AJUMTALÁB 44
¿In kulbetnál an Okʼoxláb ejtal an ajibtsik?
Na Jehová in kulbetnál ku kʼwajay kulbél ti xeˈchintal ani in kulbetnál abal juntsikíl ki tʼajaˈ i ajibtsik. ¿Por in kulbetnál ejtal an ajibtsik xi u tʼajnal? ¿Janti i ejtowal ki xalkʼaˈ abal i kʼanidhál ani i tʼajál ti kwentaj xowaˈ jajáˈ in achʼál?
1. ¿Jantʼó ti na Jehová yab in kulbetnál ejtal an ajibtsik?
Neˈech xónaˈ ti labandhaˈ ka choˈóbnaˈ abal yan i ajibtsik xi u tʼajnal yab kʼwajat káldhats ban Biblia. Waˈach jeye i ajibtsik xi kalnek ban belomtalábtsik xi yab tsubax, ani jeye xi koˈol kin chuˈuw kʼal an dhimantaláb ani waˈach jeye i ajibtsik xu tʼajnal abal ka kʼakʼná an chemélomtsik. Ani kʼeˈettsik in tʼajál i ajibtsik kom in belál abal max kin tʼajaˈ yab neˈech kin watʼnaˈ i yajtsiktaláb (Isaías 65:11). Jaxtám na Jehová in utsaˈ jeché i káw nin tʼojnáliltsik: «Yabich ka kóˈoytsik i junaxtaláb kʼal jajáˈtsik [...] yabich ka takaˈtsik xowaˈ atʼax» (2 Korintios 6:17).a
2. ¿Janéy in chalpayal na Jehová kʼal tin kwentaj an ajibtsik xi u tʼajnal abal ki kʼakʼnaˈ i atiklábtsik?
Na Jehová tu óltsal abal jaˈich lej kʼakʼadh «ki aliy i tolmixtaláb kʼal an atiklábtsik» (ka ajay Jeremías 17:5). Juntsik i ajib u tʼajnal abal ka kʼakʼná i takʼixtsik ani i atiklábtsik xin tolmiyámal in bitsówil. Waˈach jeye i ajibtsik xu tʼajnal abal ka kʼakʼná an bandera o abal ka kʼakʼná jun i bitsow kom in bajúmal kin tʼajaˈ yan xataˈ (1 Juan 5:21). Kʼeˈettsik i ajibtsik u tʼajnal abal ka tolmiyat jun i takʼix ani abal kin tolmintsi nin chalápil xin tsiˈdhál. Max wawáˈ ki kʼakʼnaˈ tʼajat jun i atikláb o jun i takʼix ani ki tolmintsi an chalaptsik xin tsiˈdhál, ani max jechéˈ i chalaptsik yab jaˈich xowaˈ in kulbetnál na Jehová, ¿janti a chalpayal abal neˈech kin achʼaˈ jajáˈ?
3. ¿Janéy jaˈich xowaˈ yab in tomnál ka tʼajan ba jun i ajib?
An Tokat Dhutslab in ulal abal yab alwaˈ ki tʼajaˈ i ajibtsik xonti u watʼpiyáb kʼal an uxnéltsik, ani jeye xonti u tʼajnal xowaˈ yab alwaˈ (1 Pedro 4:3). Ba juntsik i ajib an atiklábtsik in tʼajál xowaˈ yab in tomnál, ani kʼal an uchʼaltaláb hasta u olmanal ani in tʼajál yan in tidhél. Max wawáˈ i léˈ ki ojontsi ki tʼajaˈ ti jaˈúb na Jehová yab koˈol ki tʼajaˈ jechéˈ.
ABAL KI EXÓBNAˈ MÁS
Ki chuˈuw janéy a ejtowal ka tʼajaˈ abal ka takuy xowaˈ alwaˈ kʼal tin kwentaj an ajibtsik ani anchanáˈ ka kulbédhaˈ na Jehová.
