ki chuˈuw. Jajáˈ in xalk’ál yan i alwaˈtalábtsik, por xowaˈ xi más in xalk’ál jaˈich an k’anidhomtaláb.
Ki chalpay xowaˈ i exobnámal
¿Jant’ó ti yab i ejto ki chuˈuw na Jehová?
¿Janéy jaˈich an t’okat chápláb?
¿Janti jaˈich na Jehová?
KA EXLAˈ JUN XATAˈ MÁS
Ka exlaˈ más alwaˈ na Jehová, tam ka exóbnaˈ xi chéˈ an alwaˈtalábtsik xi jajáˈ in tejwaˈmedhál.
Ka exóbnaˈ jant’ó ti belál abal na Jehová yab k’wajat putálk’i ban Chabál.
Ka chuˈuw jant’ó tin ulal an Biblia abal an t’okat chápláb, jaˈich jelti in «k’ubak» an Ok’oxláb.
Jun i inik xi yab u chuˈux, in ach’álak t’ojláb kin belaˈ abal u k’anidháb k’al an Ok’oxláb. Ka chuˈuw k’al janéy ti tolmiyat abal kin jalk’uy nin chalap.
«Xoˈ u ach’ál abal u ejtowal ku tolmiy xi k’eˈettsik» (La Atalaya, 1 de octubre de 2015)