AJUMTALÁB 37
Xowaˈ an Biblia in ulal kʼal tin kwentaj an tumín ani an tʼojláb
¿Juntsikíl a achʼámal i lej chalpax kom yab a koˈol i tʼojláb ani i tumín? Max anchanˈ, awil ki achʼaˈ tʼojláb ki kóˈoy xowaˈ i yejentsal ani ki kʼakʼnaˈ na Jehová xanti in tomnál. An Tʼokat Dhutslab tu pidhál i alwaˈ takʼixtalábtsik xi neˈech tu tolmiy tʼajat.
1. ¿Janéy in ulal an Biblia tin kwentaj an tʼojláb?
An Okʼoxláb in léˈ abal wawáˈ ki kulbetnaˈ ni tʼojlábil. Jaxtám an Tʼokat Dhutslab in ulal «jaˈich lej alwaˈ abal an atiklábtsik [...] kin kulbetnaˈ nin tʼojlábil» (Eclesiastés 2:24). Na Jehová u tʼojnal tʼajat. Tam i chʼilbayal ani u tʼojnal lej chapik, exom i tʼajál xowaˈ na Jehová in kulbetnál ani wawáˈ weye i achʼál u kulbél.
An tʼojláb jaˈich lej yejat, por yab jaykʼi koˈol ki jilaˈ abal tu kʼántsi an kʼij abal ki kʼakʼnaˈ na Jehová (Juan 6:27). Na Jehová in ulúmal abal neˈech tu pidhaˈ xowaˈ i yejentsal max ki kʼwajbaˈ jajáˈ okʼox ti ejattal.
2. ¿Janéy in ulal an Biblia tin kwentaj an tumín?
An Biblia in ulal abal «an tumín jaˈich jun i tolmixtaláb», por aníl jeye tu utsál abal an tumín yab in ejtowal tu pidhaˈ an kulbétaláb (Eclesiastés 7:12). Jaxtám an Tʼokat Dhutslab tu utsál abal yab ki kʼanidhaˈ an tumín ani tu pidhál jechéˈ i takʼixtaláb: «Ki kʼwajaytsik kʼijidh kʼal xowaˈkʼi a koˈol» (ka ajay Hebreos 13:5). Tam u kʼwajat kulbél kʼal xowaˈkʼi i koˈol yab u kʼwajat tu tʼeˈpinal abal i léˈ ki átaˈ más i tumín. Aníl jeye yab i konyal matidh i tumín max yab i yejentsal (Proverbios 22:7). Ani yab u kʼalel tu ubátʼ abal ki átaˈ i tumín.
3. ¿Janti i ejtowal ki éynaˈ an tumín abal ki tolmiy xi kʼeˈet?
Na Jehová jaˈich jun i Okʼoxláb xin kulbetnál kin pidhnaˈ xowaˈ in koˈol, ani chʼilbayal weye tam i pidhnál i chʼejwalixtalábtsik ani yab u chʼeˈneˈbél (1 Timoteo 6:18). Jun xanti i ejtowal ki éynaˈ ni tumínal abal ki tolmiy xi kʼeˈettsik jaˈich ku tólmixin abal ka jalbiyat xowaˈ u pakwáb ban junkuntaláb ani jeye ki tolmiy xitaˈ in yejentsal, ani más an kidháblábtsik. Xowaˈ na Jehová más in tʼajál ti kwentaj yab jaˈich jáy i ejtowal ki pidhnaˈ, jajáˈ in tʼajál ti kwentaj max i pidhnál kʼal i kulbétal. Max i pidhnál kʼal yan i kulbétaláb, neˈech ku kʼwajay kulbél wawáˈ ani neˈech ki kulbédhaˈ na Jehová (ka ajay Hechos 20:35).
ABAL KI EXÓBNAˈ MÁS
Ki chuˈuw jantʼom alwaˈtalábtsik neˈech ki bachʼuw max yab ki watʼpintsi tu tʼojnal abal ki átaˈ i tumín ani ku kʼwajay kulbél kʼal xowaˈ i koˈol.
4. Ki tʼójon alwaˈ abal ka kʼakʼnaˈ na Jehová
An jaˈúbtaláb xi koˈol kʼal na Jehová jaˈich xi neˈech tu tolmiy ki chuˈuw an tʼojláb janti in tomnál.Ka chuˈutsik an VIDEO ani ki tʼilmáchtsik kʼal tin kwentaj jechéˈ:
¿Janéy más a kulbetnál kʼal xowaˈ in tʼajaˈ na Jason ba nin tʼojlábil?
¿Janéy in tʼajaˈ abal yab ka wixkʼantsat yan i kʼij kʼal an tʼojláb?
Ka ajaytsik Kolosenses 3:23, 24 ani ki tʼilmáchtsik kʼal tin kwentaj jechéˈ:
¿Jantʼó ti lej exbadh ku tʼójon «kʼal yantam i kulbétaláb»?