4. Yab ka tʼajaˈ i ajibtsik xi na Jehová yab in kulbetnál
Ka ajaytsik Efesios 5:10 ani ki tʼilmáchtsik kʼal tin kwentaj jechéˈ:
¿Janéy koˈol ki tʼajaˈ ti kwentaj abal ki choˈóbnaˈ max neˈech ki tʼajaˈ jun i ajib o yabaˈ?
¿Jantʼom ajibtsik u tʼajnal xonti tatáˈ i kʼwajíl?
¿A chalpayal abal na Jehová in kulbetnál?
¿A koniámal ta báˈ max an Okʼoxláb in kulbetnál ki tʼajaˈ an cumpleaños? Ban Biblia yab kʼwajat dhutsadh max jun in tʼojnálil an Okʼoxláb in tʼajámal an cumpleaños, pero u káw kʼal tin kwentaj cháb i atiklábtsik xin tʼajaˈ, por jajáˈtsik yab in kʼakʼnálak na Jehová. Ka ajaytsik Génesis 40:20-22 ani Mateo 14:6-10. Ani tayíl ki tʼilmáchtsik kʼal tin kwentaj jeché:
¿Janéy watʼey ba jachanˈ i cháb i cumpleaños?
Kʼal an tʼilabtsik xi a ajay ban Biblia, ¿janéy a chalpayal in achʼál na Jehová kʼal tin kwentaj an cumpleaños?
Por bélkʼi xónaˈ ka konówiy ta báˈ «¿Tsubax lej na Jehová in tʼajál ti kwentaj max nanáˈ ku ajibnaˈ jun i cumpleaños o kin kʼale ba jun i ajib xi an Biblia yab in okʼtsixnál abal ki tʼajaˈ?». Ka ajaytsik Éxodo 32:1-8. Tayíl ka chuˈutsik an VIDEO ani ki tʼilmáchtsik kʼal tin kwentaj jechéˈ:
¿Jantʼó ti koˈol ki lej tʼajaˈ ti kwentaj xowaˈ na Jehová in kulbetnál?
¿Janti neˈech ki ejto ki tʼajaˈ?
¿Janti i ejtowal ki choˈóbnaˈ max an Okʼoxláb in kulbetnál jun i ajib?
¿Káldhats ba jun i okʼtsixtaláb xi yab kʼwajat ban Biblia? Abal ka choˈóbnaˈ ka exóbnaˈ xonti kalnek jechéˈ i ajib.
¿In pidhál i kʼakʼnaxtaláb an atiklábtsik an takʼixtsik ani an bandera? Wawáˈ tokot i kʼakʼnál na Jehová ani i belál abal jajáˈ neˈech kin lejkiy ejtal an kʼibatalábtsik xi waˈach tin pubél an Chabál.
¿Ba jachanˈ i ajib neˈech ka tʼajan jun xataˈ xi an Biblia in ulal abal yab alwaˈ? Koˈol ku kʼwajay tʼokat tin tamét na Jehová ani yab ki tʼajaˈ xowaˈ neˈech tu kʼutʼlintsi ti xeˈchintal.
5. Ki tolmiy xi kʼeˈettsik abal kin kʼakʼnaˈ xowaˈ i belál
Awich ki achʼaˈ tʼojláb ki utsaˈ xi kʼeˈettsik abal yab neˈech ki ajibnaˈ jun i ajib xi na Jehová yab in kulbetnál. Ka óltsi xi kʼeˈettsik xowaˈ a belál kʼal yan i kʼayumtaláb ani kʼakʼnaxtaláb. Abal ka choˈóbnaˈ janéy in tʼajaˈ jun xitaˈ tam tin watʼnaˈ anchanáˈ, ka chuˈutsik an VIDEO.
Ka ajaytsik Mateo 7:12 ani ki tʼilmáchtsik kʼal tin kwentaj jechéˈ:
Kʼal xowaˈ i ajay ba jechéˈ i chakam pejats, ¿in tomnál ka utsaˈ jun a kidhtal abal yab kin tʼajaˈ jun i ajib max jajáˈ yab jaˈich jun i óltsix kʼal a Jehová?
¿Janti a ejtowal ka tejwaˈmédhantsi na yaníl abal a kʼanidhál ani a kʼakʼnál aunque yabich i junkunal kʼal jajáˈtsik abal ka tʼajaˈ jun i ajib?
