Letta From Jesus Luna Guys

“Time awready fo you guys come teachas.” (Heb 5:12) Try tink! Jehovah—da bestes teacha in da universe—tell us fo teach oddas about him! Da job we get fo teach da trut about Jehovah—in da ohana, in da hui, or wen we preach—iz one spesho work an one mayjah kuleana. How we can do one good job?

We can find da ansa in wat da aposal Paul wen write to Timoty: “Stick wit reading da Bible to God peopo, give da peopo da good kine words from God, an teach um all dat.” Paul wen say: “Cuz if you do dat, you an da peopo dat lissen you goin come outa da bad kine stuff.” (1 Tim 4:13, 16) Wat you tell can save peopos life. So real importan fo come one betta reada an teacha. Dis brochure stay made fo help you do dat. Try look some of da tings get inside.

Da scripchas on da page iz eidda one Bible trut dat stay conneckted to da study point or one exampo of da study point

Jehovah iz da “Bestes Teacha.” (Isa 30:20 NWT) Iz tru dis brochure goin help you fo come one betta reada an teacha, but no foget Jehovah iz da One we get oua message from an he da one dat bring peopo to him. (John 6:44) So, pray plenny fo his spesho spirit. Use da Bible plenny. No make um all about you, always make um about Jehovah. Try hahd fo help da guys dat lissen to you fo love Jehovah from da heart.

You wen get da invite fo teach da mos importan message eva. We stay shua dat wen you trus in “da powa dat God give,” eryting goin come out good.—1 Pet 4:11.

Us guys dat teach wit you,

Jesus Luna Guys Of Witnesses Fo Jehovah