An tʼojláb jaˈich lej yejat, por yab jaykʼi koˈol ki jilaˈ abal tu kʼántsi an kʼij abal ki kʼakʼnaˈ na Jehová
5. Tam u kʼwajat kulbél kʼal xowaˈ i koˈol i bachʼwal yan i alwaˈtalábtsik
Waˈach yan i atikláb xin tʼajál yan i chápláb abal kin átaˈ yan i tumín, por an Biblia yab tu takʼyal ki tʼajaˈ anchanˈ. Ka ajaytsik 1 Timoteo 6:6-8 ani ki tʼilmáchtsik kʼal tin kwentaj jechéˈ:
¿Jantʼom takʼixtaláb tu pidhál an Biblia?
I ejtowal ku kʼwajay kulbél aunque yab i koˈol yan xanéy. Ka chuˈutsik an VIDEO ani ki tʼilmáchtsik kʼal tin kwentaj jechéˈ:
¿Jantʼó ti kʼwajat kulbél jechéˈ i yanelábtsik aunque in koˈol wéˈ i tumín?
¿Por max i koˈolich yan i tumín ani i léˈ ki átaˈ más? Na Jesús in pidhnaˈ jun i junbaxtaláb abal tu óltsi abal yab alwaˈ ki chalpay anchanˈ. Ka ajaytsik Lukas 12:15-21 ani ki tʼilmáchtsik kʼal tin kwentaj jechéˈ:
¿Janéy a exóbnál kʼal an junbaxtaláb xin pidhnaˈ na Jesús? (Ka chuˈutsik an versículo 15).
Ka ajaytsik Proverbios 10:22 ani ka junbaytsik kʼal 1 Timoteo 6:10. Ani tayíl ki tʼilmáchtsik kʼal tin kwentaj jechéˈ:
¿Janéy a chalpayal más exbadh: ku kʼwajay utat kʼal na Jehová o ki kóˈoy yan i tumín? ¿Jantʼókʼi?
¿Janéy i ejtowal ki tamu max i kʼanidhál tʼajat an tumín?
6. Na Jehová neˈech tu pidhaˈ xowaˈ i yejentsal
Tam yab i koˈol i tʼojláb nibal i tumín i ejtowal ki tejwaˈmédhaˈ max tsubax i belál na Jehová. Ka chuˈutsik an VIDEO abal ka exóbnaˈ janéy a ejtowal ka tʼajaˈ tam ka watʼnaˈ jun i yejentsixtaláb ani tayíl ki tʼilmáchtsik kʼal tin kwentaj jechéˈ:
¿Janéy in watʼnaˈ an kidháb xi ban video?
¿Janéy in tʼajaˈ an kidhábláb lejat kin elaˈ jun i tʼojláb xi alwaˈ?
Ka ajaytsik Mateo 6:25-34 ani ki tʼilmáchtsik kʼal tin kwentaj jechéˈ:
¿Janéy in ulal na Jehová neˈech kin tʼajaˈ kʼal an atiklábtsik xin chápnantsal abal kin tʼójontsi?
XOWAˈ JUNTSIK IN ULAL: «Koˈol kin tʼójon chapik abal ku pidhaˈ xowaˈ in yejentsal nu yaníl. Yab u ejtowal kin kʼale ban junkuntalábtsik echʼekʼij».
¿Jantʼom pejats kʼal an Biblia ti tolmiyal ka chuˈuw abal an kʼakʼnaxtaláb xi pidhál na Jehová jaˈich na más exbadh?
XOWAˈ I EXOBNÁMICH
An tumín ani an tʼojláb jaˈich lej yejat, por yab koˈol ki jilaˈ abal tu kʼántsi an kʼij ani tu ówmédhaˈ kʼal na Jehová.
Ki chalpay xowaˈ i exobnámal
¿Janéy in ejtowal ti tolmiy abal ka chuˈuw an tʼojláb xanti in tomnál?
¿Jantʼó ti lej alwaˈ ku kʼwajay kʼijidh kʼal xowaˈ xi koˈolich?
Max na Jehová in ulal abal neˈech kin pidhaˈ xowa in yejentsal nin tʼojnáliltsik, ¿janti a ejtowal ka tejwaˈmédhaˈ abal tsubax lejtal a belál?
KA EXLAˈ JUN XATAˈ MÁS
Ka exóbnaˈ max an Biblia in ólnál abal an tumín yab alwaˈ.
«¿In koˈol in walab an tumín kʼal ejtal an atʼaxtalábtsik xi waˈach?» (Artículo de jw.org)
Ki chuˈuw xanti in kulbetnál na Jehová ki pidhnaˈ xowaˈ i koˈol.
«¿Janéy in ulal an Biblia tam ki pidhnaˈ jun i chʼejwalixtaláb?» (Artículo de jw.org)
¿In tomnál ku ubátʼin abal ki átaˈ i tumín?
Ka chuˈuw kʼal janéy ti tolmiyat jun i inik xu kwéˈ wiˈik ani u ubátʼak kʼal an tumín abal kin jalkʼuy nin xeˈchintal.
«U kulbetnálak tʼajat ku átaˈ an tumín kʼal an bitsimtsik» (La Atalaya, 1 de noviembre de 2011)