6. Na Jehová in léˈ abal ku kʼwajay kulbél
Na Jehová in kulbetnál abal ku kʼwajay kulbél kʼal ni jaˈúbtsik ani ni yaníl. Ka ajaytsik Eclesiastés 8:15 ani ki tʼilmáchtsik kʼal tin kwentaj jechéˈ:
¿Janti in xalkʼál jachanˈ i chakam pejats abal na Jehová in léˈ abal ku kʼwajay kulbél?
Na Jehová in léˈ abal nin tʼojnáliltsik ka kʼwajay kulbél ani ka kʼijidhbé. Ka chuˈutsik an VIDEO abal ka chuˈuw abal tsubax anchanˈ tu watʼel ban pakdhaˈ junkuntalábtsik kʼal an kidháblábtsik xi tál píl i bitsow.
Ka ajaytsik Gálatas 6:10 ani ki tʼilmáchtsik kʼal tin kwentaj jechéˈ:
¿In yejentsal ki tʼajaˈ jun i ajib abal ki tolmi kʼeˈet i atiklábtsik?
¿Jowkʼiˈ ta kulbetnál ka pidhnaˈ jun i chʼejwalixtaláb: tam i nixoknáb ka pidhnaˈ kom exom ti tʼajnal jun i ajib o tam a pidhnál kʼal a kulbétal?
Yan i óltsixtsik kʼal a Jehová in tʼajtsal ti ajib nin chakámiltsik, hasta in pidhál ti chʼejwalixtalábtsik. Max tatáˈ a koˈol i chakamtsik, ¿janéy a ejtowal ka tʼajaˈ kʼal jajáˈtsik abal ka kʼijidhbé?
XOWAˈ JUNTSIK IN ULAL: «Yab i kwentaj xonti kalnek an ajib. Xowaˈ más alwaˈ jaˈich ku kʼijidhbé kʼal ni jaˈúbtsik ani ni yaníl».
¿Janéy neˈech ka uluw tatáˈ?
XOWAˈ I EXOBNÁMICH
Na Jehová in léˈ ku kʼwajay kulbél kʼal ni jaˈúbtsik ani ni yaníl, por yab in léˈ ki ajibnaˈ i ajibtsik xi jajáˈ yab in kulbetnál.
Ki chalpay xowaˈ i exobnámal
¿Jantʼom konowixtaláb koˈol ki tʼajaˈ ti báˈ abal ki choˈóbnaˈ max na Jehová in kulbetnál jun i ajib?
¿Janti i ejtowal ki tolmiy ni jaˈúbtsik ani ni yaníl abal kin exbay jantʼó ti yab i ajíbnál juntsik i ajib?
¿Janti i choˈób abal na Jehová in léˈ ku kʼwajay kulbél ani ku kʼijidhbé?
KA EXLAˈ JUN XATAˈ MÁS
Ka ajay juntsik i ajib xi an óltsixtsik kʼal na Jehová yab in ajíbnál.
«¿Jantʼó ti an óltsixtsik kʼal a Jehová yab in tʼajál juntsik i ajib?» (Artículo de jw.org)
Ka exóbnaˈ chéˈ xanéy jantʼókʼi na Jehová yab in kulbetnál an cumpleaños.
«¿Jantʼó ti an óltsixtsik kʼal a Jehová yab in ajíbnál an cumpleaños?» (Artículo de jw.org)
Ka chuʼuw janti an chakamtsik in ejtowal kin kulbédhaʼ na Jehová, tam jajáʼtsik yab in tajál i ajib xi na Jehová in pojkál.
Yan tʼajat i óltsixtsik kʼal a Jehová yab in ajíbnál an Navidad. ¿Kʼwajattsik kulbél kom yab in tʼajál?
«In elaˈtsik jun xataˈ más alwaˈ» (La Atalaya, 1 de diciembre de 2012)
a Ka chuˈuw an óltsixtaláb 5 abal ka choˈóbnaˈ janéy a ejtowal ka tʼajaˈ tam u tʼajnal juntsik i ajib.